36
Elihu Talk Moa
1 Den Elihu tell dis too:
2 “Eh Job! Hang in dea wit me litto bit moa,
An I goin help you fo undastan
Dat still yet get plenny mo stuff I gotta tell fo God.
3 I bring wat I know from far away.
I goin show dat da One dat wen make me,
Do da right ting erytime.
4 Fo shua dat I no bulai wen I tell you dis.
I one guy dat fo shua know wat I know, an I stay wit you.
5 “Eh! God get powa, but he no tink dat peopo no good.
He get powa, an he stay shua wat he plan fo do.
6 God no let da bad kine peopo stay alive long time.
But he give da peopo dat get hard time da rights dey suppose to get.
7 God no hold back from watch
Fo da peopo dat do da right kine stuff
Fo proteck dem.
He put dem on top thrones jalike dey kings foeva,
An make dem come real importan.
8 But maybe dose peopo come prisonas, all tie up wit leg chains.
An maybe peopo make dem suffa.
9 Den God goin let um know wat dey wen do—
Dat dey do bad kine stuff
Cuz dey big head.
10 God make dem lissen wen he teach dem
How dey gotta change.
He tell dem fo tell ‘Laytas’ to da bad stuff.
11 If dey lissen an go work fo God,
Den dea life goin come good fo dem.
Dea las year, nice tings goin happen to dem.
12 But if dey no lissen,
Dey goin get kill wit swords.
Dey goin mahke cuz dey neva learn notting.
13 “Da peopo dat ack jalike God no matta,
Dey stay piss off inside but dey no say notting.
Even wen God tie um up, dey no call out to him fo help.
14 Dey mahke wen dey still young.
Dey live shame kine wit da guys dat fool aroun fo pay
Inside da temples fo da idol kine gods.
15 Wen peopo suffa, God use dat fo pull dem outa dea trouble.
Wen dey stay suffa, az wen he let dem hear him.
16 “Fo shua, Job, God make you fo you like get away from trouble.
Az cuz he like bring you inside one place fo you move aroun.
He like you res by yoa table dat get plenny good food.
17 But now, Job, dis da ony ting you tink bout:
Da way God da Judge goin punish da bad kine peopo, dass jalike da way he goin punish you too.
Da Judge goin make shua he punish you.
18 But make shua dat nobody give you stuff dat cost plenny,
Fo make you do wass wrong.
No let plenny unda da table money
Make you go off track.
19 You wen get all kine stuff dat cost plenny.
You tink all dat goin make da trouble go way, o wat?
You tink you strong enuff fo handle all dat?!
20 No talk bout how you like fo da nite time come!
Dass wen peopos can disappea!
21 Watch out! No go turn aroun an do bad kine stuff!
Cuz God let you suffa fo tes you.
22 “You know wat?! Wit da powa God get, he stay importan.
No mo nobody can teach jalike him.
23 No mo nobody tell God how he gotta live.
No mo nobody can tell him ‘Wat you wen do, az wrong!’
24 No foget fo talk good bout wat God do,
Jalike da peopo dat sing bout how good him.
25 Erybody in dis world see wat he do.
Peopo look, but ony from far away.
26 God, he stay big an importan.
Us, we no can undastan him!
No can count how many year he stay alive.
27 “He pull up all da watta drops togedda an make um pure.
He make da fog come rain fo da streams.
28 Da clouds drop down dea watta
An plenny rain fall on da peopo.
29 No mo nobody undastan how da clouds spread out,
O how da noise from da storm come from wea he stay!
30 Look how he scatta da lightning all aroun him,
Dat shine all ova—even to da bottom a da ocean.
31 Wen he sen da rain, az how he stay in charge a all da diffren peopos,
An give um plenny food fo eat.
32 He grab da lightning wit his hands.
He tell um wea fo hit da target.
33 His thunda tell dat da storm stay coming.
Even da cows know wat goin happen.”