1 “An my heart poun cuz a dis storm!
Feel jalike my heart wen jump up inside me.
2 Lissen up! All you guys, lissen good to da big noise!
Az God voice you hear, jalike thunda!
3 He let go his lightning all ova unda da sky.
He sen um to da mos far places all ova da world.
4 Afta da lightning, da big noise come jalike one lion.
Da thunda, dass his voice dat show he da greates.
Wen he let go his awesome voice,
He no hold back!
5 God use his voice
Fo make thunda mo awesome den us guys wen hear.
He do big tings dat us guys no undastan.
6 He tell da snow, ‘Fall on top da groun!’
He tell da rain, ‘Make one nice showa!’
O ‘Make one big heavy rain!’
7 Wen he make heavy rain an nobody can work,
Den all da peopo God wen make
Goin know he da one!
8 Da wild animals hide inside dea caves.
Dey stay inside dea place wen get storm.
9 Da storm wind come from wea he stay.
Da cold come from da strong north winds.
10 God make da ice wen he breave,
An da big watta freeze.
11 God load up plenny watta inside da dark clouds.
He scatta his lightning thru da clouds dat all pile up.
12 He tell da clouds fo huli all ova da world.
Dey do wateva God tell um fo do
Ery place he tell um fo go.
13 Get time wen God bring da clouds fo punish peopo,
An get time he bring um fo watta his land,
An get time he bring um fo show peopo he stay tight wit dem.
He make all dat happen.
14 “Eh Job, lissen up, aah?!
Stop an tink bout da awesome tings God do
Dass hard fo undastan.
15 You know how God tell da clouds wea fo go, aah?!
How he make his lightning flash from inside da clouds?
16 You know how da clouds move inside da sky?
You know all da awesome stuff dat God do?
Cuz he perfeck an know eryting.
17 Eh Job! Wen da land ova hea stay quiet cuz da air no move wit da south wind,
You know how hot you feel inside yoa clotheses, aah?
18 Kay den: You tink you can help God fo spread out da clouds,
Wen da sky hard jalike one metal mirror, o wat?
19 “Teach us guys wat we suppose to tell Da One In Charge.
We no can make plan how fo argue wit him.
We no undastan plenny stuff,
Jalike we no can see notting.
20 You tink somebody betta tell God dat I like talk to him, o wat?
You tink anybody like dea head come all hamajang?
21 Afta da wind clean even da small clouds outa da sky,
Den no can look at da bright sun.
22 Same ting, wen God come from da north side,
Shining jalike gold,
God come, an he one awesome king!
23 Da God Dat Get All Da Powa, us no can reach him.
He real strong, an he judge da right way erytime.
But he no put heavy presha on us guys.
24 Az why peopo get choke plenny respeck fo God.
Cuz he no need even look at peopo
Dat tink dey know wat fo do erytime.”