Da One In Charge Talk Moa
1 “You know da time wen da mountain goats born dea bebes?
You wen watch da wahine deer born dea bebes?
2 You tink you can count da months till dey born um?
You know da time dey born um?
3 Dey bend dea legs fo born dea bebes close to da groun.
Dey real sore, an den pau.
4 Dea bebes grow real healthy an come strong—dey no need one deer pen!
Wen dey go way from da muddah, dey no come back to her.
5 “Who da one let da wild donkeys go?
Who hemo dea ropes?
6 Az me wen put dem inside da dry boonies fo dea place.
Dass da place wea get salt in da dirt, fo dem live ova dea.
7 Da wild donkeys laugh cuz da peopo inside da towns make big noise.
Wen da guy dat stay in charge a da tame donkeys yell,
Da wild ones no hear notting!
8 Dey go all ova da hills fo find dea food.
Dey look fo someting green.
9 “You tink da wild cows like go work fo you?
You tink dey goin stay by yoa food place nite time?
10 You tink you can put ropes fo make dem plow one strait row?
You tink dey goin make da valleys come level afta you plow um?
11 You goin trus dem cuz dey real strong?
You goin leave yoa heavy work fo da wild cows do um fo you?
12 You shua dey goin bring in yoa wheat an barley,
An put um all togedda da place wea you split da junk kine stuff?
13 “Da big ostrich bird get wings dat look real nice but no use um fo fly.
Not jalike da stork bird, dey stay tight wit dea bebes,
An dey get wing an body feathers dat can fly fo real.
14 Da ostrich put da eggs on top da groun an go away,
An let da sand keep um warm.
15 No bodda her if somebody walk ova an smash um.
O if da wild animals step all ova um.
16 She make mean to her bebes, jalike dey not her ones.
She no worry bout dem. She no tink wat she wen do was wase time.
17 Cuz me God, I no make um fo her know wat fo do erytime.
An I no make um fo her undastan stuff.
18 But wen da ostrich stan up fo run,
She go real fas, fo laugh at da horses an da guys dat ride um.
19 “Eh Job! You da one make all da horses come strong, o wat?!
You wen put da mane on top dea neck, dat move in da wind?
20 You da one make da horses fo dem jump fas jalike one grasshoppa?
You tink you can make um fo peopo come sked wen da horse make awesome noise wit dea nose?
21 Dey scratch da flat groun wit dea hoof,
An stay good inside cuz dey strong.
Dey run to wea peopo stay fight.
22 Jalike da horses laugh an no sked notting.
Dey no turn aroun an run away from swords.
23 Da arrow bag make noise by dea side,
An da sun flash from da heavy spear an da spear fo throw.
24 Da horses all excited an stamp da groun, an dey go fo broke fo run.
Dey no stan quiet wen somebody blow da sheep horn trumpet.
25 Wen dey blow da sheep horn trumpet, da horse make noise fo ‘Geev um!’
Dey smell da fighting from one far place.
Dey hear da a army leada guys yell,
Den da fighting start.
26 “Wen da hawk bird start fo fly
An spread his wings fo fly south,
Az cuz you teach um how, o wat?!
27 You make da eagle fly wen you tell um,
An build nes on top da high mountains, o wat?!
28 He live on top one cliff an stay dea nite time.
He live inside da rough rocks cuz safe ova dea.
29 From dea he look fo food.
He see um from far away.
30 ✡ 39:30: Matt 24:28; Luke 17:37Any place get mahke bodies, dass wea get eagle too.
Da young eagles suck up da blood.”
✡39:30 39:30: Matt 24:28; Luke 17:37