2
Da One In Charge Punish
Da Jerusalem Peopo
Da Boss come huhu wit da Jerusalem peopo.
He stay cova dem jalike wit one cloud!
Da Israel peopo was awesome jalike da sky,
But jalike he wen throw um down all da way to da groun.
Wen he come huhu wit dem,
He no even proteck his Temple.
 
Jalike da Boss wen wase all da houses fo da Jacob peopo.
He no mo pity fo dem.
He bus up da strong wall aroun da Judah peopo,
Cuz he stay real huhu agains da peopo.
He make da king an da princes lose face.
He bring um down to da groun,
Cuz nobody get respeck fo dem now.
 
He chop down da Israel peopo,
He make um come weak, cuz he stay real huhu.
Wen da peopo dat stay agains dem come nea,
He no use his powa fo help dem.
He make jalike one fire, burning da Jacob peopo,
One fire dat burn up eryting aroun um.
 
Jalike God stay agains us guys, he make his bow ready.
His right hand stay ready fo shoot da arrow.
He kill erybody dat us guys love da mostes.
Cuz he real huhu, jalike he dump fire
On top da place wea da Jerusalem peopo live!
 
Da Boss come jalike one guy dat stay agains us guys,
He wase da Israel peopo.
He wase all dea palaces.
He bus up dea strong wall.
He make plenny Judah peopo moan
Cuz dey stay real sad inside.
 
He wase his Temple,
Jalike was one shack inside one grape field.
He wipe out da spesho place wea da peopo meet him.
Da One In Charge make his Zion peopo foget
Da spesho religious ceremonies an da Res Days.
He tell “Laytas” to wat da king o da pries guys do,
Cuz he stay real huhu.
 
Da Boss tell “Laytas” to his altar.
He bag from da Place Dat Stay Spesho Fo Him.
He let da peopo dat stay agains us guys
Take ova da palace walls.
Dey make noise inside da Temple Fo Da One In Charge
Jalike wen get da spesho religious ceremonies.
 
Da One In Charge make one plan fo bus up da wall aroun Jerusalem.
He stretch out one line fo measure wat part he goin bus up.
He no hold back.
He wipe um out.
Jalike he make da strong wall cry.
All wasted, da walls!
 
Da town gates fall down inside da dirt.
Da One In Charge smash da bars fo da gates an wipe um out.
Da king an da princes come prisonas an go to odda nations,
No mo nobody teach Da Rules From God.
Da guys dat talk fo Da One In Charge
No see notting jalike dreams from him no moa.
 
10 Da older leadas fo Jerusalem sit on top da groun, an no talk.
Dey sprinkle dirt on top dea heads.
An dey wear burmbag clotheses fo show dey stay sad.
Da young wahines from Jerusalem lay on da groun an put dea face in da dirt,
Fo show dey stay sad inside.
 
11 I cry till my eyes no can see notting.
I suffa inside my gut.
Jalike my heart pour out on top da groun.
Cuz my Jerusalem peopo come wipe out awready.
Da bebes an da kids pass out
On top da streets inside Jerusalem.
 
12 Dey tell dea muddahs, “Wea someting fo eat an drink?”
Dey pass out jalike army guys dat stay all bus up
On top da open squares inside Jerusalem.
Dey stay alive fo ony short time inside dea muddahs arms.
 
13 No mo notting I can tell fo help you guys!
You Jerusalem peopo, no mo nobody stay suffa jalike you guys suffa!
I no can talk bout wat happen to odda peopo,
Fo help make you guys feel mo betta!
Yoa cut stay real deep, jalike da ocean.
Who goin make you come good?! Nobody!
 
14 Yoa guys dat suppose to talk fo God,
Dey ony see plenny stuff dass stupid an worth notting!
Dey no show up da bad kine stuff dat you guys stay do,
Fo you guys change,
An no come prisonas dat gotta go one far place.
Da stuff dey tell you guys dat dey see fo you,
Az wrong, an make you guys tink eryting goin come good!
 
15 All da odda peopo dat pass by you Jerusalem guys,
Dey clap hands fo make fun a you guys.
Dey shake dea head fo show dey no mo respeck fo you.
Dey tell, “Ahanas! Dis da big town dey call ‘Da Beautiful Place,’ o wat?!
Dis da place dat peopo all ova da world stay good inside
Wen dey tink bout um, o wat?!”
 
16 All da peopo dat stay agains you guys make fun a you.
Dey laugh an grind dea teet.
Dey tell, “Fo shua, jalike us guys wen swallow dem!
We wen wait long time fo see dis happen!”
 
17 Da One In Charge do wat he wen plan fo do.
He do wat he promise fo do long time befo time.
He win ova you guys, an he no mo pity fo you!
He let da peopo dat stay agains you guys laugh cuz you guys suffa,
Same time he make dem come strong.
 
18 Eh! You Jerusalem guys! Make yoa town wall yell to da Boss fo help!
Cry fo da watta from yoa eyes run down jalike one riva, day time an nite time!
No res inside, an no pau cry!
 
19 Wake up! Yell loud nite time,
Wen da watcha guys start fo call.
Pour out eryting inside you, jalike watta in front da Boss.
Lif up yoa hands an pray to him, fo yoa kids no mahke!
Dey stay hungry, so dey pass out at ery street corna.
 
20 “Look, you Da One In Charge! Tink hard!
You neva make lidis to odda peopo befo time!
You tink da wahines suppose to kill dea kids an eat um,
Da ones dat dey take kea dem, o wat?!
You tink az good fo kill da pries guys an da guys dat talk fo you, Da One In Charge,
Inside da Place Dat Stay Spesho Fo You?!
 
21 “Da young guys an da ol guys,
Dey all stay lay mahke inside da dirt on top da streets.
My young guys an girls get kill wit swords.
You wen kill dem wen you stay real huhu.
You wen wipe um out an neva get pity fo dem.
 
22 “Jalike you call da peopo fo come togedda wen get da spesho religious ceremonies,
Now you call terroris guys fo come all aroun me fo make me come real sked.
Wen you, Da One In Charge, wen stay real huhu,
No mo nobody get outa dea o stay alive.
Get peopo dat was born from me, an I bring dem up,
But da peopo dat stay agains me wipe dem out!”