5
Aks Da One In Charge Fo Give Chance
1 Eh, Da One In Charge!
No foget wat wen happen to us guys.
Look! Shame, us guys!
2 Oua property wen pass to peopo us guys donno.
Peopo from anodda place get oua houses.
3 Now us jalike peopo dat no mo faddah an muddah.
Oua muddahs jalike widows, jalike dea husban mahke.
4 Us gotta pay fo drink oua watta,
An we gotta pay fo oua wood.
5 Da guys dat chase us stay nea.
Us all had it! An no can res.
6 Us guys wen give in to da Egypt guys an da Assyria guys
Fo us get enuff food.
7 Oua ancesta guys wen do bad kine stuff, an dey no moa.
An you punish us guys cuz a dat.
8 Get slave guys stay in charge us guys.
An no mo nobody fo get us away from dem.
9 Fo get someting fo eat, maybe us get kill,
Cuz da guys inside da boonies get swords.
10 Oua skin stay hot jalike one oven.
We get feva cuz we hungry.
11 Guys rape da wahines inside Jerusalem,
An da young girls dat neva sleep wit one guy inside da Judah towns.
12 Dey hang up da leadas by dea hands.
Dey no show respeck fo da older leadas.
13 Da young guys bus ass fo push da heavy stones fo grind da wheat.
Da boys almos fall down cuz dey carry heavy wood.
14 Da older leadas stay away from da town gate now.
Da young guys no play dea music no moa.
15 We no stay good inside no moa.
Befo time us guys dance an sing, but now we cry.
16 Da lei fall off oua head, cuz we wen come all bum out!
Bummahs fo us guys! Us wen do bad kine stuff!
17 Cuz a dis, us not strong inside.
Cuz a all dis, oua eyes see ony litto bit.
18 No mo notting stay on top da Temple hill dat dey call Mount Zion.
Ony da wild jackal kine dogs go aroun dea.
19 Da One In Charge,
I like you stay in charge foeva,
Cuz you da king.
You get da right fo sit on top da throne,
One generation afta anodda, foeva.
20 So, how come you erytime foget us guys?
How come you bag from us long time?
21 Bring us guys back by you, Da One In Charge,
Fo us come tight wit you one mo time.
Make us guys come new, jalike befo time.
22 Bring us back, no matta you wen tink us guys no good,
An you wen stay real huhu wit us guys.