Wat Da Peopo Teach Long Time Ago
1 Den some Pharisee guys an teacha guys dat teach da Rules From God go from Jerusalem by Jesus. 2 Dey spock Jesus guys how dey eat. Befo dey eat, dey no wash dea hands da way da Pharisee guys tell dey gotta wash um.
3 You know, da Pharisee guys an all da Jew guys, dey no eat till dey wash dea hands. But dey suppose to wash um jalike da ancesta guys wen pass um down from long time befo time. 4 Wen dey come back from da market, dey no eat till dey wash dea hands dat way. Get plenny odda stuffs dey gotta do lidat. Firs, dey gotta wash da cups, da pitchas, an da pots jus right, da way dea ancesta guys wen teach um fo do, fo dem eat.
5 So da Pharisee guys an da teacha guys dat teach da Rules From God, dey tell Jesus, “Eh, da guys you stay teach, no good how dey ack! How come dey no ack da way da ancesta guys pass down fo us ack from long time befo time? Dey no wash dea hands dat way befo dey eat!”
6 ✡ 7:6: Isa 29:13Jesus tell um, “Da guy Isaiah wen talk fo God long time befo time, an fo shua he talk bout you guys! Cuz you guys tell one ting an do anodda. Isaiah wen write dis:
“ ‘God tell: Dese peopo, dey tell dey get respeck fo me,
But inside dey stay far from me.
7 Dey go down an pray to me,
But dey ony wase time.
Wat dey teach,
Dass ony wat some peopo tell we gotta do.’ ”
8 Jesus tell, “You guys no like do wat God stay tell you fo do. You guys ony do wat odda peopo from befo time pass down fo you do.”
9 An he tell um, “You guys jalike da sly mongoose, aah?! You guys know how fo dump da Rules From God, fo you guys stick wit wat some peopo wen teach you long time befo time. 10 ✡ 7:10 a: Outa 20:12; Rules2 5:16; b: Outa 21:17; Prieses 20:9Moses wen tell, ‘Show respeck fo yoa faddah an muddah.’ He tell dis too: ‘Whoeva swear at his faddah o muddah, gotta kill him.’
11 “But you teacha guys tell, ‘If one guy get someting dat he can use um fo help his faddah o muddah, he can tell dem, “I no goin use um fo help you guys, cuz bumbye I goin give um to God.” ’ 12 Den you guys tell da guy no need help his faddah o muddah. 13 You guys make no good wat God wen tell you fo do, so you can stick wit da kine stuff yoa ancesta guys wen pass down fo us know from long time befo time. You guys do plenny odda tings lidat, an pass um down fo da odda peopo fo do um too.”
Wat Make You Pilau Inside
So You No Can Pray
So You No Can Pray
14 Den Jesus tell da peopo, “Go come. Lissen an try undastan. 15 Wat you guys put inside yoa mout no mean you pilau inside an no can pray cuz a dat. But wat come outa yoa mout, dass wat make you pilau inside an no can pray. 16 If you guys hear dis, den lissen up real good!”
17 Laytas he go way from da peopo, an go inside one house, an da guys he teach stay come an tell, “Try tell us wat da story mean dat he tell fo teach.” 18 He tell um, “Wot! You guys still yet no undastan? You jalike da odda peopo! You gotta figga dis way: Wateva go inside somebody no can make him come pilau inside fo no pray. 19 Cuz dat ting no go inside da heart, but go inside da stomach, an bumbye come out.” (Wen Jesus tell dat, he make um okay fo eat any kine stuff.)
20 Den Jesus tell, “Da kine stuff dat come outa one guy, dass wat make him pilau inside fo him no pray. 21 Get all kine bad kine stuff come out from inside peopo. Dass how erybody tink how dey can do bad kine stuff:
dey not married to da one dey fool aroun wit;
dey rip off da odda peopo;
dey murda peopo;
dey married an still yet go fool aroun;
22 dey like grab eryting fo ony dem;
dey feel good wen dey do bad kine stuff;
dey like bulai da odda guy;
dey no mo shame fo any kine;
bodda dem wen da odda guy get someting good;
dey talk bad bout odda peopo;
dey get big head;
dey ack stupid cuz dey no like tink.
23 All dat bad kine stuff, dass wat come from inside. Az why peopo stay pilau inside an dey no can pray.”
One Wahine Trus Jesus
24 From dea Jesus go Tyre side. He go inside one house, an he no like nobody know wea he stay. But no can. Erybody find out. 25-26 Get one wahine from da Fonecia peopo, Syria side. Her Greek, not Jew, from da kine peopo dat da Jews call “dogs.” Her litto girl get one bad kine spirit dat wen take ova her, an make her do all kine stuff. Da muddah hear bout Jesus, an right den an dea she go by him. She go down by his feets, an beg him fo make da bad kine spirit no bodda her girl no moa.
27 Jesus tell, “Firs, gotta feed da kids, you know. No good take da food from da kids an throw um down to da dogs.”
28 She tell, “Dass right, Mista. But even da dogs unda da table eat wat fall down from da table, aah?”
29 Jesus tell her, “Wow! You trus me fo real kine! Go home. Da bad kine spirit gone awready from yoa girl!”
30 So she go back home. Dea was da girl. She stay res on top da bed, an she no mo bad kine spirit.
Jesus Make One Guy Come Good
31 Jesus hele on from Tyre side, an go thru Sidon, to Galilee Lake, nea da Ten Towns. 32 Dey bring one guy dat no can hear o talk right. Dey beg Jesus fo put his hands on top da guy. 33 Jesus take him by da side wea neva have nobody. Den he stick his finga inside da guy ears, an spit, an touch da guy tongue. 34 Jesus look up to da sky, an moan, an tell, “Efata!” Dat mean, “Open up!” 35 An right den an dea da guy ears an his tongue come good, an he can talk good.
36 Jesus tell dose guys, “No tell nobody bout dis!” But da mo he tell dat, da mo dey go tell. 37 All dis fo real kine blow da peopo mind. Dey tell, “Dis guy, he fo shua do eryting good! He even make da peopo dat befo no can hear, now can hear, an da peopo dat befo no can talk, now can talk!”
✡7:10 7:10 a: Outa 20:12; Rules2 5:16; b: Outa 21:17; Prieses 20:9