1 Jesus go way from dea, an go back his place Nazaret, an his guys go too. 2 Wen da Res Day come, he go inside da Jew church an teach da peopo. Plenny peopo tell, “Wow! Wea he get all dis stuff from? How come he know all dis? Wea he get da powa fo do all dis awesome stuff? 3 Fo shua dass da carpinta guy, aah? His muddah Mary, an his braddahs James, Joseph, Judas, an Simon. His sistahs, dey stay hea wit us too.” Dis bodda dem, how he stay ack.

4 ✡6:4: John 4:44But Jesus tell um, “One guy dat talk fo God get plenny respeck. But he no mo respeck notting inside his town an his ohana.”

5-6 An Jesus figga, “Eh, how come dey no trus me?” Az why he no do awesome stuff ova dea fo show his powa. He put his hands on top litto bit peopo, an make dem come good.

Az why Jesus go odda small towns fo teach odda peopo. 7 He call his twelve guys togedda, an sen um out two by two. He give um da powa fo make da bad kine spirits no bodda da peopo no moa. 8 Dis wat he tell his guys: “Ony take litto bit fo da trip, ony yoa stick fo walk. No take bread. No even take one bag, o money in yoa belt. 9 Take yoa slippas, but no take two coats. 10 Wen you guys go inside one guy house, stay dea till you go way from da town. 11 ✡6:11: JGuys 13:51✡6:11: Luke 10:4-11An if da peopo in da place no like you come an no like lissen you, wen you go outa dat town, shake da dus off yoa feet, fo show dat you no mo dus from dat no good place.”

12 Afta dat Jesus guys all go out an tell da peopo, “You gotta come sorry fo all da bad kine stuff you wen do, an no do um no moa.” 13 ✡6:13: James 5:14An dey make plenny bad kine spirits no bodda da peopo no moa, an dey put olive oil on top plenny sick peopo, an make dem come good.

14-29 ✡6:14-29: Matt 16:14; Mark 8:28; Luke 9:19✡6:14-29: Luke 3:19-20Dat time, King Herod wen steal his braddah Philip wife Herodias, an marry her. But John Da Baptiza Guy stay tell him, “You not suppose to steal yoa braddah wife.” Az why Herod bus John an throw him in da prison.

Herodias stay piss off wit John, an like kill um, but she no can. Herod, he sked John, az why. He know dat John one guy dat erytime do da right ting, cuz he all out fo God. Dass why Herod no let nobody hurt John. Wen Herod lissen John, Herod come all mix up, but still yet he like lissen him.

An den, Herod birfday time come. Herod throw one big luau. He tell all da high makamaka guys from his palace, da army officers, an all da leada guys from Galilee fo come. Herodias girl come inside da place an dance, an Herod an all da odda guys like da dance.

So King Herod tell da girl, “Eh, wateva you like, I swea to God I goin give um to you. I even give you half a eryting I get cuz I da king!”

She go out an tell her muddah, “Wat I goin tell?”

An da muddah tell her, “Go tell um fo give you John Da Baptiza Guy head!”

Da girl go back inside real fas by da king an tell him, “I like you give me John Da Baptiza Guy head on top one big plate right now!”

Da king come real sorry. But cuz he wen swea to God in front all his frenz, he no like tell no. Az why right den an dea he tell da guard guy fo go an cut off John head an bring um. Da guy go an cut off John head inside da prison. He bring da head on top one big plate an give um to da girl. An she give um to her muddah. Den da guys John teach, dey hear bout dat, an dey come, an take his body an put um inside one tomb.

Laytas, King Herod hear bout all da stuff Jesus stay do, cuz erybody hear bout him. Some peopo tell, “John Da Baptiza Guy come back alive. Dass why dis guy Jesus get powa inside him fo do all dis awesome kine stuff.”

Some odda peopo tell, “Nah, he Elijah.”

An odda peopo tell, “He anodda guy dat talk fo God, jalike da guys dat wen talk fo God long time befo time.”

But wen King Herod hear dat, he tell, “Eh, I wen tell my guys fo go chop off John head. But now he stay come back alive!”

30 Afta dat, da guys Jesus wen sen all ova da place come back an come by Jesus. Dey tell um all da stuff dey wen do an wat dey wen teach da peopo. 31 But had choke plenny peopo stay come an go. Jesus dem neva have chance fo eat. So he tell his guys, “Eh, come! We go one place wea nobody stay fo res ova dea litto bit.”

32 So dey go ova dea inside da boat.

33 But choke plenny peopo see um stay going, an dey know who Jesus, so dey run from da towns an get dea befo da guys in da boat get dea. 34 ✡6:34: Census 27:17; 1Kings 22:17; 2Rec 18:16; Ezek 34:5; Matt 9:36Wen Jesus get outa da boat, he see all da peopo. He get pity fo dem, cuz dey jalike da sheeps dat no mo one sheep guy fo take kea dem. Right den an dea he start fo teach um plenny stuff. 35 Wen da sun go down, Jesus guys come by him an tell, “Wow! Pau hana time awready! An no mo notting fo eat ova hea. 36 Go tell da peopo, ‘Go to da towns, an buy someting fo eat!’ ”

37 But Jesus tell um, “Nah! Dey no need go. You guys, you give um someting fo eat.”

Dey tell, “Us gotta work eight month fo make da money fo buy enuff bread fo feed all dese peopo! You like us guys go buy um?”

38 Jesus tell dem, “Go see how much bread you get.”

Dey go, an come back, an tell, “Get five bread an two fish.”

39 He tell, “Tell all da peopo fo sit down on top da green grass, 40 fifty peopo hea, hundred peopo dea.” So dey sit down. 41 Den Jesus take da five bread an da two fish. He look up to da sky, an tell God he get one good heart fo give da peopo food. Den he broke up da bread an give um to his guys, an da guys give um to da peopo. An he broke up da two fish fo erybody. 42 Dey all eat an come full. 43 His guys pick up twelve big baskets full wit all da lefovas. 44 Had five tousan guys dea dat eat da bread.

45-46 Right den an dea Jesus tell his guys fo go inside da boat, an go Betsaida town befo he go dea. He sen all da peopo home. Wen all da peopo go way, he go up da mountain fo pray. 47 Wen dark time come, no mo nobody stay dea on da land by him. Da boat go out in da middo a da lake. 48 He spock his guys stay trying fo row da boat, but dey no can, cuz da wind stay blow hard. Real early in da morning Jesus come by dem. He stay walking on top da watta. He ack jalike he goin pass by dem. 49-50 Wen dey spock him stay walking on top da watta, dey figga he one ghost. Dey yell cuz dey real sked!

Right den an dea he tell um, “Eh! Come strong! Dis me! No need come sked!” 51 Den he climb inside da boat wit dem, an da wind die down. Da guys, dat blow dea mind! 52 Dey neva undastan how he wen feed all da peopo bread, cuz dey real hard head.

53 Den Jesus dem all go da odda side a da lake, an dey throw da anchor out by Gennesaret town. 54 Dey climb outa da boat, an da peopo ova dea know who Jesus. 55 So dey run all ova da place fo bring da sick peopo on top dea mats to wea dey hear Jesus stay. 56 Wea eva Jesus go, in da big an small towns, an da country side, dey take da sick peopo by da open market place. An dey beg him come fo da sick peopo touch his clotheses. An all da peopo dat touch him come good.