Jesus Sen His Twelve Guys All Ova
(Matthew 10:5-15; Mark 6:7-13)
1 Jesus tell his twelve guys fo come togedda, an he give um da right an da powa fo make all da bad kine spirits let go peopo, an make all kine sick peopo come good. 2 Den he sen um all ova fo tell erybody bout how dey can get God fo dea king, an fo make da sick peopo come good. 3 He tell um, “No take notting fo da trip; no stick fo walk, no bag, no bread, no money, no extra clotheses. 4 Wen you guys go somebody house, stay dea till you go way from dat town. 5 ✡ 9:5: JGuys 13:51✡ 9:5: Luke 10:4-11If da peopo inside da town no like you guys come, an no like lissen wat you guys teach, den wen you guys go outa da town, shake da dus off yoa feet fo show da peopo dea dat God no like if dey no lissen.” 6 So da guys go out an go from one small town to anodda, an dey teach da Good Stuff From God, an make da sick peopo all ova da place come good.
King Herod Come All Mix Up
(Matthew 14:1-12; Mark 6:14-29)
7 ✡ 9:7: Matt 16:14; Mark 8:28; Luke 9:19Dat time King Herod wen hear bout all dat stay happen. An he come all mix up, cuz some peopo tell John Da Baptiza Guy come back alive. 8 Odda peopo tell dat Elijah show up. An oddas tell dat one guy dat talk fo God long time befo time come back alive. 9 Herod tell, “I wen make my army guys cut off John head. Den who dis guy? I stay hear bout all da kine stuff he do.” An Herod like see Jesus.
Jesus Feed Five Tousand Guys
(Matthew 14:13-21; Mark 6:30-44; John 6:1-44)
10 Da guys Jesus wen sen all ova da place come back, an dey tell Jesus wat dey wen do. Den he bring dem wit him an dey go way ony dem to Betsaida town. 11 But all da peopo hear dat Jesus dem stay ova dea, az why dey go dea too. Jesus give da peopo his aloha. He tell um bout how dey can get God fo dea king, an he make da sick peopo come good.
12 Wen da sun stay go down, da twelve guys come by him an tell, “Sen all da peopo away fo dem go da small towns an odda places aroun hea an get someting fo eat an some place fo sleep, cuz ova hea no mo notting.”
13 Jesus tell, “You guys, go give um someting fo eat.”
Dey tell, “We ony get five bread an two fish. You like us go buy food fo all dis peopo, o wat?” 14 (Had bout five tousan guys ova dea.)
But he tell his guys, “Make erybody sit down, jalike fifty ova hea, fifty ova dea.” 15 His guys do dat, an erybody sit down. 16 Jesus take da five bread an da two fish. He look up da sky, an tell God “Eh God! You get one good heart fo give da peopo food!” He broke up da bread an da fish. Den he give um to his guys fo give to da peopo. 17 Dey all eat um, an come full. His guys pick up twelve big baskets an fill um up wit da lefovas.
Wat Peter Tell Bout Jesus
(Matthew 16:13-19; Mark 8:27-29)
18 One time Jesus pray in one place wea no mo nobody, an ony his guys stay dea wit him. He tell um, “So! Who da peopo figga me?”
19 ✡ 9:19: Matt 14:1-2; Mark 6:14-15; Luke 9:7-8Da guys tell, “Some guys tell you John Da Baptiza Guy. Odda guys tell Elijah. An odda guys tell you one guy dat talk fo God long time befo time, an now you come back alive.”
20 ✡ 9:20: John 6:68-69He aks dem, “Kay den, wat bout you guys? Who you guys figga me?”
Peter tell, “You da Christ Guy, da Spesho Guy God Wen Sen.”
Jesus Tell Um He Gotta Mahke
An Come Back Alive
An Come Back Alive
(Matthew 16:20-28; Mark 8:31–9:1)
21 Jesus tell um, “You guys betta not tell nobody dat I da Christ Guy, da Spesho One God wen sen.” 22 He tell, “I da Fo Real Kine Guy. I gotta suffa plenny. Da older leadas, an da Main Pries guys, an da teachas dat teach da Rules From God, dey goin figga I not Da Fo Real Kine Guy, an dey goin kill me fo dat. But day numba three, I goin come back alive.”
23 ✡ 9:23: Matt 10:38; Luke 14:27Den he tell all dem, “Whoeva like stay tight wit me, dey gotta make up dea mind dat dey no goin be da one in charge a dem no moa. Goin be hard, jalike dying on top one cross ery day. An den dey can stay tight wit me. 24 ✡ 9:24: Matt 10:39; Luke 17:33; John 12:25If bodda you dat you goin mahke, fo shua you goin mahke. But if you like do eryting you do fo me, an no bodda you if you mahke fo dat, den you goin live fo real kine. 25 Poho fo one guy get eryting inside dis world, but in da end he lose his life, an come all hamajang. 26 If one guy come shame a me an da tings I tell, den me, da Fo Real Kine Guy, I goin come shame a him wen I come back. Dat time I goin be awesome jalike my Faddah, wen I come back wit my spesho angel guys. 27 Dass true, wat I tell you guys: Some a da peopo dat stay hea now, dey no goin mahke befo dey see how stay wen God da king.”
Jesus Come Diffren
(Matthew 17:1-8; Mark 9:2-8)
28 Bout one week layta, Jesus take Peter, John, an James wit him up one mountain fo pray. 29 Wen he stay pray, his face change an he look real diffren. His clotheses come bright jalike da lightning. 30 Right den an dea two guys, Moses an Elijah, come outa no wea, an dey stay talk wit Jesus! 31 Dey awesome. Dey talk bout how Jesus goin do eryting dat God make one plan fo him do, cuz pretty soon he goin mahke Jerusalem side. 32 Peter an his frenz go sleep. But wen dey wake up, dey see Jesus, an da two guys dat stan dea wit him. An Jesus look awesome. 33 Wen da two guys start fo go way from Jesus, Peter tell him, “You know wat, Boss? Good we stay ova hea! We goin make three shacks, one fo you, one fo Moses, an one fo Elijah!” (He neva know wat he stay talk bout.)
34 Wen Peter still stay talking, one cloud come an cova um. Jesus guys come real sked. 35 ✡ 9:35: Isa 42:1; Matt 3:17; 12:18; Mark 1:11; Luke 3:22✡ 9:35: 2Pet 1:17-18Den one voice from inside da cloud tell, “Dis my boy, da One I wen sen. Lissen up wat he tell!”
36 Wen da voice pau talk, ony Jesus stay dea. Dat time da guys he stay teach neva tell nobody bout wat dey wen see.
Jesus Make One Bad Kine Spirit
No Bodda One Boy No Moa
No Bodda One Boy No Moa
(Matthew 17:14-18; Mark 9:14-27)
37 Da nex day dey go down from da mountain, an plenny peopo come fo meet Jesus. 38 One guy yell, “Teacha! I beg you, look my boy, my ony boy! 39 Erytime one bad kine spirit take um ova, right den an dea he yell, an roll aroun on top da groun, an foam come outa his mout. Da bad kine spirit hurt him erytime, an no like let him go. 40 I wen beg yoa guys fo throw um out, but dey no can.”
41 Jesus tell, “You guys! Nowdays nobody even trus God! You guys ony know how fo do wrong stuff! How long I gotta be wit you guys an take how you guys ack? Bring da boy ova hea!”
42 Wen da boy stay come, da bad spirit throw him down on top da groun an da boy shake all ova. But Jesus scold da bad spirit, an make da boy come good, an give him back to his faddah. 43 Dat blow da peopo mind wen dey see da awesome powa God get.
Jesus Tell One Mo Time
Dat He Goin Mahke
Dat He Goin Mahke
(Matthew 17:22-23; Mark 9:30-32)
Da peopo still tink plenny bout all da stuff Jesus stay do, an he tell his guys, 44 “No foget wat I goin tell you now! I da Fo Real Kine Guy. But goin get one guy goin set me up an turn me ova to some odda guys.” 45 But Jesus guys donno wat dat mean. God no let dem undastan till layta, an dey sked fo aks Jesus bout dat.
Who Da Numba One Guy?
(Matthew 18:1-5; Mark 9:33-37)
46 ✡ 9:46: Luke 22:24Jesus guys start fo make argue bout who da numba one guy. 47 Jesus know wat dey tink, so he tell one small kid fo stan by him. 48 ✡ 9:48: Matt 10:40; Luke 10:16; John 13:20Den he tell um, “Whoeva take in one small kid jalike dis kid cuz da kid my guy, dat guy take me in too. An whoeva take me in, dey take in da One dat wen sen me too. Da guy dat make jalike he small, he da one dat big fo real kine.”
Whoeva Not Agains You, Dey Fo You
49 John tell, “Boss, we wen spock one guy dat make da bad kine spirits no bodda da peopo no moa, an da guy use yoa name fo do um. We tell him fo no do dat, cuz he no come from us guys.”
50 Jesus tell him an da odda guys, “No stop him, cuz whoeva not agains you, dey fo you.”
Da Peopo Inside One Small Town
Inside Samaria No Like Jesus
Inside Samaria No Like Jesus
51 Da time stay nea wen Jesus goin go up to da sky, an he make up his mind fo go Jerusalem. 52 He sen some messenja guys fo dem get tings ready fo him. Dey go inside one small town Samaria side fo find one place fo stay dat nite. 53 But da peopo ova dea, dey no like fo him stay dea, cuz he goin go Jerusalem, an dey no like Jerusalem peopo. 54 ✡ 9:54: 2Kings 1:9-16Wen his guys James an John see dat, dey tell him, “Boss, you like us tell God fo sen down fire from da sky fo kill um?” 55 But Jesus turn aroun an scold James an John. 56 An dey go anodda small town.
Da Guys Dat Tell Dey Like Go Wit Jesus
57 Jesus dem stay walk down one road, an one guy tell um, “I goin go wit you wea eva you go.”
58 Jesus tell him, “Da foxes get hole fo house, an da birds get nes. But me, Da Fo Real Kine Guy, I no mo no place fo lay down.” 59 He tell anodda guy, “Go come wit me. Be my guy.”
But da guy tell, “Firs let me go bury my faddah.”
60 Jesus tell, “You gotta let da guys dat no mo life inside bury dea mahke guys. But you, go tell da peopo how dey can get God fo dea king.”
61 ✡ 9:61: 1Kings 19:20Anodda guy tell, “Boss, I goin go wit you, but firs let me go back fo tell my ohana goodbye.”
62 Jesus tell, “Da guy dat stay plow da field, no good he look back fo see how he wen plow cuz goin come kapakahi how he plow. Dat kine guy no good fo work fo God da King.”
✡9:5 9:5: JGuys 13:51
✡9:5 9:5: Luke 10:4-11
✡9:7 9:7: Matt 16:14; Mark 8:28; Luke 9:19
✡9:19 9:19: Matt 14:1-2; Mark 6:14-15; Luke 9:7-8
✡9:20 9:20: John 6:68-69
✡9:23 9:23: Matt 10:38; Luke 14:27
✡9:24 9:24: Matt 10:39; Luke 17:33; John 12:25
✡9:35 9:35: Isa 42:1; Matt 3:17; 12:18; Mark 1:11; Luke 3:22
✡9:35 9:35: 2Pet 1:17-18
✡9:46 9:46: Luke 22:24
✡9:48 9:48: Matt 10:40; Luke 10:16; John 13:20
✡9:54 9:54: 2Kings 1:9-16
✡9:61 9:61: 1Kings 19:20