John Da Baptiza Teach Da Peopo
(Matthew 3:1-12; Mark 1:1-8; John 1:19-28; Isaiah 40:3-5)
1 Afta da Big King Tiberius was king fo Rome fifteen year, get
Pontius Pilate da territorial govna from Rome fo Judea,
Herod da small kine king inside Galilee,
Herod braddah Philip da small kine king inside Iturea an Trakonitis,
Lysanias da small kine king inside Abilene, 2 an
Annas an Kaiafas da Main Pries Guys fo da Jew guys.
Dat time da guy John, Zekariah boy, stay ova dea inside da boonies. Den God talk to him. 3 So he go all ova da place aroun da Jordan Riva, an tell da peopo, “You guys, you gotta come sorry an no do all da bad kine stuff you stay do now, an no do um no moa, an get baptize. Den God goin let all you guys go an hemo yoa shame fo all da bad kine stuff you stay do.” 4 ✡ 3:4: Isa 40:3-5Dass jalike Isaiah wen tell. He one guy dat talk fo God befo time. He write down dis inside da Bible:
“One guy goin talk real loud inside da boonies,
“ ‘Eh! Make da road ready fo Da One In Charge!
Make um strait fo him!’
5 Ery valley goin come fill up,
Ery mountain an hill goin come flat.
Da crooked roads goin come strait,
An da rough kine places goin come nice.
6 An all da peopo inside da whole world
Goin see dat God goin take us
Outa da bad kine stuff we stay in.”
7 ✡ 3:7: Matt 12:34; 23:33Plenny peopo go ova dea fo John baptize um. He tell, “Eh! You guys no good, jalike one snake ohana! Who tell you guys fo run away from da bad tings dat goin happen? Cuz God had it wit all da bad kine stuff you do. He goin punish you guys fo dat! 8 ✡ 3:8: John 8:33Jalike one fruit tree give same kine fruit, you guys gotta do da kine good stuff dat show dat you no do all kine bad stuff no moa. Eh! No start fo tink, ‘Us guys can do wat us like, cuz we get Abraham fo oua main faddah.’ I stay telling you guys now, God can take dese rocks ova hea an make kids fo Abraham outa dem. 9 ✡ 3:9: Matt 7:19You guys gotta do good kine stuff! Cuz jalike awready get one guy wit one ax, all ready fo cut da tree roots. All da trees dat no make good fruit, he goin cut um down, an throw um inside da fire.”
10 Da peopo tell, “Den wat we gotta do?”
11 John tell, “Da guy dat get two coat gotta give one to da guy dat no mo coat. An da guy dat get food gotta give to da guy dat no mo food.”
12 ✡ 3:12: Luke 7:29Some guys dat colleck tax money fo da govmen come fo John baptize dem too. Dey tell him, “Teacha, wat we gotta do?”
13 He tell um, “No take mo money den you suppose to take.”
14 Some army guys tell him, “An wat us gotta do?”
He tell, “No push nobody fo give you guys money. No tell nobody dey get da blame fo someting dey neva do. Stay good inside wit da kine pay you get.”
15 Da peopo stay wait fo da Spesho Guy God Goin Sen, an dey try fo figga if John dat guy. 16 John tell, “I baptize you guys wit watta. Dat show dat you stay sorry fo all da kine bad stuff you do. But afta me, anodda guy goin come, da Christ Guy. He way mo importan den me. An you know wat? I not importan enuff fo help him hemo his slippas. Da way he goin baptize you guys, jalike he goin give you God Spirit fo take ova you, jalike he goin baptize you guys wit fire. 17 Dat mean, da Christ Guy goin punish da peopo dat stay do bad kine stuff. Jalike one farma guy put da wheat inside da basket an let da wind blow out all da junk kine stuff from da wheat, den he put da wheat inside da storage place. Afta dat, he burn da junk kine stuff.”
18 John tell da peopo plenny mo stuff fo help dem trus da Good Stuff From God. 19 ✡ 3:19: Matt 14:3-4; Mark 6:17-18But John scold Herod, da small kine king ova dea, cuz Herod steal his braddah wife Herodias an marry her. Herod do mo plenny bad kine stuff. 20 An one ting mo worse, Herod throw John inside da prison!
John Baptize Jesus
(Matthew 3:13-17; Mark 1:9-11)
21 Had one time befo dat, wen John baptize all da peopo, an he baptize Jesus too. Afta John baptize Jesus an den Jesus stay pray, da sky open up 22 ✡ 3:22: Start 22:2; Songs 2:7; Isa 42:1; Matt 3:17; Mark 1:11; Luke 9:35an da Good An Spesho Spirit come down on top Jesus. Can see da Spirit dat time, look jalike one dove. An wow! Get one voice from da sky tell, “You my Boy. I fo real kine get love an aloha fo you, an I stay good inside cuz a you.”
23 Wen Jesus start fo teach, he was bout thirty year ol. Da peopo tink he Joseph boy. Joseph, he Heli boy; 24 Heli, he Mattat boy; Mattat, he Levi boy; Levi, he Melki boy; Melki, he Jannai boy; Jannai, he Joseph boy; 25 Joseph, he Mattatias boy; Mattatias, he Amos boy; Amos, he Nahum boy; Nahum, he Esli boy; Esli, he Naggai boy; 26 Naggai, he Maat boy; Maat, he Mattatias boy; Mattatias, he Semein boy; Semein, he Josek boy; Josek, he Joda boy; 27 Joda, he Joanan boy; Joanan, he Resa boy; Resa, he Zerubbabel boy; Zerubbabel, he Shealtiel boy; Shealtiel, he Neri boy; 28 Neri, he Melki boy; Melki, he Addi boy; Addi, he Cosam boy; Cosam, he Elmadam boy; Elmadam, he Er boy; 29 Er, he Joshua boy; Joshua, he Eliezer boy; Eliezer, he Jorim boy; Jorim, he Mattat boy; Mattat, he Levi boy; 30 Levi, he Simeon boy; Simeon, he Judah boy; Judah, he Joseph boy; Joseph, he Jonam boy; Jonam, he Eliakim boy; 31 Eliakim, he Melea boy; Melea, he Menna boy; Menna, he Mattata boy; Mattata, he Nathan boy; Nathan, he David boy; 32 David, he Jesse boy; Jesse, he Obed boy; Obed, he Boaz boy; Boaz, he Salmon boy; Salmon, he Nashon boy; 33 Nashon, he Aminadab boy; Aminadab, he Admin boy; Admin, he Arni boy; Arni, he Hezron boy; Hezron, he Perez boy; Perez, he Judah boy; 34 Judah, he Jacob boy; Jacob, he Isaac boy; Isaac, he Abraham boy; Abraham, he Terah boy; Terah, he Nahor boy; 35 Nahor, he Serug boy; Serug, he Reu boy; Reu, he Peleg boy; Peleg, he Eber boy; Eber, he Shelah boy; 36 Shelah, he Cainan boy; Cainan, he Arfaxad boy; Arfaxad, he Shem boy; Shem, he Noah boy; Noah, he Lamek boy; 37 Lamek, he Metuselah boy; Metuselah, he Enok boy; Enok, he Jared boy; Jared, he Mahalaleel boy; Mahalaleel, he Cainan boy; 38 Cainan, he Enos boy; Enos, he Seth boy; Seth, he Adam boy; Adam, he God boy.
✡3:4 3:4: Isa 40:3-5
✡3:7 3:7: Matt 12:34; 23:33
✡3:19 3:19: Matt 14:3-4; Mark 6:17-18
✡3:22 3:22: Start 22:2; Songs 2:7; Isa 42:1; Matt 3:17; Mark 1:11; Luke 9:35