42
Da Guy Dat Work Fo Da One In Charge
(Matthew 3:17; 12:18-21; 17:5; Mark 1:11; 9:7; Luke 3:22; 9:35; 2 Peter 1:17)
“Dis da guy dat work fo me.
I kokua him.
He da guy I pick awready.
I feel good inside cuz a him.
My Spirit stay inside him.
He goin do wass right
Fo all da peopo inside da diffren countries.
2 He no goin yell o talk loud
O make big noise on top da streets.
3 Wen somebody crush one bamboo litto bit,
He no goin broke um,
He goin give chance.
Wen one candle almos pau burn,
He no goin pio um.
You can trus him
Fo judge peopo da right way erytime.
4 He no goin hold back o lose fight,
Cuz he goin make shua da peopo all ova da world
Goin judge da right way erytime.
Da peopo dat live on top da islans goin wait
Fo hear da rules he goin teach um.”
5 ✡42:5: JGuys 17:24-25Dis wat God, Da One In Charge, tell,
Da One wen make da sky an stretch um out.
Da One stay spread out da world an eryting dat come out from da groun.
He make da peopo on top da earth breave.
He make erybody dat walk on top da earth stay alive.
He tell da spesho guy dat work fo him,
6 ✡42:6: Isa 49:6; Luke 2:32; JGuys 13:47; 26:23“Me, Da One In Charge, I da One
Do right wen I call you.
I goin hold yoa hand fo make you stay strong.
I goin take kea you.
I goin make you fo be da one
Fo make one deal fo all da peopos,
An fo be jalike one light
Fo all da nations.
7 Wen I tell ‘light,’ dis wat I mean:
Jalike you goin open da eyes
Fo peopo dat no can see,
Jalike you goin take out da peopo
Inside one prison unda da groun,
Da ones dat stay inside one dark place.
8 “Me, Da One In Charge.
Dass my name—‘Da One Dat Stay’!
I no goin let nobody tink
Dey awesome jalike me.
I no goin let da peopo tell good kine stuff
Bout da idol kine gods
Jalike dey tell bout me.
9 All da stuff from befo time, happen awready.
Now, goin get new kine stuff,
An I da One tell bout um.
Befo watevas start fo happen,
I let you guys hear bout um.
Jalike da seed stay inside da groun awready
Befo da plant start fo grow.”
Sing Good Stuff Bout Da One In Charge
10 Sing one new song fo Da One In Charge!
Sing from da mos far places inside da world
Fo tell dat he da greates!
Sing, you peopo dat go work on da ocean
An eryting dat live inside da ocean, you sing too!
Sing, you islans,
An da peopo dat live on top um!
11 Sing, you peopo dat live
Inside da towns in da boonies.
Let da peopo stay good inside
Dat live in da small towns
Wea da Kedar ohana peopo stay.
Let da peopo inside Sela town yell
Cuz dey stay good inside.
Let dem call real loud
From da top a da mountains.
12 Let dem tell how awesome Da One In Charge.
On top da islans, let dem tell
Good stuff bout him!
13 Da One In Charge, he goin out fo fight
Jalike one strong army guy.
Jalike one army guy he stay ready fo fight,
An he yell.
He stay huhu, an he yell fo start fo fight
Da guys dat stay agains him,
An he goin be da winna ova dem!
14 Da One In Charge tell, “From long time I no say notting.
I stay quiet an no talk.
But now, time fo me talk strong,
Jalike one wahine wen she born one bebe,
An she make plenny noise,
An breave hard, jalike no can get enuff air.
15 I goin bus up da mountains an hills,
An make eryting dat grow on top dem come all dry.
I goin make da rivas come down low
Fo dem get islans in da middo.
I goin dry up all da ponds.
16 I goin take da guys dat no can see
On top one road dey neva know befoa.
I goin show um wea fo go
No matta dey donno da way.
No matta stay dark all aroun dem,
I goin shine light come in front dem.
I goin make da rough kine place come smooth.
All dese tings, I goin do um.
I no goin leave dem.
17 But da peopo dat trus da idol kine gods
An tell da metal statues, ‘You oua gods,’
Dey goin go back, dey no goin come by me!
Dey goin come plenny shame!”
Da Israel Peopo,
Jalike Dey No Can See O Hear
Jalike Dey No Can See O Hear
18 “Lissen, you peopo dat no can hear!
Look fo you see, you peopo dat no can see!
19 Wen I talk bout somebody dat no can see,
Who you tink I stay talking bout?
I stay talking bout my peopo dat work fo me!
Wen I talk bout somebody dat no can hear,
Dey da ones I stay sen fo tell my message!
Da ones dat get one deal wit me,
Fo me make eryting come good fo dem,
Dey no see dat.
Dey suppose to work fo me,
But dey no see notting.
20 No matta you see plenny stuff,
You foget wat you see.
No matta yoa ears stay open,
You no hear notting.”
21 Fo real, Da One In Charge wen like make da Rules he teach importan an awesome.
Dat make him feel good inside
An show erybody dat he stay do da right kine ting.
22 But dis Israel peopo,
Odda peopo wen rip off an steal
An take away dea stuffs.
Jalike all a dem stay down
Inside one deep hole an no can come out,
O peopo hide um inside da jail.
Odda peopo make dem dea slave,
An no mo nobody fo get dem outa dea.
No mo nobody fo tell,
“Give back da stuffs you wen rip off!”
23 Wat one a you guys goin lissen wat I tell?!
Who goin lissen good
An den do someting bumbye?
24 Wat god wen let da odda guys
Take da Jacob ohana an rip um off?!
No was anodda god!
Wat god wen let peopo
Go take da Israel peopo stuffs?!
No was anodda god!
Was Da One In Charge let um do dat!
An was us Israel peopo
Dat wen do bad kine stuff agains him!
Oua peopo neva like do notting
Da way he tell us fo do.
Dey no like lissen his Rules.
25 So, dass how come Da One In Charge wen come real huhu
Wit da Israel peopo, an punish dem.
He make odda peopo go make war agains dem.
Da war jalike get fire all aroun dem,
But dey still yet no undastan!
Da fire wipe dem out,
But dey still yet no tink!
✡42:1 42:1: Matt 3:17; 17:5; Mark 1:11; Luke 3:22; 9:35
✡42:1 42:1: Matt 12:18-21
✡42:5 42:5: JGuys 17:24-25
✡42:6 42:6: Isa 49:6; Luke 2:32; JGuys 13:47; 26:23