John Da Baptiza Guy Wen Mahke
(Mark 6:14-29; Luke 9:7-9)
1 Dat time, King Herod hear bout all da stuff Jesus stay do. 2 He tell his worka guys, “I figga, dis guy gotta be John Da Baptiza. He wen mahke, an now he come back alive. Dass why he get da powa fo do all dis awesome kine stuff.”
3 ✡ 14:3: Luke 3:19-20Dis wat wen happen. Befo time, you know, Herod wen tell his guys fo grab John, chain um up, an throw um inside da prison. Herod do dat cuz a Herodias, his braddah Philip wife. 4 ✡ 14:4: Pries 18:16; 20:21Az cuz John wen tell him plenny time, “Da Rules From God tell, ‘You no can marry yoa braddah wife.’ ” 5 An cuz a dat, Herod like kill him, but den, he sked da peopo, cuz dey all figga John talk fo God.
6 Den Herod go make one big party fo his birfday. Herodias girl dance in front erybody, an Herod like da dance plenny. 7 He tell her, “Wateva you like, I swea to God I goin give um to you.” 8 Her muddah tell her, “Try go aks fo John Da Baptiza head on top one big plate!” So she go do wat her muddah tell her fo do.
9 Dis ting she aks fo bodda King Herod real plenny. But he wen swea to God in front all his frenz, so he tell his guys, “Go do um.” 10 So den dey chop off John Da Baptiza head inside da prison. 11 Dey put his head on top da big plate, an give um to da girl. Den she take um to her muddah. 12 Da guys dat John stay teach come an take his body an bury him. Den dey go tell Jesus wat wen happen.
Jesus Feed Five Tousand Guys
(Mark 6:30-44; Luke 9:10-17; John 6:1-14)
13 Wen Jesus find out wat happen to John, he go inside one boat fo go one place wea nobody stay. Plenny peopo from all da towns aroun dea find out wea he wen go fo dem go dea too. 14 Wen Jesus go outa da boat, he spock all da peopo. He get pity fo dem, an he make all da sick guys ova dea come good.
15 Wen da sun stay going down, his guys come by him an tell, “Pau hana time awready! An ova hea no mo notting fo eat. Tell da peopo fo go way: Tell um, ‘Go inside da towns fo buy someting fo eat!’ ”
16 But Jesus tell um, “Nah! Dey no need go way. You guys, you give um someting fo eat.”
17 Dey tell, “We no mo notting. Ony get five small breads an two fish.”
18 He tell, “Give um to me.” 19 He tell all da peopo fo sit down on top da grass. An dey sit down. He take da five breads an da two fish, an look up to da sky, an tell, “Eh God! You get one good heart fo give us guys all dis!” He broke up da bread, an give um to his guys, an da guys give good piece bread to all da peopo. 20 Dey all eat an come full. His guys pick up twelve big baskets full wit all da lefovas. 21 Had five tousan guys dea dat eat da bread, plus had wahines an kids too.
Jesus Walk On Top Da Watta
(Mark 6:45-52; John 6:15-21)
22 Right den Jesus tell his guys fo go inside da boat, an go da odda side a da lake befo him. He tell all da peopo fo go home. 23 Afta he tell um fo go, he go up on top da mountain fo pray. Wen come dark, no mo nobody stay by him ova dea. 24 Da boat stay in da middo a da lake, an da wind stay blow real hard on dem, an da waves stay rock da boat. 25 Early, real early in da morning, Jesus come by dem, walking on top da watta. 26 His guys spock him stay walking on top da watta, an dey come sked an yell, “Eh, get one ghost!”
27 Right den an dea Jesus tell um, “Eh, no sked. Dis ony me! Come strong!”
28 Peter tell, “Boss, if dass you, tell me fo go by you on top da watta.”
29 Jesus tell, “Go come.”
Peter climb outa da boat, an walk on top da watta fo go by Jesus. 30 But wen he see how da wind was, he come sked, an start fo go down inside da watta. Den he yell, “Eh, Boss! Get me outa dis!” 31 Right den an dea Jesus put out his hand an grab him, an tell, “How come you trus me ony litto bit? How come you tink you no can do um?” 32 Wen dey go back inside da boat, an right den an dea, da wind die down. 33 Den da guys inside da boat go down in front him, an tell, “Wow! Fo real, you God Boy!”
Jesus Make Da Sick Guys Come Good
34 Den dey all go da odda side a da lake, an come by Gennesaret town. 35 Da peopo ova dea know who Jesus, an dey run all ova da place fo bring da sick peopo by him. 36 Dey beg him fo let da sick guys touch his clotheses. All da guys dat touch his clotheses come good.
✡14:3 14:3: Luke 3:19-20
✡14:4 14:4: Pries 18:16; 20:21