Da Plant Seed Story
(Mark 4:1-9; Luke 8:4-8)
1 Same day Jesus go outside da house, an sit down nea da lake fo teach. 2 ✡ 13:2: Luke 5:1-3Plenny peopo come aroun him, so he go inside one small boat, an sit down dea. Da peopo, dey stay stan on top da beach. 3 He tell plenny stories fo teach um. Dis wat he tell,
“You guys hear da farma guy story, da one he go plant seed. 4 He throw da wheat seeds fo plant. Some fall down by da side a da trail, an da birds go eat um up. 5 Some fall down on top da rocks wea ony get litto bit dirt. But dey grow up fas, cuz ony litto bit dirt dea. 6 Wen da sun come up, da plants burn, an dry up, cuz no mo deep root. 7 Odda seed, dey fall down inside da kine bushes wit stickas. Da bushes grow an choke da plants. 8 Odda seed, dey fall down inside da good dirt, an dey grow good, an come up plenny. Some seed, dey make thirty times mo seed, some odda seed make sixty times mo seed, an odda even make hundred times mo seed.” 9 Jesus tell, “If you guys hear dis, den lissen up real good!”
How Come Jesus Tell Stories Fo Teach
(Mark 4:10-12; Luke 8:9-10; Isaiah 6:9-10)
10 Da guys Jesus stay teach come by him, an tell, “How come you tell stories fo teach da peopo lidat?”
11 He tell, “God let you guys know all da stuff bout how he stay king in da sky. But da odda guys, he no let dem know all dat kine stuff. 12 ✡ 13:12: Matt 25:29; Mark 4:25; Luke 8:18; 19:26If you guys undastan all dat kine stuff, den God goin make you know moa, plenny moa. But if you guys no like know all dat stuff, den even da litto bit you know, he goin take um away. 13 Dass why me I tell stories fo teach um, cuz jalike da Bible tell,
“ ‘Dey see, but dey no can see fo real.
Dey hear, but dey no can hear fo real.
An dey no undastan.’
14 ✡ 13:14: Isa 6:9-10“Dey ack jalike da guys Isaiah talk bout befo time. He tell,
“ ‘You guys goin hear,
But you no goin undastan.
You guys goin see,
But you guys no goin see fo real.
15 Cuz dis peopo get hard head,
Dea ears no can hear good,
Dey close dea eyes,
Cuz dey no like see fo real kine,
Dea ears, dey no like hear fo real kine,
Inside dem, dey no like undastan notting.
Dey no like change da way dey live,
Fo me make um come good.’
“Dass wat God tell.
16 ✡ 13:16: Luke 10:23-24“But you guys, you stay good inside cuz yoa eyes can see fo real an yoa ears can hear fo real. 17 Dass fo shua. An I like tell you guys dis too: Long time befo time plenny guys dat talk fo God an plenny guys dat do da right tings like see da stuff you guys see, but neva see um. An dey like hear da stuff you guys hear, but neva hear um.
Wat Da Story Mean
(Mark 4:13-20; Luke 8:11-15)
18 “Lissen up! Dis wat da farma story mean. 19 Any guy hear da stuff bout da King in da sky, an no undastan, da Bad Guy come an take away da stuff dat da guy wen hear dat stay inside him. Dass jalike da seed dat fall down by da trail. 20 Da seed dat fall down on top da rocks, dass jalike one guy dat hear da Good Kine Stuff, an he trus wat God tell him right den an dea, an he stay good inside. 21 But da guy, he no mo deep root. He stay tight wit um fo short time, but wen da odda guys make him suffa cuz he trus da stuff he hear, he give up. 22 Da seed dat fall down inside da kine bushes wit stickas, dass jalike one guy dat hear wat God tell, but bumbye he all bodda bout all da kine stuff he need hea inside da world. He like come rich, an dat throw him off. Az how all dat stuff choke da stuff God tell dat was inside him. He no can do da right tings, jalike one plant inside da kine bushes wit stickas dat no can give wheat. 23 Da seed dat fall down inside da good dirt, dass jalike one guy dat hear wat God tell an undastan um. He do da right tings, jalike da good plant dat give wheat. Da good stuff dat guy do, he goin do good stuff hundred times moa, anodda guy sixty times moa, an anodda guy thirty times moa.”
Da Weeds Story
24 Jesus tell anodda story fo teach da peopo. He tell, “Wen God in da sky stay King, dass jalike wen one farma plant good seed inside his field. 25 But wen erybody stay sleep, one guy dat stay agains him go ova dea wea da wheat seed stay planted, an plant weeds, an bag. 26 Wen da plants come up an make wheat, same time da weeds come up, but den can tell da weed diffren from da wheat. 27 Da guys dat work fo da owna go by him an tell, ‘Eh boss, da seeds you wen plant inside da field, was good, o wat? How come get weeds?’
28 “Da farma tell um, ‘One guy dat stay agains me wen plant um ova dea, az why.’
“Da worka guys tell, ‘You like us go pull out da weeds?’
29 “He tell, ‘No, I no like. If you guys do dat, you goin pull out da wheat too. 30 Let um grow togedda till dey stay ready. Den pull out da weeds firs, an tie um togedda fo burn. Den harves da wheat, an put um inside da storage place.’ ”
Da Mustard Seed Story
(Mark 4:30-32; Luke 13:18-19)
31 Jesus tell anodda story fo teach da peopo. He tell, “Wen God in da sky stay King, dass jalike one mustard seed. Wen one guy plant da mustard seed inside his field, 32 dat kine seed da mos smalles seed, mo small den all da odda seeds. But wen dat seed grow, da plant come big, mo big den all da odda plants, an come big jalike one tree. Get birds in da sky dat come an make dea nes inside da branches.”
Da Yeast Story
33 Jesus teach da peopo wit anodda story. He tell, “Wen God in da sky stay King, dass jalike wen one wahine take yeast an mix um wit plenny dough fo make bread. Bumbye da whole dough goin come mo big, cuz a da yeast.”
How Come Jesus Tell Stories Fo Teach
(Mark 4:33-34; Songs 78:2)
34 Jesus tell ony stories fo teach plenny peopo plenny stuff. He neva teach um wit odda kine stuffs. 35 ✡ 13:35: Songs 78:2He do um lidat fo make um happen jalike da guy dat talk fo God wen tell befo time,
“I goin tell stories fo teach,
I goin tell stuff dat nobody know
From dat time wen God make da world till now.”
Wat Da Weeds Story Mean
36 Jesus go way from da peopo, fo go inside his house. Da guys he stay teach come by him, an tell, “Dat weeds in da field story, wat dat mean?”
37 He tell, “Da farma dat plant da good seed, dass me, Da Fo Real Kine Guy. 38 Da field, dass da world. Da good seed, dass da peopo dat get God fo dea king. Da weeds, dass da peopo dat stay tight wit da Bad Guy, da Devil. 39 Da guy dat stay agains da farma an plant da bad seed, dass da Devil. Wen da plants stay ready, dass da time wen da world goin come pau. Da worka guys, dey da angel guys from da sky. 40 All dat mean, wen dey pull out da weeds an burn um inside da fire, dass jalike goin be wen da world goin come pau. 41 I da Fo Real Kine Guy, you know, an I goin sen my angel guys all ova da place wea I stay King, fo pull out all da guys dat broke da Rules From God an dat tell da odda guys fo broke da Rules too. 42 Den dey goin throw um inside wea ony get plenny fire. Ova dea dey goin cry real hard an grind dea teet cuz dey so huhu an futless. 43 Den da guys dat stay do da right tings goin stay wit dea Faddah da King, an be awesome an shine jalike da sun. If you guys hear dis, den lissen up real good!
Da Rich Stuff One Guy Bury
44 “Wen God in da sky stay King, dass jalike had rich kine stuff dat one guy bury inside one field. Get anodda guy dat find um, an den he bury um one mo time. He stay good inside. Den he sell all his stuffs fo buy dat field.
Da Pearl Story
45 “Wen God in da sky stay King, dass jalike one trader guy dat stay look fo good kine pearls. 46 He find one pearl dat cost plenny money. Den he sell all his stuffs fo buy dat pearl.
Da Net Story
47 “Wen God in da sky stay King, dass jalike wen dey lay one net inside da lake, an catch any kine fish. 48 Wen da net come full, da fishamen drag um on top da beach. Dey put da good kine fish inside one bucket, an throw out da rubbish kine fish. 49 Dass how goin be wen da world come pau. Da angel guys from da sky goin go all ova da place, an take away da bad guys from da guys dat stay do wat da Rules From God tell um fo do. 50 Dey goin throw da bad guys inside wea ony get fire. Dea dey goin cry real hard an grind dea teet cuz dey real huhu an futless.”
Da New Kine Stuff An Da Ol Kine Stuff
51 Jesus tell, “Eh! You guys undastan all da stuff I stay tell you?”
Dey tell, “Yeah, aah, we undastan.”
52 Jesus tell um, “All da teacha guys dat teach da Rules From God, an den go learn how dey can get God inside da sky fo dea King, dey jalike one rich guy dat bring out from his place new kine stuff an ol kine stuff too.”
Da Nazaret Peopo,
Dey No Mo Respeck Fo Jesus
Dey No Mo Respeck Fo Jesus
(Mark 6:1-6; Luke 4:16-30)
53 Jesus pau tell all dis kine story fo teach ova dea. Den he go way from dea. 54 He go his place Nazaret town an teach inside da Jew church ova dea. Da peopo, blow dea mind, an dey tell, “Eh, from wea he get all dese smarts? From wea he get da powa fo do all dis awesome kine stuff? 55 Dass da carpinta boy, aah? His muddah, Mary. An his braddah guys, James, Joseph, Simon, an Judas, aah? 56 His sistahs, dey stay hea wit us. So, from wea he get all dis stuff?” 57 ✡ 13:57: John 4:44Bodda dem, how he stay.
But Jesus tell um, “One guy dat talk fo God get choke respeck. But he no mo respeck notting inside his home town an inside his ohana.” 58 Az why Jesus ony do litto bit awesome stuff ova dea fo show his powa cuz dey no trus him.