Ten Girls An Da Wedding
1 ✡ 25:1: Luke 12:35“Dat time, wen God in da sky stay King, goin be jalike dis: Had one wedding. Da bride get ten girl frenz. Dey take dea olive oil lamps an go dea fren house fo wait fo da groom. 2 Five a dem smart, an da odda five stupid. 3 Da girls dat stupid, dey take dea lamps, but den, dey no take olive oil wit dem fo burn. 4 Da smart girls, dey take dea lamps, an dey take plenny olive oil wit dem. 5 But da groom neva come yet, an all da girls like go sleep. 6 Midnite, somebody yell, ‘Eh! Da groom stay come! Go come outside fo meet him!’
7 “All da girls get up fo make dea lamps ready. 8 Da girls dat stupid tell da odda girls, ‘Eh, you guys get mo olive oil den us. Try give us some! Da fire inside oua lamps, goin pio.’
9 “Da smart girls tell, ‘No can! No mo enuff fo erybody, ony fo us. Eh, go buy from da guys dat sell um.’ 10 So da stupid girls go fo buy some mo olive oil. Den da groom come by da smart girls. Dey was ready, an dey go wit him to da wedding party. An da groom peopo shut da door.
11 ✡ 25:11: Luke 13:25“Bumbye, da odda girls come back. Dey tell, ‘Eh, Mista, open da door fo us!’
12 “But da guy tell um, ‘No way! I donno you guys.’ ”
13 Den Jesus tell, “Eh! Az why I stay tell you guys, watch an stay ready! Cuz you donno da day o da time, wen me, da Guy Dass Fo Real, goin come back!”
Three Worka Guys An Da Money
14 ✡ 25:14: Luke 19:11-27Jesus tell da peopo, “Dat time wen God stay king, goin be jalike dis: Had one guy, he goin go on one trip to one far place. Befo he go, he tell his worka guys, ‘Go come. I like you guys take kea all my stuffs fo me.’ 15 He put one guy in charge a five bag money, anodda guy two bag money, an anodda guy one bag money, cuz he know how much all dem can handle. Den he go way.
16 “Da guy dat get da five bag money go use um fo make biznis, an get five mo bag money. 17 Da guy dat get da two bag money do da same ting, an get two mo bag money. 18 But da guy dat get da one bag money dig one hole, an put da bag inside da groun, fo hide da boss money inside.
19 “Bumbye, da boss come back. He check out how da worka guys wen take kea all his money. 20 Da guy dat get da five bag money bring five bag mo to da boss. He tell, ‘Boss, you wen give me five bag money. Eh, try look! I make five bag mo money.’
21 “Da boss tell, ‘Eh good! You wen do good. I trus you. You do good wit ony litto bit. I goin put you in charge a plenny stuff. Go come an stay wit me. I stay good inside, an same ting, az how I like you stay good inside too.’
22 “Den da guy wit da two bag money come an tell, ‘Boss, you wen give me two bag money. Look, I make two mo bag money.’
23 “Da boss tell, ‘Eh good! You wen do good. I trus you. You wen do good wit ony litto bit. I goin put you in charge a plenny stuff. Go come an stay wit me. I stay good inside, an same ting, az how I like you stay good inside too.’
24 “Den da guy wit ony one bag money come an tell, ‘Boss, I know you one hard guy dat no fool aroun. You harves da crop wea you neva plant, an you go get da wheat wea you neva throw seed. 25 An den, I come real sked, an I hide yoa money inside one hole undaneat da groun. Hea, all yoa money I wen keep fo you.’
26 “Den da boss tell, ‘Wassamatta you?! You one no good worka! You lazy buggah! You know I like harves da crop wea I neva plant, an I like go get da wheat wea I neva throw seed. 27 You know all dat! How come you neva put my money inside da bank?! Dass how wen I come back, I get my money back, an da interes too! 28 Eh, you guys ova dea, take da money from dis guy! Give um to da guy dat awready get da ten bag money.’
29 ✡ 25:29: Matt 13:12; Mark 4:25; Luke 8:18“Cuz erybody dat get stuff goin get mo plenny. But da guy dat no mo notting, even da litto bit he get, he goin lose um. 30 ✡ 25:30: Matt 8:12; 22:13; Luke 13:28Go throw dis no good worka guy outside in da dark. Ova dea dey goin cry real hard an grind dea teet cuz dey so huhu an futless.”
Erybody Goin Stan In Front God Da Judge
31 ✡ 25:31 a: Matt 16:27; b: Matt 19:28Jesus tell um, “You know, I da Fo Real Kine Guy. Wen I come back, I goin be awesome. All da angel guys goin come wit me. Den I goin sit down on top my awesome throne. 32 All da diffren kine peopos from all ova da world goin come togedda in front me. Den I goin put some a dem on one side an some on da odda side. Goin be jalike one sheep guy put da sheeps one side an da goats da odda side. 33 Same ting, I goin put da guys dat stay do da right ting on my right side, an da odda guys on my lef side.
34 “Me, da King. Dat time I goin tell da guys on my right side, ‘Go come ova hea! My Faddah like do plenny good kine stuff fo you guys, an give you guys eryting you need. You know, wen he make da world, he awready make all dis stuff ready fo you guys, cuz I goin come yoa King. Az why all dis stuff fo you guys! Take um awready.’ 35 Cuz I was hungry an you guys give me food. I was thirsty an you guys give me someting fo drink. I wen go wea nobody know me, an you guys tell, ‘Eh, come stay oua house.’ 36 I neva had clotheses, an you guys give me clotheses. I was sick an you guys take kea me. I wen stay one prison an you guys come fo see me.
37 “Den da guys dat erytime do da right ting goin tell me, ‘Eh Boss! Wen was, dat you was hungry an we give you food? Wen was, dat you was thirsty an we give you someting fo drink? 38 Wen was, dat you wen go wea nobody know you, an us tell, “Eh, come stay oua house”? Wen was, dat you neva had clotheses, an us give you clotheses? 39 Wen was, dat you was sick o inside one prison, an us come fo see you?’
40 “Me, da King, I goin tell, ‘Dass it! I tell you guys fo shua, wateva you guys wen do fo one a my braddahs, no matta peopo tink da guy not importan, was me you guys do um fo.’
41 “Den I goin tell da odda guys on my lef side, ‘Get outa hea, you guys! God goin punish you guys! You goin go inside da fire dat stay ready fo da Devil an his angel messenja guys. An dat fire no goin pio eva! 42 You goin go dea cuz wen I was hungry you guys neva give me food. Wen I was thirsty you guys neva give me notting fo drink. 43 Wen I wen go wea nobody know me, you guys neva tell me come stay wit you. Wen I no mo clotheses, you guys neva give me notting fo wear. Wen I was sick, you guys neva take kea me. An wen I stay one prison, you guys neva even bodda fo come see me.’
44 “Den dem buggahs goin tell, ‘Eh Boss! Wen was dis, dat you was hungry, o thirsty, o sick, o in prison, an us neva come fo kokua you?’
45 “I goin tell um, ‘Dass it! I tell you guys dis fo shua: You guys neva do notting fo one guy dat you tink not importan. But was me, da one you neva do um fo!’
46 ✡ 25:46: Dan 12:2“Den wen da bad guys mahke, dey goin get punish foeva! But da guys dat erytime do da right ting, dey goin live to da max foeva!”
✡25:1 25:1: Luke 12:35
✡25:11 25:11: Luke 13:25
✡25:14 25:14: Luke 19:11-27
✡25:29 25:29: Matt 13:12; Mark 4:25; Luke 8:18
✡25:30 25:30: Matt 8:12; 22:13; Luke 13:28
✡25:31 25:31 a: Matt 16:27; b: Matt 19:28