Jesus An One Wahine From Samaria
(Start 33:19; 48:22; Joshua 24:32)
Da Pharisee guys hear dat Jesus stay baptize mo peopo den John, an dat all da peopo go wit Jesus. (But you know, Jesus no baptize um, his guys do um.) Wen Jesus know dat da Pharisee guys hear dat, he go way from Judea, an go Galilee side. But fo go Galilee, he figga mo betta go thru Samaria.
4:5: Start 33:19; Josh 24:32He go inside one town Sykar Samaria side nea da land Jacob wen give his boy Joseph long time befo time. 6-8 Was bout lunch time. Had one puka fo da watta dea, dey call um Jacob Puka. Jesus stay tired cuz he walk long time. His guys go inside town fo buy lunch, an he sit down by da puka.
Den one wahine from dat place come fo get watta. Jesus tell her, “You can give me some watta fo drink?”
4:9: Ezra 4:1-5; Neh 4:1-2Da wahine from Samaria tell um, “How come you aks me fo one drink watta?! You one Jew an I one wahine from Samaria. You know, da Jew guys no like get notting fo do wit da Samaria peopo.”
10 Jesus tell, “You donno wat God like give erybody, an you donno who me dat stay aks you fo da watta. Cuz if you know dat, den fo shua you goin aks me fo watta. An one mo ting, I can give you da kine watta dat make peopo live fo real kine foeva!”
11 She tell, “Mista, you no mo notting fo pull up da watta, an da puka stay deep. So, wea you goin get da kine watta dat make peopo live fo real kine foeva? 12 You mo betta den oua ancesta guy Jacob, o wat? He da one wen give us dis puka. Him, his kids, an his cows even drink watta from dis puka.”
13 Jesus tell, “Whoeva drink dis watta, bumbye dey goin come thirsty one mo time. 14 But whoeva drink da kine watta I goin give, dey no goin come thirsty no moa. Cuz da kine watta I goin give dem goin come jalike watta dat stay come out all da time. An dat watta goin make dem live to da max foeva!”
15 Da wahine tell, “Mista, give me dat kine watta! Den I no goin come thirsty no moa, an I no need come hea fo get watta!”
16 Jesus tell, “Go, tell yoa husban fo come, an bring um ova hea.”
17 She tell, “I no mo husban.”
Jesus tell, “Az right, you no mo husban. 18 Cuz you wen get five husbans. An da guy you get now, he not yoa husban. Az true wat you tell!”
19 Da wahine tell, “Mista, now I know fo shua you one guy dat talk fo God. 20 Us Samaria peopo, oua ancesta guys go down an pray to God on top dis mountain ova hea. But you Jew guys, you guys tell dat erybody gotta go Jerusalem fo go down an pray to God.”
21 He tell, “Sistah, trus me, I stay tell da trut. Da time goin come wen you guys goin go down an pray to God oua Faddah, but no goin be hea on top dis mountain o inside Jerusalem. 22 You guys from Samaria go down in front somebody an pray, but you guys donno who him. Us Jew guys, we go down in front God an pray, an we know wat kine God him. Cuz God show us Jew guys da ony way fo get outa da bad kine stuff we stay do. 23 Garans da time goin come, an awready stay come now, wen da peopo go down an pray to da Faddah fo real kine. Dey goin show him plenny love an respeck cuz dey stay tight wit God Spirit, an dey goin know fo shua who God. Dass da kine peopo da Faddah like, da ones dat show him plenny love an respeck. 24 God, he one spirit. So den, da peopo dat show him plenny love an respeck gotta do dat wit da powa dey get from God Spirit, an cuz dey know how God stay fo real kine.”
25 Da wahine tell, “I know fo real da Messiah goin come, da Christ Guy, da Spesho Guy God Goin Sen. Wen he come, he goin tell us eryting.”
26 Jesus tell, “Dass me, da One dat stay talk to you right now.”
27 Right den an dea Jesus guys come back. Blow dea minds dat he stay talk to da wahine. But nobody tell, “Wat you like from her?” o “How come you talk to her?”
28 Den da wahine leave her watta jar, an go back inside town. She tell da peopo ova dea, 29 “Try come! Check out dis guy! He tell me eryting I wen do. Try check out if dis da Christ Guy, da Spesho Guy God Goin Sen!” 30 So da peopo go outa da town an go wea Jesus stay.
31 Same time Jesus guys stay beg him, “Teacha, come eat!”
32 But he tell um, “I awready get food, but you guys donno wat kine.”
33 So his guys tell each odda, “Wat you tink? Somebody bring him food, o wat?”
34 Jesus tell, “I do wat God like, an I do all his work. Dass jalike food fo me. 35 You guys tell, ‘Get four mo month, den da crop stay ready fo harves.’ Lissen up! I tell you: Look da fields, cuz dey stay ready fo harves awready. 36 Da guy dat harves da crop an bring um inside da store house get pay fo dat. He jalike da guy dat help da peopo fo trus God. Den da guy dat tell um da Good Kine Stuff From God firs, an da guy dat help da peopo trus God, two a dem stay good inside togedda. Cuz da peopo dat trus God cuz a dem, get da real kine life dat goin stay to da max foeva! 37 Az true wat da peopo tell, ‘One guy plant da seed an anodda guy harves da crop an bring um inside da store house.’ 38 I sen you guys fo bring in da crop dat you neva work fo. Odda guys wen bus ass, an den you guys get da good kine stuff dey work fo.”
39 Plenny Samaria peopo from dat town trus Jesus cuz a wat da wahine tell um. She tell, “He tell me eryting I wen do.” 40 So wen da Samaria peopo come by Jesus, dey beg him, “Try come stay wit us!” So he stay dea two day.
41 Den plenny odda peopo trus him, cuz dey hear wat he tell. 42 Den dey tell da wahine, “Befo time, we ony hear wat you tell us. But now we trus him cuz we hear him too, an we know fo shua dat dis da Guy dat can take da whole world outa da bad kine stuff us stay in.”
Jesus Make One Leada Guy Boy Come Good
43 Afta Jesus stay dea two days, he go Galilee side. 44  4:44: Matt 13:57; Mark 6:4; Luke 4:24You know, Jesus tell befo time, “One guy dat talk fo God no mo respeck inside his home town.” 45  4:45: John 2:23But befo, Passova time, da peopo from Galilee wen go Jerusalem fo da spesho religious kine ceremony. An dey wen see eryting dat Jesus do ova dea. So wen he come Galilee, da peopo from dea give him all dea aloha.
46  4:46: John 2:1-11Den Jesus go Cana town Galilee side one mo time. Dass wea he take da watta an make um come wine befo time. Now, had one leada guy Capernaum town dat work fo da King. His boy stay sick. 47 Da guy hear dat Jesus come from Judea to Galilee side. So he go Cana town by Jesus, an beg him fo make his boy come good, cuz da boy litto mo mahke.
48 Jesus tell him, “If you guys no see me show you all kine awesome stuff, you guys no like trus me.”
49 Da leada guy tell, “Boss, try come, o my kid goin mahke.”
50 Jesus tell him, “Go home. Yoa boy stay live.”
An da guy trus wat Jesus tell um, an he go home. 51 Wen he reach dea his worka guys come an tell him, “Yoa boy, he stay live!”
52 He tell dem, “Wat time my boy come mo betta?”
Dey tell, “Da feva pau one clock yestaday.” 53 Da faddah know dass da same time wen Jesus tell him, “No worry. Yoa boy stay live.” Den him an all his ohana trus Jesus.
54 Dis da numba two awesome ting Jesus do afta he leave Judea side an go Galilee side.

4:5 4:5: Start 33:19; Josh 24:32

4:9 4:9: Ezra 4:1-5; Neh 4:1-2

4:44 4:44: Matt 13:57; Mark 6:4; Luke 4:24

4:45 4:45: John 2:23

4:46 4:46: John 2:1-11