Da Devil Try Make Jesus Do
Bad Kine Stuff
Bad Kine Stuff
(Matthew 4:1-11; Mark 1:12-13; Rules Secon Time 6:13; 8:3; Songs 91:11-12)
1 Afta John baptize Jesus, Jesus go way from da Jordan Riva. Da Good An Spesho Spirit from God stay in charge a him, an da Spirit take him to da boonies. 2 Fo forty days da Devil try presha Jesus fo make um do bad kine stuff. Jesus no eat notting dat time so he can pray, an afta dat he hungry.
3 Da Devil tell Jesus, “So, wat? You God Boy fo real kine? Den tell dis rock fo come bread.”
4 ✡ 4:4: Rules2 8:3Jesus tell, “No ways! Cuz da Bible tell, ‘No mo nobody dat can live ony wit bread.’ ”
5 Den da Devil take Jesus up on top one high place, an show him all da diffren countries all ova da world in one secon. 6 An da Devil tell him, “All dis powa an awesome stuff, az mines, an I can give um to anybody I like. 7 I give you all dis, if you go down on yoa knees an show me plenny respeck.”
8 ✡ 4:8: Rules2 6:13Jesus tell him, “No ways! Cuz da Bible tell befo time,
“ ‘Gotta go down on yoa knees
An show plenny respeck to God Da One In Charge a you,
An live an work ony fo him.’ ”
9 Den da Devil take Jesus to Jerusalem an make him stan on top da high part a da towa on top da Temple. Da Devil tell, “So, wat? You God Boy fo real kine? Kay den, go jump down dea. 10 ✡ 4:10: Songs 91:11-12Cuz da Bible tell,
“ ‘God goin tell his angel messenja guys
Fo take kea you real good.
11 Dey goin pick you up an carry you in dea hands,
Fo yoa feets no get bus up on da rocks.’ ”
12 ✡ 4:12: Rules2 6:16But Jesus tell him, “Not! Cuz da Bible tell, ‘God, he Da One In Charge a you. So no try presha him fo make him show proof dat he God.’ ”
13 Wen da Devil pau try fo make Jesus do all kine bad stuff, da Devil go way from him till nex time.
Jesus Start Fo Teach Galilee Side
(Matthew 4:12-17; Mark 1:14-15)
14 Den Jesus go back Galilee side, wit plenny powa from da Good An Spesho Spirit. All da peopo ova dea in dat place hear bout all da stuff he do. 15 He teach inside da Jew churches, an erybody talk good bout him.
Da Nazaret Peopo,
Dey No Mo Respeck Fo Jesus
Dey No Mo Respeck Fo Jesus
(Matthew 13:53-58; Mark 6:1-6; Isaiah 61:1-2; 58:6)
16 Jesus go Nazaret town, wea he grow up small kid time. Wen da Res Day come, he go inside da Jew church, jalike he erytime go. He stan up fo read da Bible. 17 Da helpa guy give him da book from Isaiah, da guy dat talk fo God befo time. He open um an find da place wea Isaiah write,
18 ✡ 4:18: Isa 61:1-2“Da Good An Spesho Spirit from Da One In Charge stay in charge a me,
Dass why he sen me fo teach da peopo dat no mo notting
Da Good Kine Stuff From God.
He sen me fo tell da prisona guys
Fo dem come free now.
An tell da peopo dat no can see,
Fo dem see now,
An tell da peopo
Dat dey no goin suffa no mo
From da guys dat make any kine to dem,
19 He sen me fo tell peopo da time
Wen Da One In Charge
Goin do spesho tings fo dem.”
20 Jesus close da book, an give um back to da helpa guy, an sit down fo teach. All da peopo inside da Jew church look at him. 21 He tell, “Wat you guys jus hear from da Bible, stay happen right now!”
22 Erybody dat hear him talk good bout him. Dat blow dea mind cuz he talk good. Dey tell, “Eh, dis Joseph boy, aah?”
23 Jesus tell, “Fo shua you goin tell me wat oua ancesta guys tell, ‘Eh Docta! Make um so you come good! Do da same ting ova hea in yoa home town, jalike we hear you wen do inside Capernaum.’ 24 ✡ 4:24: John 4:44Dass how you guys stay! But I stay tell you, ‘One guy dat talk fo God, da peopo inside his home town no show him respeck.’ 25 ✡ 4:25: 1Kings 17:1Try tink! Dass true dat befo time, wen Elijah stay alive, had plenny widows inside Israel an neva had rain from da sky fo three an one half year, an neva had food all ova da land. 26 ✡ 4:26: 1Kings 17:8-16But God neva sen Elijah fo help one widow inside Israel dat time. He sen um fo help one widow inside Zarefat town, Sidon side. 27 ✡ 4:27: 2Kings 5:1-14Same ting, wen Elisha was da guy dat talk fo God, had plenny lepa guys inside Israel. But God no make one lepa guy inside Israel come good, dat time. Ony Naaman, da foreigna guy from Syria, God make him come good.”
28 All da peopo inside da Jew church come real huhu wen dey hear him talk good bout da foreigna guys. 29 Dey stan up, drag him outside da town, an take him on top da hill wea da town stay, fo throw him ova da cliff. 30 But he walk right thru all da peopo an go way from dea.
Jesus Make One Bad Kine Spirit
No Bodda One Guy No Moa
No Bodda One Guy No Moa
31 Den Jesus go Capernaum town, Galilee side. He teach da peopo on da Jew Res Day. 32 ✡ 4:32: Matt 7:28-29Blow dea minds, fo wat he teach um. Cuz he teach wit plenny powa. 33 Had one guy inside da Jew church wit one bad kine spirit dat take ova him. He yell, 34 “Whoa! You Jesus from Nazaret! Wat you like do to us spirits? How come you come ova hea? Fo kill us, o wat? I know who you! You da Good an Spesho Guy from God!”
35 Jesus scold him. “No talk lidat! Let da guy go!” Den da bad kine spirit shake up da guy plenny in front dem, den he let da guy go, an no hurt him.
36 Da peopo, dat blow dea mind. Dey tell each odda, “Eh! Wat dis? Wat kine new teaching dis? He get powa fo even tell da bad kine spirits fo let go da peopo, an dey let um go!” 37 An da peopo go all ova da place aroun dea fo tell erybody bout Jesus.
Jesus Make Plenny Peopo Come Good
(Matthew 8:14-17; Mark 1:29-34)
38 Jesus go outside da Jew church, an go Simon house. Simon muddah-in-law get high feva. Simon dem tell Jesus fo help her. 39 Jesus go stan by her bed an tell da feva fo get out. An no mo da feva awready. Right den an dea she get up, an give dem food.
40 Wen da sun go down an da Res Day pau, plenny peopo bring by Jesus odda peopo dat get all kine sick. He put his hands on top erybody dass sick, an make all a dem come good. 41 An da bad kine spirits no bodda plenny peopo no moa. Da spirits yell, “You God Boy!” Jesus scold da spirits, an neva let dem say notting, cuz dey know he da Spesho Guy God Wen Sen.
Jesus Teach Inside Da Jew Churches
42 Morning time wen start fo get light, Jesus go one place wea nobody stay. Da peopo go look fo him, an wen dey find him, dey try fo make him stay wit dem. 43 But he tell, “I gotta go da odda towns too, fo teach da peopo da Good Stuff bout how dey can get God fo dea king, cuz dass why he sen me ova hea.”
44 Az why he stay teach inside da Jew churches all ova Judea side.
✡4:4 4:4: Rules2 8:3
✡4:8 4:8: Rules2 6:13
✡4:10 4:10: Songs 91:11-12
✡4:12 4:12: Rules2 6:16
✡4:18 4:18: Isa 61:1-2
✡4:25 4:25: 1Kings 17:1
✡4:26 4:26: 1Kings 17:8-16
✡4:27 4:27: 2Kings 5:1-14
✡4:32 4:32: Matt 7:28-29