Mary Put Perfume On Top Jesus Feets
(Matthew 26:6-13; Mark 14:3-9)
Den six days befo da Passova religious kine ceremony, Jesus go Betany town. Dass wea Lazarus stay, da guy Jesus wen make come back alive from mahke. So dey make one dinna fo Jesus. Marta bring da food to da peopo, an Lazarus stay sit by Jesus at da table. 12:3: Luke 7:37-38Den Mary take one pint da kine perfume dey make from da nard plant dat cost plenny, pour um on top Jesus feets, an den wipe um wit her hair. Cuz a dat, smell real good all ova inside da house.
But Judas Iscariot, one a Jesus guys, da guy dat layta goin set him up fo mahke, he tell, “Eh, how come dey neva sell dis perfume fo three hundred silva coin, an give da money to da peopo dat no mo notting?” Da guy, he no mo aloha fo da peopo dat no mo notting, he ony talk lidat cuz he one steala guy. He stay in charge a da money bag fo Jesus dem, an he cockaroach um.
But Jesus tell, “Eh, no bodda her! She wen stash dis perfume fo use um wen dey make me ready fo bury.” 12:8: Rules2 15:11Da peopo dat no mo notting, dey goin be wit you guys erytime. But me, I no goin be wit you guys erytime.
Da Main Pries Guys Talk
How Dey Goin Kill Lazarus
Dat time plenny Jew guys find out dat Jesus stay ova dea inside Betany town, an dey come fo see him. An not ony him, but Lazarus too. Cuz dey wen hear dat Jesus wen make Lazarus come back alive from mahke. 10 So da Main Pries guys talk togedda how dey goin kill Lazarus too. 11 Cuz plenny Jew guys hear bout Lazarus, an dey see him. Az why dey bag from dea leadas, an trus Jesus.
Jesus Go Inside Jerusalem
Jalike One King
(Matthew 21:1-11; Mark 11:1-11; Luke 19:28-40; Songs 118:25-26; Zekariah 9:9)
12 Da nex day, plenny peopo dat wen come Jerusalem fo da Passova ceremony hear dat Jesus stay come dea. 13  12:13: Songs 118:25-26Dey cut branches from da palm trees fo wave cuz dey like cheer Jesus, an dey go fo meet him. Dey yell,
“Hui! God goin take us
Outa da bad kine stuff we stay in!
Dis da King fo da Israel peopo!
God goin do plenny good kine stuff
Fo him.
He da guy dat come wit powa
From Da One In Charge!”
14 Jesus get one young donkey an sit down on top um, jalike da Bible tell,
15  12:15: Zek 9:9“No sked, you peopo from Jerusalem town!
Look! Yoa King stay come!
He stay sit on top one young donkey.”
16 Dat time, Jesus guys no undastan all da stuff dat stay happen. But laytas, Jesus come back alive from mahke an God make um come awesome to da max. Den, his guys rememba dat da Bible tell from befo time all dis tings bout him. An dey rememba dat da Bible tell from befo time how da peopo make to him.
17 All da peopo dat wen stay wit Jesus, da time he make Lazarus come back alive from mahke, dey tell wat dey wen see. 18 Dass why plenny peopo go outside Jerusalem fo meet Jesus, cuz dey hear bout da awesome ting he wen do dat show who him. 19 Den da Pharisee guys tell each odda, “Look! Erybody in da whole world stay go wit Jesus! An us guys no can do notting fo stop um!”
Greek Guys Dat Like See Jesus
20 Had some Greek guys dat go Jerusalem wit da odda peopo fo da Passova religious kine ceremony, fo go down an show God love an respeck dea. 21 Dey come by Philip, da guy dat come from Betsaida town Galilee side, an dey tell him, “Eh Mista, us guys, we like meet Jesus.”
22 Philip, he go tell Andrew. Den Andrew an Philip, dey go togedda an tell Jesus. 23 Jesus tell um, “Time awready fo me, da Fo Real Kine Guy. Now God goin make me come awesome fo real kine! But befo I come awesome to da max, I gotta mahke. 24 An I like tell you guys dis too: I jalike da wheat seed dat gotta fall down inside da groun an mahke, an den can grow, fo make plenny mo seeds. If da seed no mahke, stay ony one seed. 25  12:25: Matt 10:39; 16:25; Mark 8:35; Luke 9:24; 17:33Whoeva like hang on to dea life, dey goin lose um. But whoeva give up dea life in dis world, goin hang on to um, an stay live to da max foeva. 26 Whoeva like be my helpa gotta go wit me an be my guy. Wea I stay, my helpa guy goin stay dea too. An my Faddah goin show respeck to dat helpa guy.”
Jesus Tell How He Goin Mahke
27 Den Jesus tell, “Right now I feel all funny kine inside. Wat I goin tell? ‘Faddah, no let me mahke!’? No way I goin tell dat! Dass why I wen come hea, fo me mahke. 28 I tell dis: ‘Faddah, let um happen, so erybody goin know how awesome you stay.’ ”
Den one voice from da sky tell, “I wen show dem I stay awesome awready, an I goin show um one mo time.”
29 Da peopo dat stan dea an hear um tell, “Eh! Get thunda!”
Da odda peopo tell, “Nah, az was one angel messenja guy from Da One In Charge dat talk to him.”
30 Jesus tell dem, “Dis voice not fo me, but fo you guys. 31 Now da peopo inside dis world goin stan in front God da Judge, an God goin throw out da Bad Guy dat stay in charge a da peopo all ova da world. 32 Wen dey lif me up from da groun fo kill me, den I goin bring erybody by me.” 33 He tell dat fo show dem how he goin mahke.
34  12:34: Songs 110:4; Isa 9:7; Ezek 37:25; Dan 7:14Da peopo tell him, “We wen hear from da Rules From God dat da Christ Guy goin live foeva. Den how come you tell, ‘Dey goin take me, da Fo Real Kine Guy, an lif me up from da groun fo kill me’? Who dis Fo Real Kine Guy dat you stay talk bout?”
35 Jesus tell dem, “Me, I jalike da light fo you guys. Ony short time mo da light goin stay hea wit you guys. Live da right way now wen get light still yet, cuz no good da dark pio da light you get inside you. Whoeva walk aroun inside da dark, dey donno wea dey going. 36 Right now, I stay hea wit you guys. I jalike da light fo you guys, fo you trus me. Den you guys can come da kine peopo dat know wea dey going cuz dey get da light inside.”
Jesus tell dat. Den he go way from da peopo fo nobody stay by him.
Da Jew Peopo No Trus Jesus
(Matthew 13:15; Mark 4:12; Rome 10:16; Isaiah 6:1, 10; 53:1)
37 No matta Jesus wen do plenny awesome stuff in front da peopo fo show who him, dey still yet no trus him. 38  12:38: Isa 53:1Jalike da guy Isaiah wen tell, dat talk fo God long time befo time,
“Eh Boss! No mo nobody trus wat us guys tell!
Wen you show yoa powa, nobody see notting!”
39 Az why da Jew guys no can trus God nowdays, jalike Isaiah tell anodda time,
40  12:40: Isa 6:10“God make um fo dem no see,
An make um hard head,
Az why dey no like see wit dea eyes,
No like undastan wit dea head,
No like change an come by me.
Az cuz dey no like fo me
Make um come good.”
41 Isaiah wen tell dat cuz he wen see how awesome Jesus stay, an he wen tell wat goin happen wit Jesus.
42 Plenny Jew main leada guys trus Jesus, but dey no like tell erybody, cuz dey sked da Pharisee guys goin throw um outa da Jew church. 43 Cuz da leada guys, dey like da peopo talk good bout dem, mo den dey like God talk good bout um.
Wat Jesus Tell Show Wat Kine Peopo Dem
44 Jesus talk loud an tell, “Whoeva trus me, he no trus ony me, he trus da One dat wen sen me hea too. 45 Whoeva see me, he see da One dat sen me hea too. 46 I wen come inside da world fo da peopo know da trut, jalike me da light fo dem. An whoeva trus me, dey goin know da trut. Dey no goin stay jalike dey dark inside an donno notting. 47 Whoeva hear wat I tell an no do um, I no goin punish dem. I neva come fo punish da peopo inside da world. Me, I wen come fo take um outa da bad kine stuff dey stay do. 48 Whoeva tell, ‘Laytas wit you!’ an no lissen wat I tell, God goin judge dem. In da end time wen da world goin come pau, if dey no lissen da true stuff I tell, da judge goin punish dem. 49 Az cuz I neva tell stuff jus cuz I like, but my Faddah dat wen sen me tell me eryting he like me fo tell. 50 I know fo shua dat wat da Faddah tell us fo do show erybody how dey can come alive foeva fo real kine. Az why eryting I tell, dass jalike wat my Faddah wen tell me fo tell.”

12:3 12:3: Luke 7:37-38

12:8 12:8: Rules2 15:11

12:13 12:13: Songs 118:25-26

12:15 12:15: Zek 9:9

12:25 12:25: Matt 10:39; 16:25; Mark 8:35; Luke 9:24; 17:33

12:34 12:34: Songs 110:4; Isa 9:7; Ezek 37:25; Dan 7:14

12:38 12:38: Isa 53:1

12:40 12:40: Isa 6:10