10
Da Twelve Guys Jesus Sen
All Ova Da Place
(Mark 3:13-19; Luke 6:12-16)
Jesus tell his twelve guys fo come togedda wit him, an he give um da powa fo make da bad kine spirits no bodda da peopo no moa dat dey take ova, an fo make all kine sick peopo come good. Dis da twelve guys he sen all ova da place:
Simon, da one dey call Peter, an
Andrew his braddah;
James, dass Zebedee boy, an
John, dass James braddah;
Philip an
Bartolomew;
Thomas an
Matthew, dass da guy dat befo time colleck tax money fo da govmen;
James, dass Alfeus boy, an
da odda guy name Simon, he from da Jew sovereignty guys; an
Judas Iscariot, dass da guy dat bumbye goin set up Jesus fo mahke.
Wat Da Twelve Guys Suppose To Do
(Mark 6:7-13; Luke 9:1-6)
Jesus sen da twelve guys all ova, an he tell um, “No go wea da peopo dass not Jew guys stay, an no go wea da Samaria peopo stay. Go by da peopo from da Israel ohana, cuz dey jalike sheeps dat stay lost. An wen you guys go, teach um lidis, ‘God, da King from da sky, he stay King hea now.’ Make da sick guys come good, make da mahke guys come back alive one mo time, make da lepa guys come good, an make da bad kine spirits no bodda da peopo no moa. God give you guys plenny, an he no expeck notting back. So den, you guys give plenny too, an you guys no expeck notting back. Gold, o silva, o coppa money, no bring um wit you guys. 10  10:10: 1Cor 9:14; 1Tim 5:18No even take one bag fo da trip, o extra clotheses, o slippas, o one stick fo walk; cuz da peopo suppose to give da worka guy wat he need.
11 “Wen you guys go inside one big o small town, look fo one guy dea dat da peopo get respeck fo, an stay his place till you go way from dea. 12 Wen you guys go inside da guy house, tell um you dea fo bring aloha. 13 An if dat ohana show you guys respeck, den tell dem you like fo God make dem come so notting bodda dem. But if dey no show respeck, take back wat you tell God fo do fo dem. 14  10:14: JGuys 13:51If no mo nobody take you guys in, an dey no like hear wat you tell, den wen you go outa dea, shake da dus off yoa feets. 15  10:15 a: Matt 11:24; b: Start 19:24-28 10:15: Luke 10:4-12Dass right! Cuz wen dey stan in front God da Judge, dey goin get mo hard time den da peopo from Sodom town an Gomorrah town, da time God wen wipe um out.
You Guys Goin Suffa Plenny
(Mark 13:9-13; Luke 21:12-17)
16  10:16: Luke 10:3“You know, I stay send you guys out jalike sheeps, an you guys goin go wea da wild wolfs stay. So you guys gotta figga wat fo do, jalike da snakes, an no hurt nobody, jalike da doves. 17  10:17: Mark 13:9-11; Luke 12:11-12; 21:12-15Watch out fo da guys dat goin set you up in front da main leadas, an goin whip yoa back hard inside da Jew churches. 18 Dey goin drag you guys in front govnas an kings cuz you my guys. Den you guys goin tell wat you know bout me in front dem, an in front da peopos dass not Jew guys. 19 Wen dey set you guys up lidat, no worry wat you goin tell o how you goin tell um. Ony tell wat yoa Faddah goin tell you right den an dea. 20 Dat time goin be his Spirit stay talk, not you guys.
21  10:21: Mark 13:12; Luke 21:16“One braddah goin set up his braddah fo mahke, an one faddah goin set up his kid, an kids goin fight wit dea muddah an faddah, an dey goin set um up fo mahke. 22  10:22 a: Matt 24:9; Mark 13:13; Luke 21:17; b: Matt 24:13; Mark 13:13Erybody goin hate you guys cuz you my guys. But da guy dat no give up till da hard time pau goin come out okay.
23 “Wen da guys inside one town make you guys suffa, go way from dea, den go anodda town. Dass right! An I tell you guys dis too: I da Fo Real Kine Guy, an I goin come back befo you guys even can go all da towns Israel side.
24  10:24 a: Luke 6:40; b: John 13:16; 15:20“Da teacha, he mo importan den da guy he teach. Da boss, he mo importan den da worka. 25  10:25: Matt 9:34; 12:24; Mark 3:22; Luke 11:15Az good enuff wen one guy dat stay learn come jalike his teacha, an wen one worka guy do one good job jalike his boss. So wen dey call da main guy inside da house ‘Beelzebub Da Devil,’ den fo shua dey goin call his ohana ‘Da Devil Guys’ an even mo worse tings.
No Sked Dem
(Luke 12:2-7)
26  10:26: Mark 4:22; Luke 8:17“No sked dem. Da tings dey cova an hide, erybody goin know an see um. 27 Wat I stay tell you guys in da dark, tell um wea get light too. An wat I wispa in yoa ear, stan on top da house an yell um out. 28 No sked da guys dat can make yoa body mahke, but no can make yoa spirit mahke. But you guys betta come sked a God. He can make yoa body an yoa spirit get cut off from God foeva inside Hell. 29 Dey sell two sparrow birds in da market fo one penny. But not even one sparrow bird goin fall down from da sky on top da groun if yoa Faddah no like. 30 Yoa Faddah, he even know how much hairs you get on top yoa head! 31 No sked! Cuz God know you guys worth mo den plenny sparrow birds.
Da Guy Dat Tell Da Peopo He Know Christ
(Luke 12:8-9; Micah 7:6)
32 “If get one guy dat tell in front all da peopo dat he know me, den I goin tell in front my Faddah in da sky dat I know him. 33  10:33: 2Tim 2:12But if get one guy dat tell in front da peopo dat he donno me, den I goin tell in front my Faddah in da sky dat I donno him.
Not Frenz, But Fighting
(Mark 8:34; Luke 12:51-53; 14:26-27; Micah 7:6)
34 “No tink dat I come hea to dis world fo make shua erybody come frenz an no fight. I no come hea fo do dat, but fo make peopo turn agains each odda an fight! 35  10:35: Micah 7:6I come hea now fo split up peopo. Jalike da Bible tell from befo time, ‘One guy goin turn agains his faddah, one girl agains her muddah, one daughtah-in-law agains her muddah-in-law. 36 You goin get guys inside yoa ohana dat stay agains you.’
37 “Whoeva get love fo his faddah o his muddah mo den he get love fo me, dass not good enuff fo him be my guy. An whoeva get love fo his boy o his girl mo den he get love fo me, dass not good enuff fo him be my guy. 38  10:38: Matt 16:24; Mark 8:34; Luke 9:23Da guy dat not ready fo go wit me an be my guy, no matta dey even goin kill um on top one cross, he not good enuff fo be my guy. 39  10:39: Matt 16:25; Mark 8:35; Luke 9:24; 17:33; John 12:25Whoeva try hang on to his life goin lose um. An whoeva give up his life cuz he my guy, goin live fo real kine.
Da Guys Dat Goin Get Someting Good
(Mark 9:41)
40  10:40 a: Luke 10:16; John 13:20; b: Mark 9:37; Luke 9:48“Whoeva take you guys in an make frenz wit you guys, dey goin take me in too, an I goin make frenz wit dem. An whoeva take me in an make frenz wit me, dey goin take in da One dat wen sen me too, an he goin make frenz wit dem. 41 Whoeva take in one guy dat talk fo God an make frenz wit him, jus cuz he talk fo God, God goin have plenny good kine stuff bumbye in da sky fo dem, jalike dey was guys dat talk fo God too. Whoeva take in one good guy an make frenz wit him, jus cuz he one good guy, God goin have plenny good kine stuff bumbye in da sky fo dem, jalike dey was one good guy too. 42 Whoeva give one guy dat I stay teach hea even one drink cold watta, jus cuz he one guy I stay teach, no matta he ony one regula guy, I tell you guys fo shua, God goin have plenny good kine stuff bumbye in da sky fo him.”

10:10 10:10: 1Cor 9:14; 1Tim 5:18

10:14 10:14: JGuys 13:51

10:15 10:15 a: Matt 11:24; b: Start 19:24-28

10:15 10:15: Luke 10:4-12

10:16 10:16: Luke 10:3

10:17 10:17: Mark 13:9-11; Luke 12:11-12; 21:12-15

10:21 10:21: Mark 13:12; Luke 21:16

10:22 10:22 a: Matt 24:9; Mark 13:13; Luke 21:17; b: Matt 24:13; Mark 13:13

10:24 10:24 a: Luke 6:40; b: John 13:16; 15:20

10:25 10:25: Matt 9:34; 12:24; Mark 3:22; Luke 11:15

10:26 10:26: Mark 4:22; Luke 8:17

10:33 10:33: 2Tim 2:12

10:35 10:35: Micah 7:6

10:38 10:38: Matt 16:24; Mark 8:34; Luke 9:23

10:39 10:39: Matt 16:25; Mark 8:35; Luke 9:24; 17:33; John 12:25

10:40 10:40 a: Luke 10:16; John 13:20; b: Mark 9:37; Luke 9:48