3
Bummahs, Da Nineveh Peopo!
Bummahs! Fo da big town wea dey kill plenny peopo.
Da town wea all dea peopo bulai plenny!
Dey rip off odda peopo an stash dea stuffs!
Dey erytime bus up plenny peopo!
Can hear da horse whips crack.
Da wagon wheels make noise.
Da horse hoofs run fas.
Da war wagons make kalangalang.
Da army guys make dea horses run fas.
Dey swing dea swords.
Dea spears shine.
Plenny peopo mahke.
Mahke bodies all ova da place!
No mo nobody can count um.
Erybody trip an fall down ova um.
All dis happen cuz da Nineveh peopo jalike one hoa.
She look nice, but she put kahuna on top peopo.
Da nations come her slaves
Cuz she fool aroun wit dem,
An da ohanas come her slaves
Cuz she put kahuna on top dem.
 
Da One In Charge, Da God Ova All Da Armies, tell da Nineveh peopo dis:
“Look! I stay agains you!
I goin strip you naked.
I goin show da peopos an dea kings
Yoa shame cuz you naked.
I goin throw opala all ova you,
Fo show you no worth notting,
An make you somebody fo erybody look at.
Erybody dat see you Nineveh peopo
Goin run away from you an tell,
‘Nineveh stay all bus up!
No mo nobody goin stay sad bout Nineveh!’
No can find nobody goin make you guys feel mo betta inside!”
 
Nineveh, you guys tink you mo betta den Thebes, da main town fo Egypt,
Dat stay by da Nile Riva?!
Get watta all aroun um.
Da riva make da trouble stay far.
Da watta jalike one wall aroun um.
Da South Sudan peopo an da Egypt peopo
Wen make Thebes town mo strong den anybody.
Da Put peopo an da Libya peopo help Thebes.
10 But da Nineveh peopo even make da Thebes peopo come prisonas.
An sen dem far away.
Da Nineveh guys smash da small kids from Thebes an kill um
All ova da town.
Dey pull straw fo who goin get da Thebes alii guys fo dea slave.
Dey tie up all da Thebes leada guys wit leg chains.
11 Same ting wit you Nineveh peopo!
You guys goin drink plenny an come piloot too.
You goin hide an look fo one place
Wea da guys dat stay agains you no can find you.
 
12 All yoa strong wall jalike fig trees
Dat get dea firs ripe fruit.
Wen somebody shake um,
Da figs fall down an peopo eat um.
Dass how yoa strong wall goin fall down.
13 Look yoa army guys!
Dey weak, jalike da wahines!
Da gates inside yoa land,
Dey stay wide open fo da guys dat stay agains you come inside!
Da fire goin burn up da bars fo lock da gates.
14 Bring watta, cuz dey goin put army guys all aroun you guys!
Make ready fo fight!
Fix da walls an make um strong
Wit clay, mud, an bricks!
15 Ova dea da fire goin burn you guys up.
Da army guys swords goin cut you guys down.
All you guys goin mahke, jalike how da young grasshoppas eat up eryting.
No matta you guys stay plenny jalike da grasshoppas.
16 Yoa trader guys wen come plenny,
Mo den da stars inside da sky.
But jalike da young grasshoppas, dey eat eryting,
An den fly away.
17 Yoa guard guys, jalike grasshoppas.
Yoa military guys, jalike plenny grasshoppas.
Wen come cold dey sit on top da walls.
But wen da sun come out, dey fly away.
No mo nobody know wea dey go.
 
18 Bummahs, you king fo da Assyria peopo!
Da guys dat take kea yoa peopo, jalike dey stay sleep.
Yoa alii guys stay res.
Yoa peopo stay scatta all ova da mountains.
No mo nobody goin bring dem back togedda.
19 No mo notting can make yoa sword cut come good.
You stay hurt, an you goin mahke.
Erybody stay suffa
Cuz you wen ack real mean erytime!
Az why erybody dat hear bout you
Clap dea hands fo show dey feel good
Cuz you wen come wipe out!