1 Dis, da Aaron an Moses story bout dem an dea ohana, da time dey stay live. Dey write um da time Da One In Charge talk wit Moses on top Mount Sinai.

2 ✡3:2: Census 26:60Da names fo Aaron boys: Nadab, da firs one fo born, an den Abihu, Eleazar, an Itamar. 3 Dass da names fo Aaron boys, da pries guys dat God wen pick, an dey come prieses. 4 ✡3:4: Pries 10:1-3; Census 26:61But Nadab an Abihu wen mahke in front Da One In Charge inside da Sinai boonies. Cuz dey make one sacrifice an bring da wrong kine fire, not da kine from on top da altar dat Da One In Charge wen tell um fo use. Nadab an Abihu, dey no mo boys, so get ony Eleazar an Itamar fo do da pries kine work wit dea faddah Aaron.

5 Da One In Charge tell Moses, 6 “Bring da Levi peopo togedda, an line um up in front Aaron da pries guy, cuz dey goin be his helpa guys. 7 Dey goin be da security guard guys. Dey goin do dat work fo Aaron an fo all da peopo in front da Tent Wea Da Peopo Come Fo Meet Me, Da One In Charge—all da kine work dey suppose to do wit da Tent. 8 Dey goin take kea a all da tings da pries guys use inside da Tent Fo Come Togedda Wit Me, Da One In Charge. Dey goin guard all da stuff fo da Tent, fo da Israel peopo. 9 Da Levi ohana peopo, dea kuleana goin be fo help Aaron an his boys. Dey da ones from da Israel ohana dat goin work ony fo him. 10 Aaron an his boys, make um dea kuleana fo be da pries guys. Any odda guy like make jalike one pries, kill um.”

11 Da One In Charge tell Moses, 12 ✡3:12: Outa 13:2“I get da right fo pick da firs boy dat born from ery Israel wahine fo come spesho fo me. But I no goin take all a dem. I ony goin take da Levi ohana from da Israel peopo, fo dem be spesho fo me. 13 Cuz all da firs boys dat born, dey stay spesho fo me. Da time I wen kill da firs boys dat born from da Egypt land, I make da firs boys dat born fo da Israel peopo spesho fo me, no matta guy o animal. Dey mines. Me, Da One In Charge.”

14 Inside da Sinai boonies, Da One In Charge tell Moses, 15 “Count da Levi peopo by dea blood lines an ohanas. Count all da boys one month ol o moa.” 16 So Moses count um, jalike Da One In Charge tell him fo do.

17 Dese da names fo da Levi boys: Gershon, Kohat, an Merari. 18 Dese da names fo da Gershon blood lines: Libni an Shimei. 19 Dese da names fo da Kohat blood lines: Amram, Izhar, Hebron, an Uzziel. 20 Dese da names fo da Merari blood lines: Mahli an Mushi.

Dese da blood lines fo da Levi ohana: 21 From Gershon get da Libni an Shimei blood lines. 22 All da boys one month ol o mo was 7,500 guys. 23 Da Gershon line suppose to make camp da west side a da Tent, behind da back a da Tent. 24 Da leada fo da Gershon blood lines was Lael boy Eliasaf. 25 Inside da Tent Wea Da Peopo Meet Da One In Charge, da Gershon line gotta take kea da Tent, da covas, da curtain fo da door, 26 da curtains fo aroun da open lanai, da curtain by da door fo da open lanai aroun da Tent an da altar, an da ropes, an all da stuff fo use um.

27 From Kohat get da Amram line, da Izhar line, da Hebron line, an da Uzziel line. 28 All da boys one month ol o mo was 8,600 guys. Dey get da job fo take kea da Place Dat Stay Spesho Fo God. 29 Da Kohat blood lines suppose to make camp da south side a da Tent. 30 Da leada fo da Kohat blood lines was Uzziel boy Elizafan. 31 Dey get da job fo take kea da Box Fo No Foget Da Deal Wit Da One In Charge, da table, da stan fo da lamp, da altars, da tings da pries guys use fo work inside da Place Dat Stay Spesho Fo God, da inside curtain, an eryting fo use um. 32 Da main leada fo da Levi guys was Aaron boy Eleazar. He stay in charge a da guys dat take kea da Place Dat Stay Spesho Fo God.

33 From Merari get da Mahli line an da Mushi line. 34 All da boys one month ol o mo was 6,200 guys. 35 Da leada fo da Merari blood lines was Abihail boy Zuriel. Dey suppose to make camp da north side a da Tent. 36 Da Merari blood lines get da job fo take kea da boards fo da Tent, da bars, da poses, da piers, all da stuff fo um, an eryting fo use um, 37 an da poses fo da open lanai aroun da Tent, wit da piers, da tent pegs, an da ropes.

38 Moses an Aaron an Aaron boys, suppose to make camp da east side a da Tent, wea da sun come up, in front da Tent Wea Da Peopo Meet Da One In Charge. Dey get da job fo take kea da Place Dat Stay Spesho Fo God fo da Israel peopo. No mo anodda guy can go nea da Place Dat Stay Spesho Fo God, o dey goin get kill.

39 All da Levi ohana guys dat Da One In Charge tell Moses an Aaron fo count by dea blood lines, ery boy one month ol o mo, was 22,000 guys.

40 Da One In Charge tell Moses, “Now, count all da firs boys born from all da Israel peopo dat now one month ol o mo, an write dea names. 41 Take da Levi peopo fo me. Den no need take da firs boy fo born from da odda Israel peopo. An take da animals from da Levi peopo fo me. Den no need take da firs animals dat born from all da Israel peopo. Me, Da One In Charge.”

42 So Moses count all da firs boys fo born from Israel, jalike Da One In Charge tell him fo do. 43 All da boys dat born firs, one month ol o moa, was 22,273.

44 Da One In Charge tell Moses dis too: 45 “Take da Levi guys, fo no take da firs ones dat born from all da Israel peopo. An take da animals from da Levi guys, fo no take da animals from all da Israel peopo. Da Levi ohana guys, dey spesho fo me, Da One In Charge. 46 From da Israel guys dat wen born firs, get 273 Israel guys mo den all da Levi guys. Fo buy back da 273 extra Israel guys, 47 take two ounce silva fo all dem, an weigh um jalike da silva fo da Place Dat Stay Spesho Fo God. 48 Give da silva to Aaron an his boys fo buy back da extra Israel boys.” 49 So Moses take da silva fo da extra Israel boys dat born firs, dat stay mo den all da Levi ohana guys. 50 Fo da firs Israel boys fo born, he take silva, dat weigh 35 poun jalike dey weigh da silva fo da Place Dat Stay Spesho Fo God. 51 An Moses give Aaron an his boys da silva fo buy back da extra Israel boys, jalike Da One In Charge wen tell Moses fo do.