1 Da family leadas fo da Gilead line dat come from Makir, Manasseh boy, from da Joseph ohana, dey come in front Moses an da leadas fo da Israel ohanas. Da Gilead guys come aks da leadas fo help dem. 2 ✡36:2: Census 27:1-11Dey tell, “Da One In Charge wen tell you, my boss, fo pull straw fo give land to da Israel peopo. He tell you dis too, you suppose to give da land rights fo oua braddah Zelofehad to his girls. 3 So now, wat us goin do?! If dey marry guys from anodda Israel ohana, dat mean, dey goin take dea share a oua Manasseh ohana land, an give um to da ohana wea dey marry fo come dea land. So part a da property us guys get, dey goin take um away from oua ohana. 4 Wen da spesho year fo da Israel peopo come ery fifty year, dea land goin go back to da ohana wea dey marry, an oua ohana no goin get oua share no moa.”

5 Den Da One In Charge tell Moses fo tell da Israel peopo dis: “Wat da Joseph ohana guys tell stay right. 6 Dis wat Da One In Charge tell bout wat fo do fo da Zelofehad girls: ‘Okay fo dem marry whoeva dey like, but dey gotta marry somebody inside dea faddah big ohana. 7 No can pass one Israel land from one big ohana to anodda, cuz ery Israel guy goin keep da land dey get from dea ancesta guys. 8 Ery girl dat get land inside one Israel ohana gotta marry one guy inside dea faddah ohana. Dass how ery Israel guy goin get property from dea ancesta guys. 9 No can pass land from one big ohana to anodda big ohana. Cuz ery Israel ohana gotta keep da land dey get from dea ancesta guys.’ ”

10 Jalike Da One In Charge tell Moses, da Zelofehad girls do. 11 Zelofehad girls, Mahlah, Tirzah, Hoglah, Milkah, an Noah, marry dea cousins from dea faddah side. 12 Dey marry inside da Manasseh line, dat come from Joseph, an da property dey share stay in dea faddah blood line.

13 Dese da rules Da One In Charge give Moses fo give to da Israel peopo, da time dey stay on top da flat part a Moab by da Jordan Riva, da odda side from Jericho.