11
1 Wen somebody make da scale go off fo cheat peopo,
Dat kine make Da One In Charge sick!
But wen dey get da weight right,
Dass wat he like.
2 You go ack jalike you mo smart den God,
You goin come all shame.
But if you no tink you mo betta den erybody,
Den you can learn wass good fo do.
3 Da kine peopo dat do eryting dey suppose to do,
Dey do da right ting erytime no matta wat.
Cuz a dat, dey goin know wat fo do too.
Da kine peopo dat you no can trus an dey try trick you erytime,
Wat dey stay do, dey ony goin come wipe out.
4 Wen God ready fo wipe out eryting
Cuz he no can stan wat peopo stay do,
All da money you get, no goin help you!
Wen you stay do da right ting erytime,
Dat goin get you outa trouble wit wateva can make you mahke.
5 Da kine peopo dat nobody can poin finga dem,
Wateva stuff dey do, dey no need worry
Cuz dey erytime do da right ting.
Wen da bad kine peopo do bad stuff
Watevas dey try do, goin jam dem up.
6 Da kine peopo dat do da right ting erytime
Dey stay outa trouble cuz dey do like dat
Da kine peopo dat you no can trus,
Dey no can stay outa trouble,
Cuz erytime dey like get any kine stuff.
7 Wen da bad kine peopo mahke,
All da stuff dey tink dey was goin get,
All gone awready, pau.
All wase time!
8 Da peopo dat stay do wass right erytime,
God take dem away from da place wea get trouble.
Cuz az wea da bad guys stay end up.
9 Da kine pilau peopo dat stay agains God,
Dey wipe out dea frenz
Cuz dey tell all kine pilau stuff bout dem.
Da kine peopo dat do wass right erytime,
God take dem away from da place wea get trouble,
Cuz dey know wat fo do.
10 Da peopo dat do wass right erytime,
Wen good tings come by dem,
Den erybody inside dea town feel good inside.
But da bad kine peopo, wen dey get wipe out,
Erybody all happy an make big noise.
11 Da peopo dat erytime do wass right,
Good tings come to dea town cuz a dem,
An da town come mo betta.
But wen da bad kine peopo open dea mout,
Da town come jam up.
12 Da guy dat talk bad bout anodda guy,
He no tink befo he talk.
But da guy dat undastan plenny,
He goin keep his mout shut.
13 Da kine peopo dat go aroun talk bad bout odda peopo,
Dey tell all kine stuff bout da odda guys dat dey not suppose to tell.
But da kine peopo you can trus,
Dey know how fo keep dea mout shut.
14 Wen no mo nobody fo tell peopo wat fo do,
All dea nation goin get wipe out.
Wen get plenny peopo dat can tell peopo wass good fo do,
Dey all goin stay outa trouble.
15 Whoeva tell dey goin pay fo somebody dey donno
If da guy no pay wat he suppose to,
Fo real, dey goin suffa plenny.
If you tell um, “No way I goin make dat kine deal!”
No need worry.
16 Da kine wahines dat get one good heart fo help peopo,
Dey get plenny respeck,
But da kine guys dat do any kine fo dem be numba one,
Da ony ting dey get is silva.
17 Da kine peopo dat do good tings fo dea ohana,
Good tings goin come to dem.
Da kine peopo dat like make odda peopo suffa,
Dey goin make um fo dem da ones dat suffa.
18 Da kine peopo dat do bad kine stuff,
Wat dey get fo dat, ony make dem look good.
Da kine peopo dat make tings come right,
Wat dey get fo dat, stay good fo real kine.
19 Da peopo dat do da right ting erytime,
Dey goin live fo real kine.
Da peopo dat go all out fo do bad kine stuff,
Dey goin mahke.
20 Da One In Charge feel jalike he sick, wen he tink bout
Da kine peopo dat like do any kine pilau stuff.
He feel real good inside wen he tink bout
Da kine peopo dat no do notting bad.
21 You betta know dat da bad kine peopo
Goin get busted an suffa,
But fo da peopo
Dat do da right ting erytime,
Da ones dat goin come from dem
Goin stay outa trouble.
22 Wase time, fo put gold nose ring on one pig.
Same ting, fo one good looking wahine
Dat no like learn wass good kine an wass bad kine,
Her wase time!
23 Da peopo dat erytime do da right ting,
Wen dey get da kine stuff dey like,
Az all good.
Da bad kine peopo,
Wen dey get da kine stuff dey like,
Peopo get all wild wit dem an like wipe um out.
24 Get da kine peopo, dey like give away plenny stuff all da time
An still yet, bumbye dey get even mo stuff.
Get diffren kine peopo, dey can help out, but dey no like,
An bumbye dey no mo notting.
25 Get da kine peopo dat like do good tings fo odda peopo all da time,
Plenny good tings goin come to dem.
Wen you make shua da odda guys get plenny,
Same ting, you goin get plenny.
26 Anybody dat no let peopo buy food from him
Cuz he tink bumbye he goin make mo plenny money,
Da peopo goin tell, “I like God do bad tings to dat guy!”
But da guy dat let um buy wen dey need um,
Dey goin tell, “I like God do plenny good tings fo him!”
27 Some peopo try hard fo do good kine tings
Cuz dey like good kine tings come to dem.
But da peopo dat like do ony bad kine tings,
Ony bad kine tings goin come to dem.
28 Da peopo dat tink dey no need worry
Cuz dey get plenny stuff awready,
Dey goin wipe out one time.
But da peopo dat do da right ting erytime,
Eryting goin come out good fo dem,
Jalike da tree dat get plenny leaf.
29 Whoeva make dea family suffa,
Wen one a dem mahke, he no goin get notting.
Wat he goin get is ony air.
Da stupid head kine peopo wit attitude,
Dey goin come slave guys fo da peopo
Dat know wat fo do erytime.
30 Da peopo dat erytime do da right ting,
Dey help peopo live mo long time.
Da peopo dat get odda peopo outa trouble
So dey no goin mahke,
Dey da kine peopo dat know wat fo do erytime.
31 ✡ 11:31: 1Pet 4:18Fo shua, da peopo dat erytime do da right ting,
God goin make good to dem fo dat
Even befo dey mahke.
You can stay shua even mo plenny, dat God goin pay back
Da bad kine peopo dat stay do bad kine stuff.