10
Odda Stuff From Solomon
Fo Make Us Tink
Fo Make Us Tink
1 Dis da part dat get da importan kine stuff fo make us tink dat Solomon tell us.
Wen da faddah-muddah guys get one kid dat know wat fo do erytime,
Dey come all good inside.
Wen dey get one kid dat tink he get um wen he no get um,
Da faddah-muddah guys come all sore inside.
2 Wase time, wen you do any kine bad stuff
Fo get stuff dat cost plenny.
But if you stay do da right ting,
Den you goin live long time an no get cut off from God foeva.
3 Da peopo dat stay do wass right,
Da One In Charge take kea dem
Fo dem no come hungry.
But da peopo dat do any kine bad stuff,
God stop dem
So dey no can get notting dey like.
4 You slack off, you no mo money.
You work hard, you come rich.
5 Da guys dat go early fo pick fruit, dat kine guys get um.
Da guys dat go sleep wen dey suppose to harves food,
Dat kine guys ony make shame.
6 Erytime God do good tings
Fo da peopo dat stay do da right ting
Fo dem do wat he like.
But da kine guys dat like do bad stuff,
Dey make all nice kine wen dey talk,
Fo you donno dey like bus you up.
7 Wen you rememba all da good peopo
Dat you know from long time,
Make you feel good inside.
But da bad peopo, dey get pilau name
So you no like even tink bout dem.
8 Da peopo dat know how fo tink,
Dey goin lissen an do wat dey suppose to do.
Da peopo dat do bad kine stuff an no bodda dem,
Dey all mout, an dey goin fall down an crack dea head.
9 Da peopo dat erytime do stuff da right way,
Dey no need worry, notting bad goin happen to dem.
Da peopo dat like make eryting come jam up,
Erybody goin know how dey stay fo real kine.
10 Peopo dat make eye signal fo hide wat dey like do,
Goin make somebody suffa.
Peopo dat do bad kine stuff an no bodda dem,
Dey all mout, an dey goin fall down an crack dea head.
11 Wen you lissen da guys dat stay do wass right,
You goin get real kine life from dat.
But da kine guys dat like do bad stuff,
Dey make all nice kine wen dey talk,
Fo you no tink dey like bus you up.
12 ✡10:12: James 5:20; 1Pet 4:8You hate somebody,
Bumbye you goin beef.
You get love an aloha fo somebody,
No matta dey go agains you,
Still yet you let um go.
13 Da peopo dat undastan stuff,
Wen dey talk, you can learn wat fo do.
But gotta get one big stick fo wack
Da peopo dat no tink bout stuff.
14 Da peopo dat know wat fo do,
Erytime dey like learn mo stuff.
Da peopo dat do bad stuff an no bodda dem,
Wen dey talk any kine,
Dat mean dey ready fo get wipe out.
15 All da stuffs da rich guys get,
Dass jalike one strong wall aroun dea place.
But da guys dat no mo notting,
Dass why easy fo wipe out dem.
16 If you stay do da right ting,
Yoa life goin come mo betta.
But wen you stay do bad kine stuff,
You goin come mo worse.
17 Da kine peopo dat lissen up
Wen dey get presha fo do da right ting,
Dey show odda peopo how
Fo make dea life come mo betta.
Da kine peopo dat no like lissen
Wen somebody tell dem
Dey wen do someting wrong,
Dey make odda peopo go da wrong way too.
18 If somebody talk all nice to you,
But inside he hate you,
He trying fo trick you, him ony bulai.
Ony da kine stupid guys dat tink dey no need learn notting
Stay talk bad bout odda peopo.
19 No talk too much!
Bumbye you goin tell someting
An peopo goin come all huhu wit you.
Da guys dat tink firs befo dey open dea mout,
Dey undastan real good wat dey suppose to do.
20 Da peopo dat do da right ting erytime,
Da stuff dey tell, az like da bestes kine silva.
Da bad peopo,
Da stuff dey tink, az ony manini kine stuff, dat.
21 Da peopo dat stay do wass right,
Wat dey tell, az jalike food fo da inside fo plenny peopo.
Da stupid head kine peopo wit attitude,
Dey goin get cut off from God foeva,
Cuz dey no tink strait.
22 Wen Da One In Charge do good tings fo peopo,
He give dem plenny good stuff.
He no give problem same time.
23 Da stupid guys dat tink dey no need learn notting,
Dey tink az good fun
Wen dey go do da bad stuff dey wen plan.
Da guys dat undastan real good,
Dey get good fun wen dey do
Wat dey know dey suppose to do.
24 Da bad guys, da worses ting dat dey tink can happen to dem,
Dass wat goin happen.
Da guys dat stay do da right ting, da ting dey like da mostes,
Dass wat dey goin get.
25 Jalike afta da hurricane hit,
Trouble come, an all da bad peopo, gone awready!
But da peopo dat stay pono,
Dey da ones stay solid an strong,
Foeva kine.
26 Jalike da sour taste from da vinega
Make yoa teet come all tight,
An da smoke make yoa eye
Come all hurt,
Same ting, dass how you feel
Wen you get one lazy buggah work fo you.
27 If you get choke respeck fo Da One In Charge,
So dat you stay sked wen you tink bout him,
You goin live long time.
But da bad peopo,
Ony litto bit mo, dey mahke.
28 Da peopo dat stay do da right ting,
Dey shua good stuff goin happen,
Fo dem stay good inside.
All da stuff da bad peopo like happen,
Bumbye dey figga out, no goin happen.
29 Da peopo dat go all out fo do da right ting,
Wen dey do stuff dat God like,
God goin make shua notting happen to dem.
But da bad peopo, wen dey do stuff God no like,
God goin wipe dem out cuz a dat.
30 Da guys dat stay do da right ting,
Dey goin live on top dea land all da time,
No can throw dem out.
But da guys dat stay do bad kine stuff,
Dey no can stay.
31 Da peopo dat do da right ting erytime, wen dey talk,
Dey help peopo learn wat fo do.
But da peopo wit da bulai mout,
Dey goin come all wipe out one time.
32 Da peopo dat do da right tings,
Dey know wat kine words good fo help peopo.
But da peopo dat do bad kine stuff,
Dey talk sly kine, dey ony know how fo bulai.