21
Wen one king guy gotta make up his mind wat fo do,
Da One In Charge, he da One
Stay in charge a wat da king pick.
Az jalike da guy in charge a da watta ditch.
He make da watta go wea eva he like make um go.
Peopo tink wateva dey do, stay right.
But Da One In Charge, he da One know wat dey tink.
Wen us guys stay do wass right
An judge da right way,
Da One In Charge tink az mo betta
Den jus fo make one sacrifice.
Watevas da bad kine peopo do,
Az bad.
Dey ack high makamaka,
An tink dey can do wateva dey like do.
If get peopo dat work hard, an dat no bodda dem,
Den, wen dey make one plan how dey goin work,
Fo shua dey goin come rich.
But da ones dat like come rich fas,
Fo shua dey goin come pooa.
 
Anybody bulai odda peopo
Fo get plenny stuffs—
Da stuffs dey get,
Going all blow way jalike da mist,
Jalike dey stay try fo mahke.
 
Da bad kine peopo tell,
“No way I goin do someting right!”
Cuz a dat, wen dey go bus up odda peopo,
Dey da ones goin get bus up,
Jalike wat dey do,
Catch dem inside one net.
Da crooks,
Da way dey do tings all hamajang.
Da peopo dat stay do wass right,
Eryting dey do stay good.
Mo betta you live outside
On top one corna a yoa flat roof,
Den fo try live inside da house
Wit one wife dat grumble bout eryting.
10 Da bad kine peopo, dey feel real good inside
Wen dey do bad kine stuff.
Dey no even give chance to odda peopo.
 
11 Wen you punish da guys
Dat no mo respeck fo nobody
Cuz dey tink dey mo smart,
Den, da guys dat donno notting an easy fo bulai
Dey goin start fo learn wat fo do erytime.
But da guys dat know wat fo do erytime,
Easy fo dem learn plenny
If you help um fo undastan.
12 Da One dat do da right ting erytime,
He undastan wat stay happen inside all da bad guys ohanas.
Az how he jam up wat da bad peopo try fo do.
13 Wen peopo yell fo help cuz dey need someting,
An you make deaf ear,
Goin be same same fo you.
Wen you yell fo help,
Nobody goin lissen you!
 
14 Wen somebody stay huhu wit you,
Give um one present,
But no tell nobody,
Den da one stay huhu,
Goin come so notting bodda him.
Peopo put unda da table kine money
Inside da odda guy pocket,
Fo make da odda guy no stay mad no moa.
 
15 Wen da judge guys judge da right way,
Make da peopo dat stay do right
Feel good inside.
But fo da peopo dat stay do wass wrong,
Make dem lose fight.
 
16 Somebody go da wrong way cuz dey no tink firs,
Dey goin come one a da mahke peopo.
17 Anybody ony do tings all da time
Dat make dem feel good,
Bumbye dey goin need plenny.
Anybody go all out
An drink da wine an eat da fancy kine food,
No way dey goin come rich.
 
18 Da bad kine peopo goin suffa,
Fo da peopo dat do wass right erytime
Get outa trouble.
An da peopo dat nobody can trus,
Dey goin suffa, fo da peopo dat do da right ting
Get outa trouble.
19 Mo betta you live ony you inside da boonies,
Den live wit one wife dat grumble bout eryting
An make you stay sad inside.
 
20 Da peopo dat know wat fo do erytime,
Dey get nice place fo put all nice kine stuffs
Dat dey like, an plenny fancy kine food too.
Da kine peopo dat tink dey get plenny wen dey no mo notting,
Fas, dey eat up wateva dey get.
 
21 Whoeva go all out fo come
Da kine guy dat do wass right erytime,
An dat stay tight wit his ohana,
Long time he goin live,
An peopo goin do good tings fo him,
An show um choke respeck.
 
22 Da guy dat know wat fo do erytime,
If he gotta, he can attack one big town
Dat get plenny army guys inside,
An bus up da strong wall
Dat peopo ova dea wen trus.
23 Whoeva take kea wat come outa dea mout wen dey tell,
Big kine trouble no goin come to dem.
 
24 Da peopo dat ack jalike dey real smart,
An ack high makamaka,
Erybody know who dem,
Dat dey no mo respeck fo nobody.
Wateva dey do, dey tink dey mo smart den erybody.
25 Da lazy buggahs, dey ony like get stuffs,
But dat ony make um mahke mo fas,
Cuz dey no like work fo get um.
26 All day, dey greedy fo get stuff.
But da guys dat do wass right erytime,
Dey give away stuff an no hold back.
27 Wen da bad kine peopo make one sacrifice,
Wat dey do, make God real mad.
An wen dey make da sacrifice
Fo help um do someting real bad,
God come mo mad!
28 Wen one guy tell in front da judge wat he wen see
But he ony bulai,
Da judge goin wipe um out.
But da guy dat know wat wen happen
Cuz he look an lissen good,
Da judge goin let um tell eryting.
 
29 Bad guys ack jalike notting bodda dem,
But da guys dat do wass right,
Dey tink bout wea dey stay go.
30 No matta you know wat fo do erytime,
No matta you undastan eryting,
No matta you make one plan,
Wen you go agains Da One In Charge,
Notting goin happen!
 
31 You can make yoa horse ready fo da war,
But Da One In Charge,
Him da One can make you da winna.