1 ✡ 27:1: James 4:13-16No talk big bout wat you goin do tomorra.
Cuz you donno wat goin happen den.
2 Mo betta you let somebody you donno talk big bout you,
An not you.
Mo betta you let somebody from anodda place
Tell good tings bout you,
So you no need say notting.
3 Heavy, fo carry one big stone.
An da sand mo hard fo carry.
But mo heavy an mo hard,
Wen get da kine guy dat do bad kine stuff an no bodda him,
An he make trouble fo you!
4 Wen somebody huhu wit you,
Dey make eryting real hard fo you.
Wen dey like get you back,
Feel jalike one flood wipe you out.
But mo worse wen somebody stay jealous.
Nobody can handle dat.
5 Wen somebody come in front erybody
Fo tell um you wen do someting wrong,
Az mo betta
Den if somebody get love an aloha fo you,
But dey no say notting.
6 Wen yoa good frenz tell you,
You wen do someting wrong,
You feel jalike dey make you bleed,
But still yet, you can trus dem.
Wen somebody dat hate you kiss you plenny time
Az cuz dey stay bulai you.
7 Wen yoa opu stay full cuz you eat too much,
Even honey make you like bahf.
But wen you stay real hungry,
Even da food dat taste bad, taste good.
8 Wen one guy stay away from his house,
Az jalike one bird stay away from da nes.
9 Wen one fren kokua you
An tell you how da bestes way fo do someting,
Az real sweet!
Make you feel good inside
Jalike wen somebody give you olive oil an perfume.
10 No foget bout yoa frenz
An yoa faddah frenz.
Wen someting bad happen to you,
No go yoa relative house.
Mo betta go one fren live nea you fo help you,
Den one relative dat live far away.
11 My boy, be da kine guy
Dat know wat fo do erytime.
You do dat, den you goin make me feel real good inside!
An if whoevas talk bad to me,
I goin know wat fo tell um back.
12 Da akamai kine peopo,
Wen dey see someting bad goin happen,
Dey go hide.
Da ones dat donno notting an easy fo bulai,
Dey jus keep going,
An layta, az too late, dey pay da price.
13 If some guy you donno owe you money,
An if some odda guy make one promise
Fo pay you back if da guy you donno no can,
Mo betta you hold da coat a da guy dat make da promise,
Cuz fo shua, da guy you donno, he no goin pay!
An if get one wahine you donno dat owe you money,
Make shua you hold someting dat cost plenny from her,
Fo you sell um if she no pay you back!
14 If ery day you get up early
An yell loud to da guy nex door,
“I like God do good tings fo you!”
Dat guy goin tink,
“You stay putting kahuna on top me, o wat?!”
15 Da kine wahine dat stay grumble to you fo do someting all da time,
Her jalike wen get rain all day an get leak in da roof!
16 Fo try make her shut her mout,
Az jalike you try fo make da wind no blow,
O jalike you try fo grab oil wit yoa hand!
17 Fo make sharp someting iron,
Fo make sharp one fren,
Need anodda fren.
18 If you da one take kea one fruit tree,
Den you goin eat da fruit.
An you da one take kea yoa boss,
Den you goin get respeck fo dat.
19 You look down inside da watta,
You see yoa face.
You look inside you,
You see wat kine guy you fo real kine.
20 Da Mahke Peopo Place,
Dey call um Da Deep Dark Hole,
Erytime like suck mo plenny peopo down inside.
Same ting fo da peopo dat get greedy eye,
Dey erytime like take mo plenny stuff.
21 Fo find out if silva an gold good o no good,
Gotta melt dem inside da fire.
Fo find out if one guy good o no good,
Gotta see how he ack
Wen peopo stay tell good tings bout him.
22 One guy dat do bad kine stuff an dat no bodda him,
You no can do notting, fo him no ack lidat.
No matta you grind him up jalike food wit one poi pounda,
No way you goin make um no do bad kine stuff.
23 You gotta make shua you know
How yoa sheeps an goats stay.
You gotta know plenny bout
How fo take kea yoa animals.
24 No matta you get plenny rich kine stuffs,
All dat no goin stay foeva.
Even if you one king,
You no can be shua
Yoa line goin stay king foeva.
25 Afta you harves da hay from da field
Fo feed yoa animals,
An you see da new grass stay come up,
An you even cut da grass from on top da mountains,
26 Den you can even use da wool from da bebe sheeps
Fo make yoa clotheses,
An you can even sell yoa boy kine goats
Fo buy anodda field.
27 An da wahine goats goin give you all da milk you need
Fo make cheese fo all yoa ohana peopo eat,
An fo da wahines dat work fo you.