28
1 Da bad guys, dey run away
Jalike somebody stay chase um,
No matta no mo nobody chase um.
But da peopo dat stay do wass right,
Dey stay shua dey stay okay,
Jalike one lion dat no sked notting.
2 Wen da peopo inside one land go agains da govmen,
Get plenny peopo like stay in charge.
But wen da govmen get somebody
Dat undastan how tings gotta be an know plenny stuff,
Eryting stay good, long time.
3 Wen one strong guy dat no mo notting ovathrow da govmen
An make any kine to da peopo dat need stuff,
Dass jalike wen one big rain come down
An wash out eryting da peopo wen plant,
So den dey no mo food.
4 Da kine peopo dat tink da Rules From God no good,
Dey talk good bout bad kine peopo.
But da ones dat stay do wat da Rules tell,
Dey go agains wat da bad kine peopo do.
5 Da bad kine peopo,
Dey donno how fo judge da right way.
But da peopo dat like know Da One In Charge fo real kine,
Dey know eryting bout wass right an wass wrong.
6 Mo betta you no mo notting,
An peopo goin trus you,
Den get plenny,
But dey know you one crook.
7 Da kine young peopo dat lissen wat da Rules From God tell,
Dey undastan stuff real good.
But da ones dat hang out wit da no good kine peopo,
Dey make shame fo dea faddah-muddah guys.
8 If you lend peopo money,
But charge um big time interes
Fo you come rich fas,
Az jalike you collecking money
Fo some odda guy
Dat goin use um
Fo kokua da peopo dat no mo notting
Jus cuz he like kokua dem.
9 Wen somebody make deaf ear
An no lissen da Rules from God,
Wen da guy pray to God,
God goin tell,
“Bummahs! No good, wat you tell me!”
10 Wen somebody bulai good kine peopo
Fo make um go da wrong way,
Jalike dey stay dig one hole fo trap da good guys,
But dey da ones goin fall inside.
But da kine peopo dat do da right ting erytime,
God goin give dem good tings
Cuz dey his kids.
11 Get rich guys dat tink dey da one
Dat know wat fo do erytime
But one guy dat no mo notting,
He undastan plenny,
He da one can figga if da rich guy fo real o not.
12 Wen eryting come out good
Fo da peopo dat stay do wass right,
Erybody tink, “Eh, dass awesome!”
But wen da bad kine peopo stay in charge,
Da peopo go hide.
13 Whoeva do stuff agains God,
An den try fo cova up wat dey wen do,
Garans stuff no goin come out good fo dem.
Whoeva do stuff agains God,
But den dey tell God dey wen do wass wrong,
An no make lidat no moa,
God give dem chance.
14 Da peopo dat no do notting bad
Cuz dey erytime come real sked wat goin happen,
Dey can stay good inside.
But da ones dat no kea cuz dey hard head,
Dey goin fall down real hard,
An bad tings goin happen to dem.
15 Wen one leada guy stay bad,
An da peopo dat no mo notting
No can do notting bout da guy,
Dey feel jalike get one lion
Dat make big noise fo bite um,
O jalike get one bear dat stay chase um.
16 Wen get one leada guy dat no can tink,
He ony like put presha
Fo peopo give him stuff.
But da leada guys dat no take
Unda da table kine money,
Dey goin live long time.
17 Wen one guy kill anodda guy,
Goin bodda da killa guy, till he mahke.
An no good, odda peopo try fo kokua him.
18 Whoeva live so nobody can poin finga him,
God goin help dat kine guy.
But whoeva live crooked kine,
Watevas he goin do, he goin fall down hard.
19 Da guy dat farm his land
Goin get all da food he need.
But da guy dat ony do wase time kine stuffs
No goin get notting.
20 Da kine guy you can trus erytime,
God goin do plenny good tings fo him.
But da kine guy dat try hard fo come rich fas,
God goin punish him.
21 No good, you no make same same fo erybody.
But get guys dat goin broke da rules
If you give um even one small piece bread.
22 Da greedy kine peopo
Dat like come rich real fas,
Dey donno dat bumbye,
Dey goin come broke an no mo notting.
23 Whoeva do wass wrong,
An you tell um wat he do stay wrong,
Bumbye he goin show you plenny respeck.
But if you talk jalike no mo notting wrong,
An eryting stay okay,
Den da odda guy no goin get respeck fo you.
24 Whoeva go steal from dea faddah o muddah
An tell, “Az all right,
Wat I wen do, no goin bodda dem!”
He jalike da guys
Dat stay kill odda peopo!
25 Da greedy guys,
Dey da ones make erybody like fight.
But da guys dat stay trus Da One In Charge,
He goin make eryting come real good fo dem.
26 Whoeva tink da way dey tink is right erytime,
Dey tink dey know eryting but dey donno.
But whoeva know wat fo do erytime,
An live lidat,
Dey no goin get hurt.
27 You give stuff to peopo dat no mo notting,
God goin make shua you no goin need notting.
You make jalike you donno notting
So you no gotta see da peopo dat no mo notting,
Bumbye goin get kahuna put on top you
So you no can do notting.
28 Wen da bad guys stay in charge,
Erybody go hide.
Wen da bad guys come wipe out,
Get mo plenny peopo dat stay do wass right.