Help Me Wen I Sick
Fo da main music guy, one David kine song fo sing um wit da eight-string harp
6:1: Songs 38:1Eh! You Da One In Charge!
No scold me wen you stay huhu!
No punish me wen you stay mad!
Eh! You Da One In Charge!
Be good to me, cuz my body stay weak!
Make my body come good,
Cuz I sked an shaking all ova.
I all bus up inside,
Cuz I sked plenny.
Eh! You Da One In Charge! How long goin be lidis?!
Eh! You Da One In Charge!
Change yoa mind! No let me mahke!
You erytime stay tight wit yoa peopo,
So get me outa dis trouble!
You know, da mahke peopo no can tink bout you no moa.
Inside da Mahke Peopo Place, no mo nobody tell good tings bout you.
I stay tired cuz I stay moan all da time.
Ery nite, I cry till da bed all wet.
My pillow wet cuz I stay crying.
Cuz I get plenny trouble,
My eyes look tired an come weak.
Cuz a all da peopo dat stay agains me,
My eyes no stay strong no moa.
6:8: Matt 7:23; Luke 13:27Eh! All you guys dat do real bad kine stuff!
Beat it awready!
Cuz Da One In Charge, he wen hear me cry.
Da One In Charge, wen I aks him
Fo be good to me, he lissen.
Wen I pray to him, he tell, “Okay.”
10 All da peopo dat stay agains me,
Dey goin come shame an sked outa dea mind!
Cuz dey real shame,
Dey goin run away quick.

6:1 6:1: Songs 38:1

6:8 6:8: Matt 7:23; Luke 13:27