40
One Guy Tell Da One In Charge “Mahalo!”
Fo da main music guy, one David kine song
I wen wait an wait
Fo Da One In Charge help me.
Wen I wen yell fo help,
He wen turn to me fo lissen wat I tell.
He wen pull me up
Jalike he pull me outa one big hole
Wea I litto mo mahke.
He pull me outa dea,
Jalike outa da sticky mud
Fo make me stan on top one big rock
Fo me walk an no fall down.
He wen put inside my mout
One song I neva sing befo,
One song dat tell
How awesome oua God stay.
Goin get plenny peopo
Dat goin see wat he wen do.
Dey goin come all sked cuz a dat,
An den, dey goin trus
Da One In Charge!
Da peopo dat trus Da One In Charge,
Dey stay good inside.
Dey no need aks fo help
From da peopo dat ack big head,
O dat lissen to da bulaia guys.
Eh! You Da One In Charge! You my God,
An you do plenny awesome kine stuff!
You do awesome kine tings fo us guys!
Da tings you plan fo do,
Az good fo us guys!
No mo nobody jalike you!
I like tell peopo wat you do,
But get uku plenny stuff fo tell,
No can tell eryting!
40:6: Heb 10:5-10Sacrifices an gifs,
Az not da main ting
Fo make you come good inside—
You, Da One In Charge!
You neva tell I gotta make
Burn up kine sacrifices fo you,
O da kine sacrifices
Fo hemo da shame
Fo da bad tings I wen do.
But you wen give me my ears fo lissen.
If I lissen wat you tell, an I do um,
Fo shua, dat make you
Come good inside!
Den I tell, “Dass it!
I stay ready!”
I like do wat you wen write
Inside yoa roll up book
Bout wat you like me fo do.
You my God,
An wen I do wat you like fo me do,
Dat make me come good inside!
Da Rules you teach stay inside me.
Wen choke plenny peopo
Come togedda,
I tell um
Dat you erytime do da right ting.
Eh! Da One In Charge,
You know awready
Dat weneva I talk bout dat,
I no hold back notting.
10 Fo shua wen you judge peopo,
You do um da right way,
An I neva ack jalike I donno dat.
I wen talk plenny bout how peopo trus you,
An how you get um outa trouble.
I neva hold back
Fo tell all da peopo dat come togedda
Dat you stay tight wit yoa peopo,
An dat you tell da trut erytime!
Da Guy Aks Da One In Charge
Fo Help Him
11 Eh! You Da One In Charge!
No hold back bumbye
Fo do da tings dat show
You get love an aloha fo me.
Try make shua
Notting bad happen to me,
Cuz you stay tight wit yoa peopo,
An you tell da trut.
12 Cuz all aroun me
Get peopo do bad kine stuff,
Mo plenny den I can figga.
Da bad kine stuff catch up wit me.
I no can see good!
I get choke plenny trouble,
Mo plenny
Den da hairs on top my head.
I like be strong,
But no can!
13 Eh! You Da One In Charge!
Do someting good fo me
An get me outa dis!
Eh! You Da One In Charge!
Try hurry up an come help me!
14 All da ones dat like kill me,
I like dem fall down an come shame.
Da ones dat feel good inside
Wen someting bad happen to me,
I like God make dem plenny shame.
15 Da ones dat tell me “Ahana kokolele!”
I like dem come supa plenny shame!
16 All da peopo dat like know you
Fo real kine,
I like fo dem stay real good inside,
An dance an sing!
Da ones dat get love an aloha fo you
Cuz you get um outa trouble,
I like fo dem tell all da time,
“Da One In Charge, he da greates!”
17 But me, I no mo notting.
I ony get hard time.
I like you, my Boss, tink bout me!
Cuz eh! You my helpa!
You my God! No wait!
No take long time, aah?!

40:6 40:6: Heb 10:5-10