44
God, Take Kea Yoa Peopo!
(Rome 8:36)
Da Korah ohana guys make dis song fo da main music guy.
1 Eh God! Us guys wen hear da stories
Dat oua ancesta guys wen tell
Bout all da tings you wen do befo time.
Dass was long time befo time
Wen dey stay alive.
2 Was cuz a yoa powa
Dat you wen throw out
Da odda peopos.
Dis jalike you wen plant yoa peopo
Ova hea.
You wen hurt da odda peopos plenny,
An make yoa peopo grow plenny.
3 Oua ancesta guys
Wen take ova dis land,
But no was cuz dey good wit swords
O mo strong.
Da main ting dat wen help dem fo win,
Was cuz you stay strong.
Cuz you like dem,
An you like do good tings fo dem.
4 Eh God! You da king dass ova me!
You da one
Dat make us Israel guys win!
5 Cuz a you, God, us guys can poun
Da ones dat stay agains us.
Cuz us guys yoa guys,
Us can walk all ova da ones
Dat like make war agains us.
6 Jus cuz I can shoot arrows wit my bow,
Dat no mean I can trus da arrows.
Jus cuz I get one sword,
Dat no goin get me outa trouble.
7 Cuz you da one
Stay get all us guys outa trouble.
You da one dat make
Da guys dat stay hate us,
Come shame.
8 All day us guys tell,
“God, he da greates!”
We make shua erybody know foeva
Wat kine god you!
(Time out fo da music.)
9 But now, God,
You make us guys
Jalike we notting.
You make us guys come shame.
You no go wit oua army guys fo fight.
10 You make us guys run away
From da guys dat stay agains us.
Da peopo dat hate us,
Dey rip off oua stuffs.
11 You let odda guys kill us,
Jalike us guys sheeps fo kill an eat.
You throw us guys all ova da place,
Fo come prisonas
A all da odda nations.
12 Jalike you wen go sell yoa peopo
Even fo cheap,
Jalike you neva
Make money from dem.
13 You wen let da peopo
Dat live close by us guys
Talk stink bout us
An make any kine
An laugh at us guys.
14 You wen set us up
Fo da odda peopos talk bout us,
An da odda nations
Shake dea heads at us.
15 All da time, I ony can tink
Bout how I no mo respeck,
An how I lose face in front erybody,
16 Cuz a da way dey make me come shame
An talk bad bout me,
Da ones dat stay agains me
An like pay me back,
Dey get in my face.
17 All dis kine stuff wen happen
To us guys awready,
An still yet, us guys neva foget you.
We neva broke da deal
You wen make fo us guys.
18 Inside, us guys neva bag from you,
Oua feets neva go off
Da way you like us fo go.
19 Cuz jalike you wen bus up us guys
An leave us inside one place
Wea ony get wild dogs.
Jalike you wen make eryting
Dark aroun us.
20 Ony if us guys wen foget
Wat kine god you,
Da One we pray to,
O if us guys wen go pray
To da gods dat odda peopos pray to,
21 You tink God neva know dat,
O wat?!
Cuz he da One know eryting
Dat us stay hide inside us.
But dass not how was.
22 ✡44:22: Rome 8:36Cuz us guys, yoa peopo,
All da time odda guys stay kill us.
Dey make us jalike we sheeps
Dat dey kill fo sell da meat.
23 Eh! You da boss fo me!
Wake up!
How come you stay sleeping?!
Wake up! No bag
From us guys all da time!
24 How come you no like
Even look at us guys?
How come you stay foget
How plenny us guys hurt,
An da hard time we get
From odda peopos?
25 Jalike oua life come notting
On top da dirt,
An us no can get up from da groun.
26 Do someting fo help us guys!
Cuz you da one
Dat stay tight wit yoa peopo
An do good tings fo dem erytime!