45
One Wedding Song Fo Da King
Fo da main music guy sing um jalike da song “Lily Flowas.” Da Korah ohana guys make dis kine love song, fo make peopo tink plenny.
1 Inside me, jalike I come excited
Fo tell bout one real good ting.
I stay make dis song fo da king,
Jalike I one writa guy
Dat know how fo tell one story
Fo real kine.
2 From all da guys dat get,
You da mos good looking.
Erytime you talk, show you get aloha.
Az why God do good tings fo you erytime.
3 Tie yoa sword aroun yoa wais!
You one real strong guy!
You look jalike one king,
An you awesome!
4 You da winna erytime!
Az why you get respeck!
Az why wen you ride on top yoa horse
Cuz you da leada guy,
You fight fo show
Dat peopo can trus you.
An you show dat you no mo big head
Wen you do wass right.
I like fo you use yoa strong powa
Fo do awesome kine tings.
5 Sharp, da arrows you shoot!
Dey go inside da hearts a da peopo
Dat stay agains you, da king.
Dey fall down an mahke
Unda yoa feets.
6 ✡45:6: Heb 1:8-9God give you da right fo sit
On top yoa throne foeva,
Cuz you do eryting da right way.
An dass how come
You carry da spesho stick
Dat show you da king.
7 You like wen stuff stay right
An no like wen stuff stay wrong.
Dass why God wen pick you
Fo come da king.
He wen pour olive oil on top yoa head,
An not on top yoa frenz head,
Fo you stay good inside
Cuz he wen pick you.
8 All yoa clotheses smell nice
From da sap an da bark
Dat dey use fo make perfume.
From inside da palaces
Wea get plenny nice kine stuff
Wit ivory on top,
Dey make music
Fo make you feel real good.
9 Some a da palace ladies,
Dea faddahs stay kings.
Da one you goin marry,
You show she importan
Cuz she stan right dea
On da right side a you,
An she wear da bestes gold jewelry,
Da kine dat come from Ofir.
10 I like tell her dis:
“Eh, lissen an look at me,
An tink plenny
Bout wat I stay tell you.
Foget dem from now,
Da peopo from da odda country
Wea you wen born.
Foget da ones
From da time you wen live
Inside yoa faddah house.
11 Wen da King like make love to you,
Cuz you real good looking,
Do jalike he like,
Cuz he stay in charge a you now.
12 You da princess from Tyre.
Da rich peopo from dat land,
Dey goin bring you all kine present
Fo make you tink good bout dem.”
13 Da princess dat da king goin marry
Stay inside da palace.
Awesome, how good looking her!
Her dress get gold net all ova
Fo hold da jewelry stones.
14 Da peopo bring her by da king,
All dress up spesho kine.
Dey bring in her bridesmaids too,
Afta her.
Dey her frenz,
Fo bring dem by you, da king.
15 Wen da peopo bring da wahines inside,
Erybody feel good inside
An dance an sing.
Da wahines go inside da palace
Wea da King stay.
16 You da king,
An yoa ancesta guys was kings too.
But now, you goin get boys
Dat come from you fo come kings.
You goin put um in charge
All ova da land.
17 I goin make shua
Da peopo dat goin live bumbye
Goin know wat kine king you,
An same ting fo da peopo
Dat come afta dem.
Dass why all da diffren peopos
Goin tell dat you good,
Fo real long time afta.