83
Da Odda Peopos Come Agains Us
Asaf wen make dis Song Fo God.
1 God, no jus say notting!
No go easy!
No hold back fo do someting, God!
2 Eh! Da diffren peopos
Dat stay agains you,
Dey stay amping out
An making big noise.
Da ones dat hate you,
Dey make tantaran fo make
Jalike dey goin bus you up.
3 Dey stay make one sly kine plan
Fo wipe out yoa peopo.
Dey come togedda fo talk
Bout how dey goin go afta
Da peopo you love.
4 Dey tell, “Go come!
We go wipe out
Da whole Israel nation!
Fo nobody rememba
Da Israel name no moa!”
5 Cuz da ones dat stay agains you,
Come togedda fo figga out
Wat dey goin do to you.
An dey make one deal fo bus you up—
6 Dey da Edom peopo
An da Ishmael peopo,
Da Moab peopo
An da Hagrim peopo,
7 Da Gebal peopo an da Ammon peopo
An da Amalek peopo,
Da peopo from Filisha,
An da ones dat live Tyre town.
8 Da Assyria peopo join dem too.
Dey all help da peopos
Dat get Lot fo dea ancesta.
(Time out fo da music.)
9 ✡83:9 a: Local 7:1-23; b: Local 4:6-22Make to dem jalike you wen make
To da Midian peopo befo time,
Jalike you wen wipe out
Sisera an Jabin nea da Kishon Riva,
10 Da time oua peopo
Wen wipe dem out nea Endor,
An da mahke bodies wen rot
An come jalike manua
Fo da groun ova dea.
11 ✡83:11 a: Local 7:25; b: Local 8:12Make dea alii guys come
Jalike Oreb an Zeeb.
Make all dea leada guys come
Jalike Zebah an Zalmunna,
12 Da guys dat wen tell,
“Eh! Us guys goin go take ova
Da good grass places
Dat God make fo da sheeps,
Fo all dat come oua property!”
13 But you my God.
Make dem guys jalike da loose weeds,
An jalike da junks from da wheat
Dat da wind blow all aroun.
14 Jalike da fire burn da whole fores
O burn up stuff all ova da mountains,
15 Same way, go sen yoa storms
Fo chase dem guys away.
Sen yoa hurricanes
Fo make dem come real sked.
16 Make dem lose face an come shame,
fo dem like find out bumbye
Wat kine god you, Da One In Charge.
17 I like fo dem come shame an sked foeva.
I like fo dem mahke
Cuz dey lose face to da max!
18 You, yoa name Da One In Charge!
I like dose peopos know
Dat no mo anodda god jalike you!
You da God Dass Mo Importan
Den All Da Odda Gods!
You stay in charge a da whole world!