84
Song Fo Go Da Temple
Fo Da One In Charge
Fo Da One In Charge
Fo da main music guy sing um wit da kine harp dey make Gat side. One Korah ohana kine Song Fo God
1 Eh! You Da One In Charge!
Real nice looking,
Da place wea you live!
You da Boss
Ova All Da Armies!
2 Me, I excited fo go inside da open lanai
Aroun da Temple
Fo Da One In Charge!
I like go dea, mo den I can handle.
I goin sing fo da God Dat Stay Alive
Cuz I stay real good inside!
I goin all out fo yell fo him!
3 Wea God stay, even
Da small sparrow bird can find
One place dea fo make house.
Da swallow bird can make her nes
An take kea her bebes
Nea God altar places!
Dass Da One In Charge,
Da God Ova All Da Armies.
He da King fo me, an he my God.
4 Erybody dat come God house all da time,
Dey can stay good inside!
Dey erytime tell how good him.
(Time out fo da music.)
5 Erybody dat stay strong
Cuz Da One In Charge
Stay tight wit dem,
Dey da ones stay good inside.
Dey da ones dat feel lidis,
“I goin go Jerusalem
Fo show God respeck!”
6 Even wen dey go from one side
To da odda side a da dry
Balsam Tree Valley,
Dey make um jalike get
One real nice watta spring ova dea!
Jalike da fall rain make pond
All ova da place!
7 Dey stay come mo an mo strong.
All a dem goin show up
in front God, Jerusalem side.
8 Eh! You Da One In Charge!
You da God Ova All Da Armies!
Dis, my prayer to you,
So lissen!
You da God fo us Israel peopo.
(Time out fo da music.)
9 Eh God! Look da king guy,
Dat proteck us guys,
Jalike one shield!
Try do good tings fo him, aah?
Him da guy you wen pick.
10 Eh God! Mo betta I stay one day
Inside da open lanai fo yoa Temple
Den stay tousan day odda place!
Me, I like be one security guard
Dat stan by yoa gate,
Mo den I like live wit da peopo
Dat stay do bad tings!
11 Cuz oua God, Da One In Charge,
He show us guys wea fo go
Jalike wen da sun shine.
An he proteck us guys
Jalike one shield.
He like do plenny fo us guys,
An he make us come mo awesome.
Da One In Charge,
He no goin hold back notting good
From da peopo dat stay do wass right.
12 Eh! You Da One In Charge!
You da Boss Ova All Da Armies!
Erybody dat stay trus you,
Dey stay good inside!