97
God Win
1 Da One In Charge, he da king!
I like erybody inside da world
Stay good inside cuz a dat!
I even like all da islans
Go dance an sing!
2 Us guys no can see
Wat Da One In Charge stay do,
Cuz heavy an dark,
Da clouds all aroun him!
Us know he goin stay da king foeva,
Cuz he do wass right erytime,
An he judge da right way erytime.
3 Get fire dat go in front him
An burn up all da ones aroun him
Dat stay agains him.
4 Weneva he make lightning
Light up da world!
Da world see wass happening
An shake plenny.
5 Wen Da One In Charge show up,
Da mountains melt in front him
Jalike wax.
Cuz he da boss fo da whole world.
6 Da sky show dat he stay do
Da right ting erytime,
All da diffren peopos see
How awesome Da One In Charge stay.
7 All da ones dat get
Idol kine gods fo dea boss,
Goin come shame!
All da ones dat stay talk big
Bout dea idol kine statues,
Same ting!
Eh, all you gods!
Put yoa face on top da groun
Fo show respeck fo da God dass fo real!
8 Da One In Charge, wen you judge peopo,
You judge um da right way erytime.
Az why da peopo dat live Mount Zion
Hear bout Da One In Charge,
An stay good inside.
Same ting fo da peopo
Dat live in da odda towns
All ova da Judah land!
9 Cuz you, Da One In Charge,
You da mos importan one
In da whole world!
Erybody know, you mo importan
Den all da odda gods!
10 You guys dat get love an aloha
Fo Da One In Charge,
Good, you stay hate
Da bad tings peopo do,
Cuz Da One In Charge take kea
Da ones dat stay tight wit him.
He get um outa trouble
Wen da bad guys come afta dem.
11 God do good tings
Fo da peopo dat get um right wit him,
God make um shine bright.
Da peopo dat do wass right,
God make um stay real good inside.
12 All you peopo dat do wass right erytime,
You can stay good inside
Cuz a wat Da One In Charge stay do!
Go tell dat he da greates,
Cuz he stay good an spesho!