96
God Da King Fo Erybody
(Jesus Guys 17:31)
Sing one new song fo Da One In Charge!
Erybody inside da world,
Sing fo Da One In Charge!
Sing fo Da One In Charge!
Tell how he da kine God
Dat give you da powa fo do
Eryting he like you fo do!
Ery day, tell da good stuff
Bout how he get you outa trouble!
Wen you stay wit da diffren nations
Tell da story bout
How awesome Da One In Charge stay!
Wen you stay wit all da diffren peopos,
Tell how da tings he do
Blow yoa mind!
 
Cuz Da One In Charge, he big!
Good fo erybody tell
Good tings bout him!
You gotta get respeck fo him,
Mo den fo all da odda gods!
You know, da gods fo da odda peopos,
Dey no mo powa notting,
But Da One In Charge,
He da One wen make da sky!
 
All aroun Da One In Charge,
Eryting stay awesome!
Eryting aroun him show dat he da king!
Inside da place dat stay spesho fo him,
Can see how strong an unreal he stay!
 
96:7: Songs 29:1-2Eh, all you diffren peopos,
Wit all yoa ohanas,
Tell dis:
“Da One In Charge, he awesome!
He strong!”
Tell dis too:
“Da One In Charge,
We know wat kine god him,
An he awesome fo shua!”
Wen you go inside
Da open lanai fo his Temple,
Bring someting fo show
You get respeck fo him.
Wen Da One In Charge let you see
How good an spesho he stay,
Go down in front him
Fo show love an respeck!
You peopos from all ova da world,
Goin come sked an shaking in front him!
 
10 Tell all da diffren nations, “Da One In Charge, he da King!
Fo shua, da world stay solid,
No can throw um off.
Wen Da One In Charge judge all da diffren peopos,
He judge um da right way!”
 
11 God tell,
“All you peopo inside da sky,
Dance an sing!
All you peopo inside da world,
Yell cuz you feel good inside!
Good, da ocean
An eryting inside da ocean,
Make big noise jalike thunda!
12 Good, in da country, all da plants dea,
Dance an sing!”
Den, all da trees inside da fores
Goin stay good inside an yell
13 In front Da One In Charge,
Cuz he stay come hea!
He stay come fo be
Da Judge fo da whole world.
He goin judge erybody in da world
Da right way.
He goin show da peopos
Wass da trut fo real kine
Fo dem trus him.

96:7 96:7: Songs 29:1-2