29
Da Storm Show How Strong God
One David kine Song Fo God
1 ✡29:1: Songs 96:7-9Eh, you peopo dat live inside da sky!
Tell dis to Da One In Charge!
Tell Da One In Charge,
You know he awesome, an he strong!
2 Tell Da One In Charge,
You know wat kine god him, an he awesome!
Wen you go down in front Da One In Charge,
Put on spesho kine clotheses
Cuz he good an spesho.
3 Wen Da One In Charge tell someting,
Can hear um all ova da ocean,
Mo loud den da big waves.
Wen da awesome God talk,
Soun jalike wen one storm wit thunda come ova da big ocean.
4 Wen you hear Da One In Charge tell someting,
You know he strong.
Wen he talk,
You know he awesome.
5 Wen Da One In Charge tell someting,
Even da big cedar trees come broke.
Da One In Charge make da cedar trees dat grow Lebanon side
Come all bus up.
6 Wen Da One In Charge talk,
He make da Lebanon mountains jump
Jalike one bebe cow,
He make Mount Hermon jump
Jalike one bebe wild cow.
7 Wen Da One In Charge tell someting,
Az jalike wen da lightning
Come down an make fire
8 Wen Da One In Charge tell someting,
Get earthquake inside da boonies,
Even inside da Kadesh boonies too.
9 Wen Da One In Charge tell someting,
He make da deer wahines born dea bebes
An da trees come bolohead
But inside da Temple wea Da One In Charge stay,
Erybody yell, “God, he awesome!”
10 Da One In Charge, he get his throne ova da big flood,
Da One In Charge, he stay king foeva.
11 Da One In Charge, he make his peopo strong!
Da One In Charge, he do good tings fo his peopo
An make eryting come good fo dem!