28
Wen Da Bad Guys Show Up,
Da One In Charge Take Kea Me
Da One In Charge Take Kea Me
One David kine song
1 Eh! You Da One In Charge! You da Guy!
You strong, jalike one big rock!
I stay yell to you! I like fo you help me!
So no go make deaf ear!
Cuz if you no do notting,
I goin be jalike da peopo
Dat litto mo mahke
An go inside da Deep Dark Hole!
2 Try lissen! Ova an ova, I aks you fo do someting
I stay yell to you fo help me.
I stay stan nea da mos spesho part a yoa Temple
An I put up my hands fo pray to you.
3 No drag me away jalike I one bad guy,
Da kine guy dat erytime do bad kine stuff,
Da kine guy dat talk with dea frenz jalike dey get aloha,
But same time, dey tink dey like do bad tings to peopo.
4 ✡28:4: JShow 22:12Pay dem back fo da tings dey do,
Fo da bad kine tings dey make happen.
Check out wat kine tings dey stay do, an pay um back,
Punish um da way wat stay right fo wat dey do.
5 Cuz dey no mo respeck fo da kine tings you stay do, Da One In Charge.
An cuz dey tink da work you do, ony junk!
Eh! You Da One In Charge! You goin bus up dem bad guys!
You no goin let um come strong one mo time!
6 Eh! You Da One In Charge! I like tell you “Mahalo plenny,
Cuz you wen lissen wen I wen aks you fo help me!”
7 Da One In Charge, he da One make me strong,
An he jalike one shield fo no mo notting hurt me.
Inside I trus him.
Da One In Charge wen give me powa.
He wen help me, an I stay good inside.
I like how awesome he stay
Dass why I sing dis to him
8 Da One In Charge,
He da One make his peopo strong.
Da king dat Da One In Charge wen pick,
Da One In Charge get him outa trouble.
Da One In Charge,
He jalike one strong wall,
Az why no mo notting can hurt da king.
9 Eh! You Da One In Charge!
Get yoa peopo outa trouble
An give dem da powa fo do
Da tings you wen make um fo do, cuz dey yoa guys.
So, take kea dem, an back dem up foeva!