101
Da King Make One Promise To God
One David kine Song Fo God
1 I goin stay tight wit you,
Da One In Charge,
An I goin judge peopo da right way.
Dass wat I stay sing bout now.
I stay sing dis fo you,
Da One In Charge.
2 I goin tink plenny bout how fo live
Fo nobody poin finga me.
So den, wen you goin come by me?
Wen I stay inside my palace
Fo judge peopo,
I goin know
Nobody can poin finga me.
3 I no goin even look
At good fo notting kine stuff.
I hate peopo dat make
Crooked kine deals.
I no goin do notting lidat!
4 I no goin take all da crooked kine stuff peopo talk bout.
I no goin even know how
Fo do wass bad.
5 Anybody go talk bad bout his fren,
So da fren no can hear wat he tell,
I goin wipe out da guy dat talk bad.
Anybody tink dey it
An odda peopo ony junk,
I had it wit dem too.
6 I goin look good fo find out
Who fo trus inside dis land,
Fo dem live wit me.
Da ones dat stay live da way
Nobody can talk bad bout dem,
Dey goin be my helpa guys.
7 Nobody dat bulai peopo
Goin stay inside my palace.
Nobody dat tell tings dat not true
Can come in front me.
8 Firs ting ery day, I goin wipe out
All da peopo inside dis land
Dat stay do bad kine stuff.
I goin cut off da ones
Dat stay do wass wrong
Fo dem no live inside da town
Wea Da One In Charge live.