129
Da Israel Peopo Suffa Plenny
Song fo sing wen you go up to da Temple Fo God
All you Israel peopo, tell dis to erybody:
“From da time us guys
Come one nation,
All da time
Peopo presha us guys plenny!”
Da Israel peopo tell, “Az right!
From da time us guys
Come one nation,
All da time peopo
Presha us guys plenny!
But dey neva ovathrow us!
Fo shua, dey make us suffa plenny,
Jalike one farma run ova us
Wit one plow
An make deep cut all ova oua back!
But Da One In Charge,
He do da right ting erytime!
Wen da bad kine peopo
Tie us up wit ropes,
Da One In Charge cut da rope
An let us go.”
Dey Tell God Fo Wipe Out
Da Peopo Dat Stay Agains Dem
“All da peopo
Dat hate us Jerusalem guys,
Us guys like fo God
Make um come shame
An go home cuz dey da loozas.
Us guys like dose peopo come
Jalike da kine grass dat come out
From one crack in one flat roof,
Dat come all dry
Befo you pull um out.
No good cut dat kine grass fo harves
O fo grab some fo eat.
Da guy dat tie up da wheat
Dat da odda guy harves,
He no goin put dat kine grass
Wit da wheat he tie up fo his boss.
Da peopo dat pass by da place
Wea dey pull out da grass,
No good dey tell,
‘Us guys like Da One In Charge
Do plenny good tings fo you,’
Da way dey tell da ones dat harves
Da real kine food,
An no good da peopo dat harves
Ony dry grass ansa back,
‘Us guys like Da One In Charge
Do good tings fo you too!’
Da way da ones dat harves
Da real kine food tell.”