130
He Tell God Fo Help Him
Song fo sing wen you go up to da Temple Fo God
1 I feel jalike I down inside da deep watta,
Cuz a da trouble I stay in.
An from dea, I yell fo you help me,
Da One In Charge!
2 You da boss fo me,
So lissen wat I stay tell!
Try lissen real good
Cuz I beg you fo help me!
3 Da One In Charge, I know
You no make one lis
A all da bad tings da peopo do,
Cuz if you make one lis lidat,
Fo shua no mo nobody
Goin stay alive!
4 But if peopo tell you fo let dem go
An hemo dea shame,
You let um go an hemo dea shame.
Dass how come peopo
Get choke respeck fo you.
5 I stay wait, cuz I know
Da One In Charge goin do someting.
I know wat he tell, an dass why
I stay wait fo him help me.
An dass why I can hang in dea
An trus him.
6 I hang in dea an trus my Boss.
I feel jalike da army guys
Dat guard da town all nite.
An dey hang in dea an wait
Long time fo day time come,
7 All you Israel peopo,
Hang in dea
An trus Da One In Charge!
Cuz if you stay tight
Wit Da One In Charge,
He erytime stay tight wit his peopo.
Wen you wit him,
He do wateva he gotta do
Fo get you outa trouble.
8 ✡130:8: Matt 1:21; Tit 2:14Goin be Da One In Charge
Dat do wat he gotta do,
Fo hemo da shame
From da Israel peopo
Fo all da bad stuff dey stay do.