143
David Pray Fo God Help Him
One David kine Song Fo God
1 Eh! You Da One In Charge!
Try lissen wen I pray to you.
Cuz I stay beg you fo help me,
Lissen up!
Do someting fo help me,
Cuz I know I can trus you
An I know you do
Da right ting erytime.
2 ✡143:2: Rome 3:20; Gal 2:16No come hea jus fo judge me,
Yoa worka guy.
Cuz wen erybody stan in front you,
Fo shua no mo nobody dat stay alive
Can come right wit you.
3 Da peopo dat stay agains me,
Dey chase afta me,
Dey poun me on top da groun
Fo kill me.
Dey put me inside dark places,
Jalike da peopo
Dat stay mahke long time.
4 Inside, I feel jalike I goin pass out,
Inside, I all sked.
5 I no foget how was,
Long time befo time.
I tink plenny
Bout all da tings you stay do,
An da tings you wen do befo time.
6 I put up my hands an pray to you,
Jalike da dry groun dat need watta.
Az how I like stay tight wit you!
(Time out fo da music.)
7 Try do someting fo me real quick,
Da One In Charge!
Cuz I desperate!
No look da odda way
Fo me no see yoa face!
Cuz if I no stay tight wit you,
I goin come jalike da odda guys
Dat go down da Deep Dark Hole.
8 Ery day, morning time,
I like hear from you
Bout how you stay tight wit me,
Cuz I stay trus you fo eryting inside.
Let me know da way I suppose to go,
Cuz you da One fo me talk to.
9 Da One In Charge, get me outa trouble
From da peopo dat stay agains me.
I come to you fo you hide me.
10 Teach me how fo do
Wat you like me fo do,
Cuz you da God fo me.
I like fo yoa good Spirit show me
How fo walk strait so I no jam up.
Jalike I stay walk on top flat groun.
11 Da One In Charge, keep me alive,
Fo me show peopo wat kine god you!
You do da right ting erytime,
So get me outa trouble!
12 You stay tight wit me cuz I yoa guy,
So make da ones dat stay agains me
Shut up.
Wipe out all da ones
Dat make humbug to me,
Cuz I yoa worka guy.