144
Da King Pray
One David kine song
1 I like tell Da One In Charge “Mahalo!”
Cuz he do plenny good tings fo me.
I go by him fo hide,
Jalike he one big solid rock.
Him da one dat teach me how fo fight,
An how fo make war.
2 God stay tight wit me cuz I his guy,
Jalike he one strong wall
On top one mountain,
Dat nobody can climb ova
Fo come afta me.
He da One make shua
Notting bad happen to me,
Jalike he one shield I use
Fo no let nobody touch me.
He da One give me da powa
Ova da odda peopos.
3 ✡144:3: Job 7:17-18; Songs 8:4Da One In Charge, I no can tink
How come you like take kea peopo,
O how come you even tink
Bout us regula kine peopo.
4 Us peopo ony stay hea short time,
Jalike one breat us guys breave,
O jalike us one shadow
Dat pass by fas.
5 Da One In Charge, make da sky
Drop down low
Fo you come down hea!
Touch da mountains
Fo make da smoke come out.
6 Make da lightning hit da peopo
Dat stay agains you,
Fo make um run all ova da place,
Jalike you shoot um wit arrows
Fo make um so dey donno
Wat dey stay do.
7 Da peopo from anodda place
Stay attack me,
So put down yoa hand
From up dea wea you stay,
An no let dem capcha me.
Get me outa trouble,
Cuz dey jalike one flood
Dat can wipe me out.
8 But dem, wen dey talk,
No can trus wat dey tell.
Wen dey put up dea right hand
Fo make one promise,
Dey ony bulai.
9 God, I goin make one new song fo you.
I goin play music fo you
Wit one ten-string harp,
10 Cuz you da one
Dat get king guys outa trouble,
An no let nobody come afta me,
David, yoa worka guy,
Wit one sword fo kill me.
11 Da peopo from anodda place
Stay attack me,
So no let dem capcha me.
Get me outa trouble.
Wen dose peopo talk,
No can trus wat dey tell.
Wen dey put up dea right hand
Fo make one promise,
Dey ony bulai.
12 Wen oua boys grow up,
We like fo dem be
Jalike plants dat grow good.
We like fo oua girls come strong,
Jalike da nice looking kine pos
Dat da builda guys carve
Fo da corna pos
Aroun da king palace.
13 We like oua food storage place stay full
Fo give us all diffren kine stuff
Wen we need um.
We like oua sheeps an goats
Get plenny bebes,
Tousan times mo plenny
Aroun oua towns,
Ten tousan times mo plenny
In da country side.
14 We like da cows dat pull oua wagons
Pull heavy kine stuffs.
We like nobody bus up da walls,
O drag peopo outa dea home
Fo make um prisonas,
O make um cry on top da streets!
15 Da peopo dat live good lidat,
Dey can stay good inside!
Dey da peopo dat get
Da One In Charge fo dea God,
An fo shua, dey goin stay good inside!