8
Wahine:
1 Braddah an sistah guys az okay fo dem kiss each odda
Even outside in da street.
But us, we no can make lidat!
Try tink bout maybe you was jalike one braddah fo me
Dat wen breas feed from my muddah breases too!
Den if I find you outside,
Az okay fo me go kiss you,
An nobody goin tink dass shame.
2 If was lidat, den I take you,
An bring you my muddah house.
She da one dat wen teach me eryting.
I can give you wine wit spices fo drink,
Dat I wen make um wit da juice from my pomagrams.
(But az not how stay.)
3 His lef arm stay unda my head.
An his right hand stay aroun me.
4 You young Jerusalem wahines,
I like you make one promise to me:
No come real excited fo make love
Till da time stay right.
Frenz:
5 Who dis dat stay come up from da boonies,
Dat stay lean on top da one dat she love?
Wahine:
Wen you was sleeping unda da apple tree, I wen make you come all excited.
Az da same place yoa muddah wen come hapai wit you,
An da same place she hurt plenny wen she born you.
6 Inside, try tink plenny bout me,
Jalike I one seal on top yoa heart,
An jalike one seal on top yoa arm.
Cuz oua love stay real strong,
Jalike wen somebody mahke.
Wen you geev um an go all out fo somebody,
You no like let go da one you love,
Jalike da Mahke Peopo Place
No like give up da one dat mahke.
Love stay burn jalike one strong fire dat flash.
7 Plenny watta no can pio love.
Da rivas no can wash um away in one flood.
If somebody like give all da rich kine stuffs dey get fo buy love,
Fo shua peopo goin tell um,
“Az no good! Worth mo den dat!”
8 Long time befo time, my braddah guys wen tell,
“Us guys get one young sistah,
An her breases no come big yet.
Wat we goin do fo oua sistah,
Bumbye wen somebody tell dey like marry her?
9 If she stay strong jalike one town wall,
Us guys goin build silva towas on top her.
But if she easy jalike one door,
We goin put up cedar wood planks fo proteck her.”
10 Me, I strong jalike one wall,
An my breases stay jalike towas.
Da way da guy I love tink bout me,
Wit him, eryting stay good!
11 King Solomon get one grape farm Baal-Hamon side.
He rent his grape farm to odda guys.
Dey all pay him tousan piece silva fo dea share a da fruits.
12 Da tousan piece silva, az fo dem pay you, Solomon!
(An two hundred fo da guys dat take kea da fruits too.)
But me, da grape farm I own,
Az mines!
Guy:
13 Eh! You wahine dat live inside da gardens,
Wit yoa frenz aroun you,
Let me hear yoa voice!
Wahine:
14 You da one I love! Go come!
We go way togedda real fas!
Run jalike one young deer
On top da mountain wea da spice bushes grow!