Isaiah
Talk Fo God
1
Wat God Show Isaiah
(Rome 9:29)
1 ✡1:1 a: 2Kings 15:1-7; 2Rec 26:1-23; b: 2Kings 15:32-38; 2Rec 27:1-9; c: 2Kings 16:1-20; 2Rec 28:1-27; d: 2Kings 18:1–20:21; 2Rec 29:1–32:33Isaiah, Amoz boy, he wen talk fo God bout Judah an Jerusalem. Dat time, da king fo da Judah peopo was Uzziah, den Jotham, den Ahaz, an den Hezekiah. Dis book tell wat God wen show Isaiah.
Wat God Tell Da Judah Peopo
2 Lissen, erybody in da world an inside da sky,
Cuz me, Da One In Charge, da Good Boss, stay tell you dis:
“I wen take kea da Israel peopo
Jalike dey my kids, an help um grow up.
But still yet, dey go agains me.
3 Da cows know who own um,
An da donkeys know wea dea owna give um food.
But da Israel peopo, dey donno me.
Even my peopo no undastan notting bout me.”
4 Ho! Erybody from inside dea
Stay do plenny bad kine stuff,
Gotta punish um fo teach um.
Dem an dea braddahs, dey no do right kine stuff,
Dey da kine peopo dat like bus up eryting!
Dey go way from Da One In Charge.
Dey hate da God fo da Israel peopo dat stay good an spesho.
Jalike dey no like lissen an stay turn dea back on him.
5 Eh! How come you guys like
Fo God bus up you guys some moa?!
How come you guys still stay go agains him?!
Yoa head stay sore plenny awready,
An inside, you not strong.
6 From on top yoa head to undaneat yoa feet
You guys no even get one place dat stay good,
Ony get cut, scar, black an blue,
An bad open kine sore all ova.
Nobody clean out da pus,
Nobody put olive oil on top fo make um come sof,
An nobody put bandage on top um.
7 You guys land, nobody can live dea.
Yoa big towns stay all burn up.
You see da odda peopo take away
All yoa food from yoa fields an eat um.
An peopo from odda places take um ova.
8 My big town dea
Jalike one shack in da middo a one grape field,
An jalike fo guard one cucumba field,
Jalike one big town wit army guys all aroun,
Get ready fo bus up da town.
9 ✡1:9: Start 19:24; Rome 9:29Da One In Charge, Da God Ova All Da Armies,
If he neva leave us guys some peopo ova dea still yet,
Us guys goin come jalike da Sodom peopo,
An da Gomorrah peopo—no mo nobody dea.
10 So, lissen wat Da One In Charge tell you guys,
You leada guys dat ack jalike you from Sodom!
Lissen wat oua God stay teach,
You peopo dat ack jalike you from Gomorrah!
11 ✡1:11: Amos 5:21-22Da One In Charge tell dis: “You tink I need
Da plenny sacrifices you guys make?! No way!
I get mo den plenny boy kine sheeps
Dey can burn up fo make sacrifice,
An da fat stuff from da bestes animals.
I no need da blood from da bulls
An da bebe sheeps an da boy goats.
Dat no make me feel good inside.
12 Wen you guys come fo show face in front me,
Who tell you guys you gotta do dat?
An how come you guys walk all ova da open lanai fo my Temple, aah?!
13 No bring me one sacrifice dat no mean notting!
Da incense you guys burn fo me stay smell haunas.
You guys come togedda ery month an ery week
But I no like da kine meetings you guys make,
Cuz dey ony bad.
14 Yoa new moon meetings
An yoa odda spesho religious kine ceremonies,
Dey no make me feel good.
Dey jalike one heavy ting on top my back
Dat I gotta carry.
I had it wit um awready.
15 Wen you guys put up yoa hands fo pray to me
I goin look da odda way.
No matta you pray long time,
I no goin lissen.
Yoa hands stay dirty all ova
From da blood a da peopo you wen kill.
16 Wash! Go come clean inside!
Throw out all da bad kine stuff you stay do.
No do wass wrong no moa,
Dass right; no do um no moa!
17 Learn how fo do wass good.
Go all out fo do wass right.
Kokua da peopo dat need help
Fo da bad tings da bad guys do to dem.
Da kids dat no mo faddah o muddah, help dem.
Talk in court fo help da widow wahines.”
18 Da One In Charge tell:
“Come, we go talk togedda bout dis ting.
No matta all da bad kine stuff you wen do
Look jalike one big red spot now,
But dey goin come white jalike da snow.
No matta now jalike dey stay dark red,
Dey goin come white jalike da wool.
19 If you guys like lissen,
An tink da same ting jalike me,
You goin eat all da good stuff from da land.
20 But if you no lissen an no like do wat I tell you fo do,
Den odda peopo goin come wit dea swords
An wipe out you guys.
Cuz az me, Da One In Charge, Da Boss, dat tell dis.”
Da Peopo Inside Jerusalem
No Stick Wit Da One In Charge
No Stick Wit Da One In Charge
21 Bummahs! You see da peopo inside da big town
Dat I wen trus befo time,
Dey come jalike one hoa.
Befo time, dey stay tight wit me,
An wen dey judge peopo, dey do um da right way.
All da time dey stay do wass right.
But now, ony get guys ova dea
Dat ony like kill peopo!
22 Jalike you melt silva metal,
An keep da junks dat come up,
But throw way da good kine silva.
An yoa good wine jalike ony half watta.
23 Yoa leada guys, dey go agains me.
Dey hang aroun wit steala guys.
Dey all like get unda da table kine money
Fo eryting dey do.
Dey no make jalike one good judge
Fo kokua da kids dat no mo faddah o muddah.
Dey no even tink notting
Bout kokua da widow wahines.
24 Dass why dis wat Da One In Charge, da Boss, tell.
He da God Ova All Da Armies,
Da Strong One dat help da Israel peopo.
Az wat he tell:
“I goin fight an win
Ova erybody dat go agains me,
Fo dem no bodda me no moa!
I goin pay back erybody dat stay agains me.
25 I goin go agains you Jerusalem guys too,
Jalike I goin put you inside da fire
Fo take out all yoa junk kine stuff from inside you.
26 Den I goin bring good kine judge guys fo you guys, jalike befo time.
An akamai kine peopo dat can tell you guys wat fo do,
Jalike you guys wen get da firs time.
Afta dat, peopo goin call you guys
‘Da big town wea erybody do da right ting,’
An ‘Da town wea you can trus da peopo.’ ”
27 Da peopo dat stay go Mount Zion fo pray
Inside Jerusalem town,
God goin help dem get outa trouble,
He goin judge dem da right way.
Wen dey come back God side,
God goin do wass right fo dem.
28 But da peopo dat go agains me
An da ones dat stay do bad kine stuff,
I goin bus up all dem.
Me, Da One In Charge, an I goin wipe all dem out!
29 “Fo shua, you guys goin come shame plenny
Cuz you like go down in front da idol kine gods
Inside places wea get oak trees an garden.
30 Cuz a dat, you guys goin come jalike one oak tree
Wit leaf dat stay come all dry up.
An jalike one garden
Dat no mo watta.
31 Even da strong guys
Goin burn up jalike one dry leaf.
Eryting dey wen work fo make,
Goin come jalike one spark.
All da stuff dey make,
An da guys dat make um,
Goin burn up same time,
An no mo nobody can pio da fire.”
✡1:1 1:1 a: 2Kings 15:1-7; 2Rec 26:1-23; b: 2Kings 15:32-38; 2Rec 27:1-9; c: 2Kings 16:1-20; 2Rec 28:1-27; d: 2Kings 18:1–20:21; 2Rec 29:1–32:33
✡1:9 1:9: Start 19:24; Rome 9:29
✡1:11 1:11: Amos 5:21-22