2
Da One In Charge Goin Come King
(Micah 4:1-3; 2 Tessalonika 1:9)
1 Dis wat Da One In Charge, Da Boss, wen show Isaiah, Amoz boy, bout da peopo inside Judah an Jerusalem:
2 Bumbye, wen da world almos pau,
God goin make da hill wea da Temple Fo Da One In Charge stay,
Come da mos importan place in da whole world,
Mo importan den da odda hills.
Den all da peopo from odda countries
Goin come dea.
3 Den plenny peopos goin go dea an tell,
“Come on. We go up da hill wea da Temple stay,
Da Temple Fo Da One In Charge, da God Jacob pray to.
He goin teach us guys wat he like us fo do,
An we goin do um.”
Wat Da One In Charge teach goin come from him,
From Zion Hill inside Jerusalem town.
4 ✡2:4: Joel 3:10; Micah 4:3Wen diffren countries figga diffren kine bout someting,
Da One In Charge goin be da judge dat tell who a dem stay right.
He goin tell wat peopos stay right
An wat peopos stay wrong.
Den dey goin take dea swords,
An make um come plows.
Dey goin take dea spears,
An make um come knifes fo prune da plants.
Dat time, no mo country goin fight anodda country no moa.
Dey no even goin know how fo fight an make war no moa.
5 You peopo inside Jacob ohana,
Come. Us go walk
Wit light from Da One In Charge, an do wass right.
6 Cuz Da One In Charge, you wen leave yoa peopo awready,
Da Jacob ohana peopo.
Dey lissen da odda peopo from da east side, Babylon side,
So now dey even go call da spirit from da mahke peopo
Fo come tell um wat goin happen bumbye,
Jalike da Filisha peopo stay do.
Yoa peopo stay make one deal wit da odda peopos
Dat donno you.
7 All ova da Israel peopo land,
Get plenny silva an gold
An mo plenny rich kine stuffs den can count.
All ova da land, get plenny horse
An mo plenny war wagons den can count.
8 An all ova dea land, get plenny idol kine gods.
Dey go down an show respeck
Fo da tings dey make wit dea hands.
9 But now, erybody goin come shame.
Dey no goin get big head no moa.
Eh! You Da One In Charge! No let go dat kine peopo!
10 ✡2:10: JShow 6:15; 2Tess 1:9You Jacob ohana peopo,
Go down deep inside da rocks,
Hide inside da groun,
Cuz you stay sked an shaking
From all da stuff Da One In Charge goin do
Cuz he da awesome King!
11 Anybody dat get real high nose,
Dey goin come shame.
Anybody ack real high makamaka,
Dey goin come notting.
Dat time, Da One In Charge da ony One
Da peopo goin talk good bout.
12 Da One In Charge, he da God Ova All Da Armies.
Goin come one day, he goin go
Agains erybody dat get big head,
An agains all da peopo dat ack high makamaka.
God goin bring down da kine peopo dat tink dey importan.
He goin make all dat kine peopo come notting.
13 No matta da peopo tink dey importan
Jalike da tall cedar trees inside Lebanon
An da oak trees inside Bashan,
Dey goin fall down.
14 If dey tink dey tall
Jalike da tall mountains an hills,
15 An da tall towas,
An da strong wall nobody can bus up,
Da One In Charge can bus um up.
16 If peopo tink dey strong jalike da big boats dat go Spain,
Da nice looking boats,
Da One In Charge can sink um.
17 Anybody stay get real high nose,
Dey goin come notting.
Anybody ack real high makamaka,
Dey goin come shame.
Dat time, Da One In Charge da ony One
Da peopo goin talk good bout.
18 Da idol kine gods,
God goin broke um down.
19 Peopo goin go inside caves inside da big rocks,
An inside da big kine pukas undaneat da groun,
Cuz dey real sked a Da One In Charge.
He stay awesome cuz he da king,
An he goin start fo shake up erybody inside da world.
20 Dat time, da idol kine gods
Dat da peopo wen make from silva an gold
Fo go down an show um respeck,
Dey goin throw um all away
To da bats an da rats.
21 Dey goin go inside da cracks in da rocks
An da pukas in da pali,
Cuz dey real sked a Da One In Charge.
He stay awesome cuz he da king,
An he goin start fo shake up erybody inside da world.
22 No trus da peopo!
Da ones dat stay breave da air an stay alive,
But wat you can trus dem fo do fo you, aah?!
Notting!