1 Da One In Charge tell,
“You know wat?! Dat time, I goin bring back all da good kine tings
Dat belong to da Judah an Jerusalem peopo.
2 I goin bring all da nations togedda
Inside da Jehoshafat Valley.
I goin come fo judge dem ova dea,
An punish dem fo how
Dey wen make any kine to my Israel peopo,
Cuz da Israel peopo my property.
Cuz dose nations wen scatta my peopo all ova wea da odda peopos live.
Dey wen split up my land.
3 An dey wen pull straw fo take ova my peopo.
Dey trade da boy kine slaves fo pay da hoaz.
An dey sell da girls fo come slave girls,
An use da money fo buy wine
Fo dem drink um.
4 ✡ 3:4: Isa 23:1-18; Ezek 26:1–28:26; Amos 1:9-10; Zek 9:1-4; Matt 11:21-22; Luke 10:13-14✡ 3:4: Isa 14:29-31; Jer 47:1-7; Ezek 25:15-17; Amos 1:6-8; Zef 2:4-7; Zek 9:5-7“You Tyre an Sidon peopo, an all you Filisha districks, how come you guys stay agains me Da One In Charge? You guys figga you stay pay me back cuz a someting I wen do, o wat?! Cuz if you guys stay pay me back, I goin turn aroun right den an dea, an pay you guys back an make you come shame fo all da tings you guys wen do. 5 Cuz you guys wen take my silva an my gold, an carry away my bestes rich kine stuffs, an put um inside you guys temples. 6 You guys wen sell da Judah an Jerusalem peopo to da Greek peopo, fo you guys sen da Israel peopo far from dea land.
7 “Look, I goin bring dem outa da place wea dey stay cuz you guys wen sell dem. An I goin pay you guys back fo wat you guys wen do to dem. 8 I goin let peopo sell yoa boys an girls to da Judah peopo, an dey goin sell dem to da Sabean peopo, dat stay one far place.” Az wat Da One In Charge tell.
9 Tell all da peopos dis:
“Make ready fo fight one war fo Da One In Charge!
Make da strong guys ready fo fight!
I like all da guys dat fight fo come togedda fo attack.
10 ✡ 3:10: Isa 2:4; Micah 4:3Make swords from yoa plows.
Hamma yoa knifes dat you use fo prune da trees
Fo make spear poin outa dem.
Tell even da weak guys fo tell,
‘I stay strong!’
11 All you guys from da odda nations,
Come now real fas fo help each odda!
Go come togedda from all aroun dea
To da Jehoshafat Valley.
Da One In Charge, bring down yoa strong guys fo fight!
12 “Make da nations wake up.
Make um go up inside da Jehoshafat Valley,
Cuz me, Da One In Charge, I goin sit ova dea,
Fo judge all da nations from all aroun dea.
13 ✡ 3:13 a: JShow 14:14-16; b: JShow 14:19-20; 19:15Swing da sickle cuz da food stay ready fo harves.
Go come an step da grapes fo press out da juice,
Cuz da place stay full a grapes,
An da wine barrels stay full.
Dey stay full wit all da bad kine stuff da peopos stay do.”
14 Plenny peopo stay inside da valley
Wea da judge make up his mind.
Cuz da time stay nea wen Da One In Charge goin take ova
Inside da valley wea da judge make up his mind.
15 Da sun an da moon goin come dark,
An da stars no goin shine.
16 ✡ 3:16: Amos 1:2Da One In Charge goin make one big noise
From his temple on top Mount Zion.
His voice goin soun real loud from Jerusalem.
Da earth an da sky goin shake.
But Da One In Charge goin be jalike one place fo hide fo his peopo,
Jalike one strong place wea da Israel peopo can hide.
God Goin Do
Good Kine Stuff Fo His Peopo
Good Kine Stuff Fo His Peopo
17 Da One In Charge tell, “Den you guys goin know
Dat I yoa God, Da One In Charge.
I live on top Mount Zion, da hill dat stay spesho fo me.
All Jerusalem goin be spesho fo me.
Da odda peopos no goin take ova Jerusalem eva one mo time.
18 “Dat time, goin be jalike da mountains stay drip wit new wine.
An jalike milk goin run down da hills jalike rivas.
All da gulches inside Judah goin get plenny watta.
One watta spring goin come outa da Temple Fo Da One In Charge,
An goin give watta inside da gulch wea get koa trees.
19 But Egypt goin stay all wipe out.
Edom goin stay ony boonies, all wipe out too.
Cuz dey wen make any kine to da Judah peopo,
An dey make peopo bleed an mahke
Dat neva do notting wrong inside dea land.
20 Judah goin get peopo dat live dea all da time.
Jerusalem goin get peopo fo plenny generations.
21 I neva punish da Egypt guys an da Edom guys,
Da ones dat wen make my peopo bleed an mahke.
But now I goin punish dem!
Me, Da One In Charge,
Goin live on top Mount Zion,
My spesho place!”