2
1 You Judah guys dat no shame,
Bring da whole nation togedda!
2 Go come togedda befo da time start
Dat Da One In Charge come huhu!
Dat time goin come fas,
Jalike wen da wind blow da junks outa da wheat!
Go come togedda befo Da One In Charge catch up you guys,
Cuz he real huhu wit you!
Do um befo he punish you guys,
Cuz he real mad!
3 All you peopo inside da land dat no mo big head,
Dat do wateva Da One In Charge tell you fo do,
Try know Da One In Charge mo betta!
Try do da right kine stuff.
Try no ack big head.
Maybe he goin let you guys stay hide,
Da time wen he goin show he stay real huhu.
Da One In Charge Talk
Agains Da Filisha Peopo
Agains Da Filisha Peopo
4 ✡2:4: Isa 14:29-31; Jer 47:1-7; Ezek 25:15-17; Joel 3:4-8; Amos 1:6-8; Zek 9:5-7No mo nobody goin stay inside Gaza town.
An Ashkelon goin stay all bus up.
Befo noon time dey goin throw erybody outa Ashdod.
Dey goin pull up da Ekron peopo like weeds.
5 Az why hard! You guys dat live by da shore!
You Keret peopo,
You Canaan peopo, wea da Filisha peopo stay,
Da One In Charge grumble bout all you guys.
He tell, “I goin wipe you out!
No mo nobody goin stay dea!”
6 Da land by da sea, wea da Keret peopo stay,
Goin get ony sheep guys an sheep pens ova dea.
Da One In Charge Talk Bad Bout
Da Moab An Ammon Peopo
Da Moab An Ammon Peopo
7 Dat land goin be fo da peopo from da Judah ohana dat still stay,
Dey goin find green grass ova dea fo dea animals.
Wen come dark, dey goin lay down
Inside da houses wea da Ashkelon peopo stay befo time.
Dea God, Da One In Charge,
Goin bring back da Judah ohana
From wea dey was prisonas,
An take kea dem.
8 ✡2:8 a: Isa 15:1–16:14; 25:10-12; Jer 48:1-47; Ezek 25:8-11; Amos 1:13-15; b: Jer 49:1-6; Ezek 21:28-32; 25:1-7; Amos 1:13-15Da One In Charge tell: “I wen hear da Moab peopo
Talk bad bout my peopo.
I hear da Ammon peopo make fun a my peopo,
An talk bad bout um too.
Dey tell dey goin take ova da land wea my peopo live.”
9 ✡2:9: Start 19:24But Da One In Charge, Da God Ova All Da Armies, da God fo da Israel peopo, he tell dis too:
“Fo shua I stay alive!
Az why da Moab peopo goin come jalike da Sodom peopo,
An da Ammon peopo goin come jalike da Gomorrah peopo.
Inside dea land, ony goin get
Da kine weed dat make yoa skin itch,
An dry pukas full a salt,
Eryting goin stay all wipe out, foeva.
My peopo dat still stay alive goin rip dem off.
My peopo dat still stay alive, goin take ova dea land.”
10 Cuz dey get big head.
Dey talk bad an talk big
To da peopo fo Da One In Charge,
Da God Ova All Da Armies,
Dis wat goin happen to dem:
11 Da One In Charge goin make awesome an unreal kine to dem,
Wen he make all da gods all ova da world come weak.
Den even da peopos dat live on top da far islans,
Goin show Da One In Charge love an respeck inside dea land.
Da One In Charge Talk Bad Bout
Da Sudan An Assyria Peopo
Da Sudan An Assyria Peopo
12 ✡2:12: Isa 18:1-7“You Sudan peopo too,
I goin kill you wit my sword!”
13 ✡2:13: Isa 10:5-34; 14:24-27; Nahum 1:1–3:19An Da One In Charge goin use his powa agains da peopo north side too.
He goin wipe out da Assyria peopo.
Wen he pau, dea main town Nineveh goin stay wasted
An all dry jalike da boonies.
14 All kine wild animals goin lay down wea Nineveh was,
Da diffren animal nations.
Da owl an da heron goin sleep on top da poses fo da buildings.
Can hear um thru da windows.
Goin get bus up stuff all ova da places wea had doors.
Da fancy kine cedar wood goin come wasted from da sun an rain.
15 Dis da big town wea da peopo wen stay amp out.
Dey figga dey safe dea.
Dey tell each odda,
“Us guys, Numba One! No mo nobody stay jalike us!”
But bummahs! Dea big town wen come all bus up.
Ony get wild animals live ova dea!
Erybody dat walk by um
Ack sked an feel good cuz da town gone awready!
✡2:4 2:4: Isa 14:29-31; Jer 47:1-7; Ezek 25:15-17; Joel 3:4-8; Amos 1:6-8; Zek 9:5-7
✡2:8 2:8 a: Isa 15:1–16:14; 25:10-12; Jer 48:1-47; Ezek 25:8-11; Amos 1:13-15; b: Jer 49:1-6; Ezek 21:28-32; 25:1-7; Amos 1:13-15
✡2:9 2:9: Start 19:24
✡2:12 2:12: Isa 18:1-7
✡2:13 2:13: Isa 10:5-34; 14:24-27; Nahum 1:1–3:19