49
Agains Da Ammon Peopo
1 ✡49:1: Ezek 21:28-32; 25:1-7; Amos 1:13-15; Zef 2:8-11Dis wat Da One In Charge tell bout da Ammon peopo:
“You tink da Israel peopo no mo boys, o wat?
O you tink da Israel faddahs no mo nobody
Fo take ova dea land wen dey mahke?
Den, how come da Ammon peopo stay take ova da Gad ohana land
Fo dea god Molek?
How come dey take ova da Gad ohana towns an live dea?”
2 But Da One In Charge tell:
“Az why da time goin come
Wen I goin make erybody hear
Da trumpet blow fo war
Agains Rabbah town,
Da main town fo da Ammon guys!
Rabbah goin come one big pile a dirt
Cuz all da houses goin come bus up.
All da towns aroun Rabbah goin burn down.
Den da Israel guys goin kick out
Da Ammon guys dat wen kick dem out befo time.”
Dass wat Da One In Charge tell.
3 “You Heshbon peopo, yell real loud
Cuz you stay real sore inside
Cuz Ai town stay all bus up!
Yell, you small towns aroun Rabbah!
Put on burmbag kine clotheses
An cry jalike fo one funeral
Fo show you stay all bum out!
Cut yoa body fo make um bleed
An run all ova da place
Inside yoa town wall,
Jalike you donno wea fo go!
Az cuz da army guys dat goin come
Goin make yoa god Molek dea prisona,
An take away his pries guys an leada guys anodda land.
4 How come you Ammon peopo talk big
Bout how yoa valleys get plenny watta?
You guys, jalike one girl
Dat tell ‘Laytas’ to her faddah!
You Ammon peopo, ony trus yoa rich kine stuff,
An cuz a dat, you figga, ‘No mo nobody goin attack us guys!’
5 But you know wat I goin do?!
I goin make you guys come real sked a all da peopo
Dat live aroun you guys.”
Az wat Da One In Charge tell, da God Ova All Da Armies.
“Dey goin chase away all you guys, all ova da place.
An you no goin get nobody fo bring back da ones dat run away.
6 Still yet, bumbye I goin bring back
Da Ammon peopo dat stay come prisonas.”
Az wat Da One In Charge tell.
Agains Da Edom Peopo
(Obadiah 1-6)
7 ✡49:7: Isa 34:5-17; 63:1-6; Ezek 25:12-14; 35:1-15; Amos 1:11-12; Oba 1:1-14; Mal 1:2-5Bout da Edom peopo, dis wat Da One In Charge, da God Ova All Da Armies, tell:
“No mo nobody Teman side
Dat know wat fo do erytime, o wat?
No mo nobody dat undastan stuff
An can help odda peopo make one good plan?
Da ones dat befo time wen know wat fo do erytime,
Now, dey come good fo notting, aah?
8 “You guys from Dedan town,
Turn aroun, run away from Edom!
Go hide inside da caves!
Cuz da time goin come
Fo me punish da peopo dat come from Esau.
I goin make real bad kine stuff happen fo punish dem.
9 Wen guys come by you fo harves grapes,
Fo shua dey goin leave some grapes fo you, aah?
Wen steala guys come nite time,
Dey ony goin steal da stuff dey like take, aah?
10 But me, I goin take away eryting from da Esau ohana.
I goin show erybody da secret places wea dey stay hide,
So dey no can hide dea no moa.
Dea kids, dea ohana, da peopo dat live nea dem,
All dem goin come wipe out.
An da Esau peopo no goin stay no moa.
11 No goin get nobody from da Esau ohana dat can tell,
‘Az okay fo leave yoa kids hea dat no mo faddah o muddah,
Cuz I goin make shua dey stay alive.
Same ting fo da widows,
Dey can trus me.’ ”
12 Dis wat Da One In Charge tell: “Get peopo dat da judge tell, no goin suffa. Still yet, even dose peopo goin suffa. So den, how come you guys figga I no goin punish you guys an make you suffa? Fo shua I goin make you guys suffa!” 13 Da One In Charge tell: “I get da right fo make dis spesho promise cuz a who me: Fo shua, Bozrah, da main town fo da Edom peopo, goin come all bus up! Erybody goin come bum out wen dey tink bout Bozrah. Dey goin poin finga da Bozrah peopo, an talk bad bout dem. All da towns aroun dea goin stay bus up, foeva.” Dass wat Da One In Charge tell.
14 I hear one message from Da One In Charge,
Same time he sen one messenja guy
Fo tell da diffren nations dis:
“Bring yoa army guys togedda!
Make ready fo attack da Edom peopo!
Time now fo make war!”
15 “Now I goin make you Edom guys lose face,
Da way all da odda peopos goin see you.
You guys no goin get respeck!
16 You tink you can make peopo come sked a you,
An you get big head.
But you ony bulai you!
You guys stay wea you can hide inside da cliffs,
An you guys take ova da top a da hills,
Even if you guys make yoa nes high, jalike one eagle,
I goin bring you guys down from dea!”
Az wat Da One In Charge tell.
17 “Edom goin come da kine land
Dat make peopo come shock wen dey see um.
All da peopo dat go by dea goin come bum out,
Cuz all ova da land, eryting stay all bus up.
18 ✡49:18: Start 19:24-25Jalike da time Sodom an Gomorrah come all bus up,
An all da towns aroun dem too.
Same ting, no mo nobody goin live inside Edom.
No mo nobody goin stay ova dea even fo short time.”
Az wat Da One In Charge tell.
19 “Me, Da One In Charge, I goin come
Jalike one lion dat come outa da thick bushes by da Jordan Riva,
An go by da fields wea da sheeps stay grind from long time.
I goin chase da Edom peopo outa dea land real fas.
Den I goin pick whoeva I like fo lead da Edom nation.
You tink get somebody jalike me, o wat?!
You tink get somebody can face me, o wat?!
You tink get one leada guy dat can face me, o wat?!
No ways!”
20 So, lissen wat Da One In Charge make one plan fo do agains da Edom peopo.
Lissen wat he tink fo do agains da peopo dat live Teman side.
He goin steal dea kids,
Jalike somebody go drag away da bebe sheeps.
He goin wipe out dea land,
Jalike somebody make da grass land come jalike bolohead.
21 Wen da Edom peopo fall down,
Da earth goin shake!
Erybody goin hear um all da way to da Red Sea.
22 Look! One nation stay come!
Jalike one eagle dat stay fly high
An den come down fas.
Da eagle spread his wings fo attack Bozrah town.
Dat time, da Edom army guys,
Goin suffa, jalike one wahine
Dat suffa wen she born one bebe.
Agains Da Damascus Peopo
23 ✡49:23: Isa 17:1-3; Amos 1:3-5; Zek 9:1Dis wat Da One In Charge tell bout da Damascus peopo:
“Hamat town an Arpad town,
Da peopo dea donno wat fo do.
Cuz dey wen hear bad kine stuff
Bout wat wen happen Damascus side.
Dey all bodda inside cuz a dat.
Dass why dey stay nerjus,
Jalike da ocean dat no can stop go up an down.
24 “Da Damascus peopo wen lose fight.
Dey turn aroun fo run away,
An dey no can stop shake.
Dey ony tink
How dey stay sad inside dem,
Jalike one wahine wen she born one bebe.
25 Da peopo dea tell,
‘Ho! Damascus town, erybody know how was befo time!
Make me feel real good inside wen I tink bout um!
How come oua peopo still stay ova dea, aah?!’
26 Fo shua, da young guys from dea
Goin fall down an mahke on top da streets.
All da army guys from dea
No goin make noise cuz dey all wipe out!”
Az wat Da One In Charge tell, da God Ova All Da Armies.
27 Da One In Charge tell dis too:
“I goin burn down da Damascus walls
Da fire goin eat up da palaces Ben-Hadad wen build!”
Bout Kedar An Hazor
28 Bout da Kedar ohana an da small town leada guys aroun Hazor, da ones King Nebukadnezzar wen take ova, dis wat Da One In Charge tell:
“Stan up! Go attack Kedar!
Wipe out da peopos dat live inside da east side boonies!
29 Steal dea tents!
Rip off da sheeps an goats too!
Hemo da curtains from inside dea tents!
Steal all dea stuffs, an dea camels!
Peopo goin yell to da Kedar peopo,
‘Da army goin come attack all you guys from all ova da place,
An you guys goin come sked fo real kine!’
30 Run away! Go hide inside da caves!
You guys dat live Hazor side, no stay ova dea!
Cuz Nebukadnezzar, da Babylon king,
He get one plan
Fo wipe out you guys.”
Az wat Da One In Charge tell.
31 Da One In Charge tell Nebukadnezzar:
“Stan up! Go attack dis peopo!
Dey no stay worry bout notting.
Dey tink dey stay okay.
Dey no mo bars on top dea town gates.
Da peopo stay far from odda peopo.
32 Da army guys goin rip off dea camels.
Dey goin steal all dea cows.
I goin make dem scatta all ova da place,
All da ones dat cut dea hair spesho fo dea gods,
No matta how far away dey live,
I goin make bad kine stuff happen to dem
An goin come at dem from all ova da place.”
Az wat Da One In Charge tell.
33 “Da Hazor districk goin come one place
Wea ony get wild dogs stay live dea.
Goin stay all wipe out, foeva.
No mo nobody goin live Hazor side.
No mo nobody goin stay ova dea even fo one short time.”
Bout Da Elam Peopo
34 Dis wat Da One In Charge tell Jeremiah bout da Elam peopo right afta Zedekiah come da Judah king:
35 Dis wat Da One In Charge, da God Ova All Da Armies, tell:
“You know wat I goin do?!
I goin make da Elam peopo so dey no can fight!
Jalike I goin broke dea bows an arrows,
Az da main ting dat make um strong.
36 I goin bring armies fo fight da Elam peopo,
Jalike I stay make da four winds come agains um.
Da winds goin come from all ova da sky.
I goin make da Elam peopo come prisonas,
An I goin sen um to all da lands,
Jalike dey go wea eva da wind blow um.
No goin get even one nation
Dat no mo prisonas,
Da prisonas I throw outa Elam!
37 I goin make da Elam peopo come sked an lose fight
In front da peopo dat stay agains dem
An like kill dem.
I goin make bad kine stuff happen to dem
Cuz I real huhu wit dem.”
Az wat Da One In Charge tell.
“I goin sen peopo wit swords fo chase da Elam peopo
Till I pau wipe um out.
38 I goin put my throne Elam side.
I goin wipe out dea king an dea leada guys from dat land.”
39 “But bumbye, I goin bring back
Da good kine stuff,
Jalike da Elam peopo wen get befo time.”
Az wat Da One In Charge tell.
✡49:1 49:1: Ezek 21:28-32; 25:1-7; Amos 1:13-15; Zef 2:8-11
✡49:7 49:7: Isa 34:5-17; 63:1-6; Ezek 25:12-14; 35:1-15; Amos 1:11-12; Oba 1:1-14; Mal 1:2-5
✡49:18 49:18: Start 19:24-25
✡49:23 49:23: Isa 17:1-3; Amos 1:3-5; Zek 9:1