34
God Judge Da Peopo
Inside Da Diffren Countries
Inside Da Diffren Countries
1 Go come nea by me ova hea, you peopo
Inside da diffren countries
Fo lissen wat I tell.
I like all da peopos all ova da world,
An eryting dat stay hea
An grow hea inside da world fo lissen.
2 Cuz Da One In Charge, he stay huhu
Wit all da peopo inside da diffren countries.
He no like wat all dea army guys do.
He give up wit dem awready.
He goin let odda guys kill dem
An wipe all dem out.
3 Da peopo goin throw da guys dey kill outside da town,
Cuz dea mahke bodies goin be haunas.
Da mountains goin get blood soak inside da groun.
4 ✡34:4: Matt 24:29; Mark 13:25; Luke 21:26; JShow 6:13-14All da stars inside da sky goin come jalike dey rotten.
Da whole sky goin roll up, jalike peopo roll up one paypa.
All da stars goin fall down,
Jalike da leaf fall down from one grape plant wen stay dry,
An jalike da dry up fig fruits fall down from one tree.
5 ✡34:5: Isa 63:1-6; Jer 49:7-22; Ezek 25:12-14; 35:1-15; Amos 1:11-12; Oba 1:1-14; Mal 1:2-5Da One In Charge tell,
“Afta I use my sword inside da sky
Fo wipe out da bad peopo dea,
An get blood all ova um,
Den, cuz I da judge,
I goin use my sword fo bus up da Edom peopo
An wipe dem all out.”
6 Da One In Charge, his sword get plenny blood on top!
Get fat all ova um
From da bebe sheeps an goats fo make sacrifice,
Fat from da boy kine sheep kidney
Dat he use fo make sacrifice.
He goin kill plenny peopo inside da Edom land,
Jalike goin get one sacrifice fo Da One In Charge
Inside Bozrah, da Edom town.
7 He goin kill da wild cows
An da odda kine animals fo make sacrifice.
He goin kill da young bulls too,
An da real big bulls fo make sacrifice.
Goin get blood all ova dea land.
Da dirt ova dea goin stick togedda from da fat.
8 All dat goin happen
Cuz Da One In Charge get one time
Dat he goin pay back da Edom peopo.
He goin do um ova an ova fo one year.
Cuz he goin make shua
Da odda nations no goin take away da right
Fo his peopo live inside Jerusalem town.
9 Da watta inside streams Edom side
Goin come jalike tar.
Da dirt ova dea goin come jalike sulfur.
Da whole land goin come jalike burning tar.
10 ✡34:10: JShow 14:11; 19:3Da fire goin go day time an nite time,
Da smoke from da tar stay going up all da time.
From one faddah to anodda faddah,
Edom goin stay wit notting ova dea.
No mo nobody goin go thru dea eva one mo time.
11 Ony all kine diffren birds
Dat us Jew guys not suppose to eat
Goin stay dea an make dea nes ova dea.
God goin make shua da Edom land,
No mo notting inside,
An no mo shape notting.
12 Da Edom alii guys,
Dey goin call dea land
“Da Place Wea No Mo King
Cuz No Mo Notting,”
Cuz all da alii guys gone awready.
13 Dea palaces goin get thorn bush grow all ova da place.
An dea towns dat get strong wall goin get stickas an kukus all ova.
Da wild jackal dogs goin stay an eat dea,
An goin be da place fo da owl birds.
14 Da wild hyena animal
Goin come togedda wit odda wild animals
Dat live inside da boonies.
Da wild goats goin call out to each odda.
Goin get nite time animals dat sleep ova dea too
An find place fo res.
15 Dass da place da pueo goin make nes
An lay dea egg.
Dey goin born dea kids
An bring um all togedda
An take kea um unda dea wings.
Even da scavenja birds goin come togedda dea,
Da boy kine bird wit his wahine kine bird.
16 Go find out wat Da One In Charge wen tell his guys fo write.
Read um from dat book.
Da One In Charge tell dat all dese birds an animals goin show up dea.
Boy kine goin come wit his wahine kine, all a dem.
Me, Isaiah, I da one wen tell wat Da One In Charge tell dey gotta do,
An goin be his Spirit bring dem togedda.
17 He wen measure da land he goin give
To all da birds an animals.
An to dea kids an dea grankids,
Fo dem get da Edom land all da time.
✡34:4 34:4: Matt 24:29; Mark 13:25; Luke 21:26; JShow 6:13-14
✡34:5 34:5: Isa 63:1-6; Jer 49:7-22; Ezek 25:12-14; 35:1-15; Amos 1:11-12; Oba 1:1-14; Mal 1:2-5
✡34:10 34:10: JShow 14:11; 19:3