25
We Talk Good Bout Da One In Charge
(1 Corint 15:54)
1 Da One In Charge, you my God!
I goin tell dat you da greates,
I goin tell peopo I know wat good kine god you!
Cuz you wen do awesome kine tings
Wen you make one plan from long time befo,
An us guys can trus you fo dat,
An we know you tell da trut.
2 I goin tell dat you da greates,
Cuz get big towns dat you bus up
An make um come one pile a rubbish.
Get strong towns wea da army guys no can come inside,
You make um all fall down.
Da place inside odda countries
Wea da peopo build palace,
No even get one mo town dea now.
No way dey goin build um up one mo time.
3 Dass why goin get strong peopos
Dat show respeck fo you, Da One In Charge.
Peopo from da big towns dat stay real mean,
Dey goin stay sked a you.
4 I goin tell dat you da greates, Da One In Charge,
Cuz you give place
Fo da peopo dat no mo notting, fo hide.
You, one place fo da peopo
Dat need res an help wen dey get trouble.
One place fo go inside
From da big rain an da hot sun,
Cuz wen da mean guys go afta peopo,
Feel jalike wen da hard, cold rain
Hit agains one wall,
5 Wen da army guys from anodda place make big noise,
Oua peopo feel real dry,
Jalike dey stay on top one land wea no mo watta,
An stay all dry, an da sun hot.
But you make so no mo noise no moa.
You no let dose mean guys sing no moa,
Jalike wen da clouds come an make shade.
6 On top dis mountain, Jerusalem side,
Da One In Charge, Da God Ova All Da Armies,
He goin make one big luau fo all da diffren peopos.
Goin get da bestes kine food,
All da bestes kine wine,
An good kine meat wit plenny good stuff inside da bone,
Ol kine wine dat no mo junks awready.
7 An on top dis mountain too,
Da One In Charge goin do dis
Fo all da diffren peopos inside all da countries:
He goin take away da sore dey get inside,
An make um know wass fo real.
Cuz still yet, jalike dey all get cova ova dea head,
An Da One In Charge goin take away dat cova.
8 ✡25:8 a: 1Cor 15:54; b: JShow 7:17; 21:4Da One In Charge a me stay make peopo
So dey no goin mahke no moa, eva.
Dey all stay cry now,
But he goin wipe off da tears from dea face.
Da peopo dat get Da One In Charge fo dea God,
Dey all shame now, all ova da world.
But he goin take away all dat shame.
Dass wat Da One In Charge tell.
9 Dat time, peopo goin tell,
“Eh! Dis, oua God, fo shua!
We wen trus him,
An he wen get us outa trouble!
Dis Da One In Charge, da One we trus.
Now, us guys can dance an sing,
An stay feel real good inside
Cuz he wen do dat.
10 ✡25:10: Isa 15:1–16:14; Jer 48:1-47; Ezek 25:8-11; Amos 2:1-3; Zef 2:8-11An on top dis same mountain, Jerusalem side,
Da One In Charge goin use his powa dea.
“But da Moab peopo,
Odda peopo goin walk all ova dem,
Jalike wen dey make someting fo burn fire,
Firs dey throw da doodoo from da animals
An straw from da wheat, an watta inside one hole,
Den dey step um down good fo mix da mud.
11 Da Moab peopo goin push wit dea hands inside dea
Fo stay on top da doodoo,
Jalike one guy push da watta fo swim.
Dey get big head,
But God goin make dem come notting,
No matta wat dey do wit dea hands.
12 God goin broke down da strong wall
Fo da place wea da Moab peopo like go hide.
He goin make da wall fall down to da groun,
On top da dirt.”
✡25:8 25:8 a: 1Cor 15:54; b: JShow 7:17; 21:4
✡25:10 25:10: Isa 15:1–16:14; Jer 48:1-47; Ezek 25:8-11; Amos 2:1-3; Zef 2:8-11