15
Wat God Tell Isaiah Bout Moab
1 ✡15:1: Isa 25:10-12; Jer 48:1-47; Ezek 25:8-11; Amos 2:1-3; Zef 2:8-11Me Isaiah, I get heavy kine stuff fo tell bout wat I see goin happen to da Moab peopo:
Ony one nite, Ar town goin come wipe out!
Dass how da Moab land goin come all bus up.
Ony one nite, Kir town goin come wipe out too!
Dass how da Moab land goin come all bus up.
2 Da Moab peopo go up to dea temple,
An da Dibon peopo go up da sacrifice place on top da hill
Fo cry.
Cuz Nebo an Medeba stay bus up,
Da Moab peopo yell plenny.
Dey cut off dea hair an all dea beard
Fo show dey stay sad inside.
3 Inside da street, da peopo tie burmbag cloth aroun dea wais
Fo show dey stay sad inside.
On top da flat roof, an inside da street,
Erybody stay cry an yell plenny.
4 Da Heshbon an Elealeh peopo stay cry.
Can hear dea voice from one far place,
Even from Jahaz town.
Dass why da army guys from Moab stay yell,
But inside, dey stay sked an shaking!
5 Inside I stay cry fo da Moab peopo.
Da peopo from dea run all da way to Zoar town
An to Eglat-Shelishiyah.
I stay cry cuz dey go up da way fo go to Luhit,
An dey still stay cry wen dey stay going.
I stay cry cuz on top da road to Horonaim,
Da peopo stay yell
An tell bout dea place
Wea eryting stay broke.
6 I stay cry cuz da watta from Nimrim
Stay all dry up,
An cuz da grass fo da animals stay come dry,
No mo green tings dea.
7 Dass why, all da stuffs dey still get
An da stuffs dey stay stash fo ony dem,
Dey take wateva dey can carry
Fo run away da odda side Poplar Tree Gulch.
8 I stay cry cuz from one side
A da Moab land to da odda side,
Can hear peopo stay crying
All da way to Eglayim an Beer-Elim side.
9 I stay cry cuz da stream dat go by Dimon
Stay full wit blood, not watta.
But God still goin make
Mo plenny bad kine stuff happen fo da Dimon peopo:
Da Moab peopo dat run away,
An da peopo dat stay dea on top da land too,
Da lion goin chase um an get um.