4
Da One In Charge Goin Come King
Ova All Da Peopo
Ova All Da Peopo
1 In da las time, wen Da One In Charge ready fo come king fo da peopo,
Da hill wea da Temple Fo Da One In Charge stay now
Goin stay solid an be mo importan den all da odda hills.
An plenny peopo goin come dea,
Jalike da watta dat stay come down in one riva.
2 Peopo from diffren nations
Goin come dea an tell,
“Go come! Us go up
Da mountain a Da One In Charge,
Wea his Temple stay.
He da God Jacob wen pray to.
He goin show us guys da way he like fo us live,
Fo us do wat he tell us fo do,
His Rules goin come out from Mount Zion.
Wat he tell goin go out from Jerusalem.”
3 ✡4:3: Isa 2:4; Joel 3:10Den he goin be da judge fo plenny peopos,
An show da nations how dey no need fight,
No matta how strong o how far dey stay.
Dey goin take dea swords
An make plow points outa dem.
Dey goin take dea spears
An make um come knifes fo prune da plants.
Dat time, one peopo no goin fight anodda peopo.
Dey no goin even learn how fo fight an make war no moa.
4 ✡4:4: Zek 3:10Dat time, erybody goin sit down
Undaneat his grape plant an his fig tree,
An nobody goin make um come sked.
Cuz Da One In Charge, Da God Ova All Da Armies,
Wen tell dis.
5 No matta all da odda peopos know wat kine gods dey live wit,
Us guys, we goin stay tight
Wit oua God, dass Da One In Charge a us,
Cuz we know wat kine god him, foeva an eva.
Da Israel Peopo Goin Come Back
6 Dis da message from Da One In Charge:
“Bumbye, I goin bring back togedda
All da peopo dat no can walk good,
An da peopo dat wen come prisonas far away,
Da ones I wen make suffa.
7 Me, Da One In Charge, I goin make
Da peopo dat no can walk good
Come one new nation.
Da peopo da odda guys wen push away,
I goin make dem come real strong.
I goin be dea king dat live Mount Zion
From dat time an foeva.”
8 Jerusalem on top da hill,
Goin stay jalike one watch towa.
From dea, God goin watch ova his peopo,
Jalike one sheep guy watch ova his sheeps.
All da places wea da ol kings stay in charge befo time
Goin get Jerusalem fo dea main town one mo time.
Goin get king guys fo da Jerusalem peopo.
9 How come now you guys cry lidat?
You guys no mo king, o wat?
All da smart guys dat tell you guys wass good fo you do,
Dey all gone, o wat?
How come you guys squirm an suffa
Jalike one wahine dat stay born one bebe?
10 Squirm an yell, you Jerusalem peopo!
Jalike one wahine dat stay born one bebe.
Cuz now you guys gotta go way from da big town,
An stay inside da boonies.
You guys goin go all da way to Babylon town.
Az wea you guys goin get outa dis trouble.
Az wea Da One In Charge goin do wat he gotta do
Fo get you guys outa trouble
From da powa dat da peopo
Dat stay agains you guys get.
11 But now army guys from plenny countries
Come togedda fo attack you guys.
Dey tell, “Us guys like make pilau
Zion Hill wea God stay,
We like watch da peopo dat stay dea
Wen dey stay suffa.”
12 But da Jerusalem guys donno wat Da One In Charge plan fo do.
Dey no can tink why he bring dem ova dea fo punish dem,
Goin be jalike wen da farma guys harves da wheat
An bring um one place
Fo go drag one heavy board wit plenny spikes ova dem
Fo clean out da junks from da wheat.
13 Da One In Charge tell:
“You guys my Jerusalem peopo,
Get up an go drag da heavy board wit plenny spike
Fo clean da junks from my peopo,
Jalike dey wheat fo clean!
Cuz I goin make you guys strong
Jalike one bull dat get iron horns an bronze feets.
You goin bus up plenny peopos!
You goin give all dea rich kine stuffs to Da One In Charge,
Jalike da stuffs az one sacrifice fo him.
Da stuff dey get wen dey bus up odda peopos,
Goin be fo Da One In Charge,
Da Boss fo all da peopos inside da world!”